រដ្ឋធានីសេអ៊ូល៖ ក្រសួងការពារជាតិរបស់កូរ៉េខាងត្បូង បានអះអាងថា ខ្លួនមានគម្រោងបញ្ជូនកងទ័ព ទៅចូលរួមធ្វើសមយុទ្ធយោធាទ្រង់ទ្រាយធំ ជាមួយនឹងសម្ពន្ធមិត្ដ រួមមាន សហរដ្ឋអាមេរិក និងអូស្រ្ដាលី នៅក្នុងដែនទឹករបស់អូស្រ្ដាលី ហើយនេះជាការផ្ញើសារមួយទៅកាន់ចិនឲ្យកាន់តែក្ដៅស្លឹកត្រចៀកខ្លាំងឡើងបន្ថែមទៀត។
សារព័ត៌មានរបស់កូរ៉េខាងត្បូង The Korea Herald បានផ្សាយថា ក្រសួងការពារជាតិរបស់កូរ៉េខាងត្បូង បានឲ្យដឹង នៅថ្ងៃទី២៨ ខែមិថុនា ឆ្នាំ២០២១ ថា កូរ៉េខាងត្បូងមានគម្រោងបញ្ជូនកងទ័ពរបស់ខ្លួន ទៅចូលរួមសមយុទ្ធកងទ័ពជើងទឹកទ្រង់ទ្រាយធំ ជាមួយនឹងសហរដ្ឋអាមេរិកហើយអូស្រ្ដាលី ដែលគ្រោងនឹងធ្វើឡើង នៅខែកក្កដា ខាងមុខនេះ។
ក្រសួងការពារជាតិកូរ៉េខាងត្បូង បានបញ្ជាក់ថា កងទ័ពជើងទឹករបស់កូរ៉េខាងត្បូង នឹងបញ្ជូននាវាពិឃាដ ចំណុះ ៤ ៤០០ តោន ទៅចូលរួមសមយុទ្ធ Talisman Saber ដែលគ្រោងនឹងធ្វើឡើង នៅពាក់កណ្តាល ខែកក្កដា នៅក្នុងដែនទឹកអូស្ត្រាលី។ សមយុទ្ធប្រចាំឆ្នាំនេះ ជាសកម្មភាពបណ្តុះបណ្តាលទ្វេភាគីដ៏ធំបំផុត រវាងសហរដ្ឋអាមេរិក និងអូស្ត្រាលី។
លោក ប៊ូ ស៊ុងចាន់ (Boo Seung-chan) អ្នកនាំពាក្យក្រសួងការពារជាតិរបស់កូរ៉េខាងត្បូង បានថ្លែងទៅកាន់សន្និសីទសារព័ត៌មានថា «យើងបានសម្រេចចិត្តចូលរួមធ្វើសមយុទ្ធយោធាជាលើកដំបូង នៅឆ្នាំនេះ ដោយមានគោលបំណង បង្កើនសមត្ថភាពកងទ័ពរបស់យើង នៅក្នុងប្រតិបត្ដិការរួមគ្នា។ ប៉ុន្ដែការធ្វើសមយុទ្ធ កាលពីអំឡុងឆ្នាំ២០១៩ កងទ័ពកូរ៉េខាងត្បូង បានចូលរួម គ្រាន់តែជាអ្នកអង្កេតការណ៍ប៉ុណ្ណោះ។
អ្នកជំនាញខាងយោធាពិភពលោក បានអះអាងថា សមយុទ្ធយោធារបស់សហរដ្ឋអាមេរិក និងសម្ពន្ធមិត្ត នៅអាស៊ី នាពេលនេះ មានគោលបំណង បង្កើនការទប់ទល់ឲ្យកាន់តែខ្លាំងក្លា ប្រឆាំងនឹងឥទ្ធិពលយោធារបស់ប្រទេសចិន ជាពិសេស ក្រោយពេលទំនាក់ទំនង រវាងអូស្រ្តាលី និងចិន កាន់តែឡើងកម្ដៅ។ ប៉ុន្តែទោះជាយ៉ាងណា អ្នកនាំពាក្យក្រសួងការពារជាតិកូរ៉េខាងត្បូង បានអះអាងថា សមយុទ្ធយោធានេះ មិនមានគោលបំណងសំដៅទៅលើប្រទេសណាមួយនោះឡើយ។
