រាជធានីបាងកក៖ ក្រោយពេលបង្កើនការរឹតត្បិតទីក្រុងបាងកក និងខេត្តជុំវិញ ចំនួន៥ ជាថ្មី ដើម្បីទប់ស្កាត់ការរាតត្បាត នៃជំងឺកូវីដ-១៩ រដ្ឋាភិបាលថៃ កាលពីថ្ងៃទី២៩ ខែមិថុនា បានអនុម័តឲ្យស្ថាប័នហិរញ្ញវត្ថុចំនួន៧របស់រដ្ឋ ពង្រីកវិធានការបន្ធូរបន្ថយការសងប្រាក់បំណុល រយៈពេល៦ខែបន្ដទៅទៀត ដើម្បីជួយដោះស្រាយ ដល់ផលប៉ះពាល់ពីជំងឺកូវីដ-១៩។
លោក Arkhom Termpittayapaisith រដ្ឋមន្រ្ដីក្រសួងហិរញ្ញវត្ថថៃ បានថ្លែងថា គណៈរដ្ឋមន្រ្ដីថៃ កាលពីថ្ងៃអង្គារ (ទី២៩ ខែមិថុនា) បានអនុម័តឲ្យគ្រឹះស្ថានហិរញ្ញវត្ថុចំនួន៧ គ្រប់គ្រងដោយរដ្ឋ ពង្រីកវិធាការបន្ធូរបន្ថយប្រាក់បំណុល ដល់កូនបំណុលរបស់ខ្លួន រយៈពេល៦ខែបន្ដទៀត។ នេះជាវិធានការដ៏ល្អមួយ សម្រាប់ជួយដោះស្រាយបន្ទុករបស់កូនបំណុល ដែលកំពុងតែរងផលប៉ះពាល់ ពីជំងឺកូវីដ-១៩។
លោករដ្ឋមន្រ្ដីក្រសួងហិរញ្ញវត្ថុ បានបញ្ជាក់ថា វិធានការដែលមានស្រាប់នោះ ត្រូវបានកំណត់ផុតកាលបរិច្ឆេទ នៅក្នុងខែមិថុនា ឬកក្កដា។ ដូច្នេះវិធានការនេះនឹងត្រូវបន្ដបន្ធូរបន្ថយ រយៈពេល៦ខែបន្ដទៀត។ គ្រឹះស្ថានហិរញ្ញវត្ថុរបស់រដ្ឋទាំងនេះ នឹងផ្ដល់វិធានការបន្ធូរបន្ថយដល់កូនបំណុល ៧,៥៦លាន ជាលក្ខណៈឯកជន សហគ្រាសខ្នាតតូច និងខ្នាតមធ្យម (ហៅ SMEs) សរុបប្រាក់កម្ចី ៣,៤៦លានលានបាត (3.46 trillion = 3 460 000 000 000) ឬស្មើនឹងជាង១០៨ពាន់លាន (១០៨ ០៨៤ ៦១១ ៦២០) ដុល្លារសហរដ្ឋអាមេរិក ចាប់តាំងពីខែកុម្ភៈ ឆ្នាំ២០២០មក។ វិធានការទាំងនេះ រាប់ចាប់តាំងពីព្យួរការទូទាត់ប្រាក់ដើម និងការប្រាក់ នៅក្នុងអំឡុងពេលពង្រីកការសងប្រាក់បំណុលនេះ។
លោករដ្ឋមន្រ្ដីក្រសួងហិរញ្ញវត្ថុ បានបន្ថែមថា មានកូនបំណុល៣លាន នៅតែស្ថិតក្នុងដំណើរការបន្ធូរបន្ថយបំណុលនេះ ដែលនឹងផ្ដល់ឲ្យប្រាក់កម្ចី ដែលនៅសល់ ចំនួន១,២លានលានបាត (ប្រាក់ថៃ) ឬស្មើនឹងជាង៣៧ពាន់លាន (៣៧ ៤៨៥ ៩៩២ ៤៦៩)ដុល្លារសហរដ្ឋអាមេរិក។ រីឯគ្រឹះស្ថានហិរញ្ញវត្ថុទាំងនេះ បានច្របាច់បញ្ចូលប្រាក់កម្ចីជាង១០៤ពាន់លានបាត ឬស្មើនឹងជាង៣,២ពាន់លាន (3 248 786 014) ដុល្លារទៅក្នុងការបន្ធូរបន្ថយប្រាក់បំណុល សម្រាប់ជាលក្ខណៈឯកជន និងសហគ្រាសខ្នាតតូច ហើយមធ្យម។
លោក Vitai Ratanakorn ប្រធាន និងជានាយកប្រតិបត្ដិធនាគារប្រាក់សន្សំរបស់រដ្ឋាភិបាល (GSB) បានបញ្ជាក់ថា រហូតមកដល់ពេលនេះ ធនាគារ GSB បានដាក់ចេញវិធានការបន្ធូរបន្ថយជាង២០ ក្នុងតម្លៃជាង២០០ពាន់លានបាត ឬស្មើនឹងជាង៦,២ពាន់លាន (6 247 665 411)ដុល្លារ។ វិធានការមួយ គឺជាប្រាក់កម្ចីសម្រាប់អតិថិជនជាលក្ខណៈឯកជន អាចខ្ចីបាន ចាប់ពី១០ ០០០ (ជាង៣០០ដុល្លារ) ទៅ៥០ ០០០បាត (ជាង១ ៥០០ដុល្លារ)៕
