ប្រាសាទបេងមាលា ឬ បឹងមាលា មានទីតាំងស្ថិតនៅក្នុងភូមិបេងមាលា ឃុំបេងមាលា ស្រុកស្វាយលើ ខេត្តសៀមរាបនិង មានចម្ងាយប្រមាណជា៧៧គីឡូម៉ែត្រពីទីរួមខេត្តសៀមរាប។
ប្រាសាទបេងមាលានេះគឺជា រមណីយដ្ឋានទេសចរណ៍បែបវប្បធម៌ប្រវត្តិសាស្រ្ត ដែលបានកសាងឡើងនៅសតវត្សរ៍ទី១២ តាមរចនាប័ត្មប្រាសាទ អង្គរវត្ត មានកំពែង៣ជាន់ កសាងឡើងដើម្បី ឧទ្ទិសថ្វាយដល់ព្រះអាទិទេពក្នុងព្រហ្មញ្ញសាសនា និកាយវិស្ណុនិយម។
ថ្វីត្បិតតែប្រាសាទនេះ មានសភាពទ្រុឌទ្រោមខ្លាំងនិង ទទួលរងការខូចខាត ដោយសារកត្តាសង្គ្រាម កត្តាមនុស្ស និងកត្តាធម្មជាតិ ក៏ពិតមែន ប៉ុន្តែប្រាសាទបេងមាលា មានពោរពេញទៅដោយ ដើមឈើមានម្លប់ត្រឈឹងត្រឈៃ និងមានឬសឈើធំៗ ចាក់ជ្រែកថ្មប្រាសាទគួរជាទីគយគន់។
ភ្ញៀវទេសចរអាចមកសិក្សាអំពីប្រវត្តិសាស្រ្ត ទស្សនាប្រាង្គប្រាសាទ មើលចម្លាក់ និងថតរូបលេងកម្សាន្តទុកជាអនុស្សាវរីយ៍ផងដែរ៕
ប្រភព: ជំហាន