បើតាមមន្រ្ដីយោធាអូស្រ្ដាលី បានបញ្ជាក់ថា កងទ័ពអង់គ្លេស កាណាដា នូវ៉ែលហ្សេឡង់ និងជប៉ុន ក៏នឹងចូលរួម នៅក្នុងធ្វើសមយុទ្ធកងទ័ពជើងទឹក នៅឆ្នាំនេះដែរ ខណៈកងទ័ពបារាំង ឥណ្ឌា និងឥណ្ឌូនេស៊ី នឹងចូលរួមធ្វើជាអ្នកសង្កេតការណ៍។ ការធ្វើសមយុទ្ធ នៅឆ្នាំនេះ នឹងត្រូវធ្វើឡើង ក្នុងទ្រទ្រង់មួយ សម្រាប់ទប់ទល់នឹងការរាតត្បាត ពីជំងឺកូវីដ-១៩ ដោយមានកងទ័ព ប្រហែល ១៧ ០០០នាក់ ចូលរួម ឬស្មើនឹងប្រហែលពាក់កណ្តាល នៃសមយុទ្ធ កាលពីឆ្នាំ២០១៩។
សារព័ត៌មានយ៉ុងហាប់របស់កូរ៉េខាងត្បូង បានផ្សាយថា កងទ័ពកូរ៉េខាងត្បូង ប្រហែល ១ ៨០០នាក់ នឹងបញ្ជូនទៅកាន់ប្រទេសអូស្រ្ដាលី ហើយពួកគេនឹងត្រូវធ្វើចត្ដាឡីស័ក រយៈពេល២សប្ដាហ៍ មុននឹងចូលរួមធ្វើសមយុទ្ធនេះ។
ការធ្វើសមយុទ្ធនេះ បានកើតឡើង ក្រោយពេលទំនាក់ទំនង រវាងអូស្រ្ដាលី និងចិន កាន់តែមានភាពតាន់តឹងដាក់គ្នា ចំពេលប្រទេសចិនកំពុងតែមានភាពតានជាមួយនឹងបណ្ដាប្រទេស នៅក្នុងតំបន់អាស៊ី-អាគ្នេយ៍ ឬហៅកាត់ «អាស៊ាន» ជុំវិញបញ្ហាសមុទ្រចិនខាងត្បូង ដែលមានស្រាប់ផងនោះ។ ចិនតែងតែអះអាងថា ដែនសមុទ្រចិនខាងត្បូង ដែលមានទំហំ ៣,៥លានគីឡូម៉ែត្រការ៉េ សម្បូរទៅដោយឧស្ម័ន្ធ រ៉ែ និងជីវចម្រុះ ហើយមានទំហំពាណិជ្ជកម្មឆ្លងកាត់ រហូតដល់៣លានលាន (៣ ០០០ ០០០ ០០០ ០០០) ដុល្លារសហរដ្ឋអាមេរិកនោះ គឺភាគច្រើនបំផុតជាដែនអធិបតេយ្យភាពរបស់ខ្លួន។ ជាមួយគ្នានឹងការអះអាងបែបនេះ ចិនបានបង្កើនសម្មភាពរបស់ខ្លួនទៅលើដែនទឹកជម្លោះនោះ ទើបនាំឲ្យមានទំនាស់ជាមួយនឹងប្រទេសវៀតណាម ហ្វីលីពីន ប្រ៊ុយណេ ម៉ាឡេស៊ី និងកោះតៃវ៉ាន់។
ទន្ទឹមនឹងនេះ សហរដ្ឋអាមេរិក តែងតែបញ្ជូននាវាផ្ទុកយន្ដហោះ និងនាវាចម្បាំងរបស់ខ្លួនជាច្រើនគ្រឿងទៅកាន់ដែនសមុទ្រចិនខាងត្បូង ក្រោមហេតុផលថា នេះជាសេរីភាពខាងនាវាចរណ៍របស់ពិភពលោក មិនមានប្រទេសណាមួយ យកដែនសមុទ្រនេះ មកធ្វើជាកម្មសិទ្ធិផ្ដាច់មុខបានឡើយ។ ករណីនេះធ្វើឲ្យចិនខឹងសម្បា និងតវ៉ាប្រឆាំងនឹងសកម្មភាពរបស់អាមេរិកយ៉ាងខ្លាំង៕
