បរទេស៖ ជនបរទេសទាំងអស់ មិនមែនជាជនអន្ដោប្រវេសន៍ ដែលកំពុងរស់នៅលើទឹកដីថៃ នឹងត្រូវមានប្រាក់ធានារ៉ាប់រង (Insurance) យ៉ាងតិច៣លានបាត (ប្រាក់ថៃ) ឬ ១០០ ០០០ដុល្លារ សម្រាប់ទប់ស្កាត់នឹងជំងឺកូវីដ-១៩។
សារព័ត៌មានបាងកក បានចេញផ្សាយ នៅថ្ងៃទី១៦ ខែមិថុនា ថា នៅពេលខាងមុខ ជនបរទេសទាំងអស់ មិនមែនជាជនអន្ដោប្រវេសន៍ ដែលកំពុងរស់នៅក្នុងប្រទេសថៃ ត្រូវតែបង្ហាញថា ពួកគេមានប្រាក់ធានារ៉ាប់រងយ៉ាងតិច៣លានបាត ឬស្មើនឹង១០០ ០០០ដុល្លារសហរដ្ឋអaមេរិក សម្រាប់ប្រឆាំងនឹងជំងឺកូវីដ-១៩។ សំណើនេះត្រូវបានអនុម័ត ដោយគណៈរដ្ឋមន្រ្ដីថៃ កាលពីថ្ងៃទី១៥ ខែមិថុនា។
លោកស្រី Traisuree Taisaranakul អ្នកនាំពាក្យរងរបស់រដ្ឋាភិបាលថៃ បានបញ្ជាក់ថា ច្បាប់នេះនឹងអនុវត្ដតែទៅលើអ្នកកាន់ទិដ្ឋាការ មិនមែនជាជនអន្ដោប្រវេសន៍ (NIV) ។ រីឯ NIV នេះត្រូវបានប្រគល់ឲ្យសម្រាប់មនុស្ស៤ប្រភេទ រួមមាន អាពាហ៍ពិពាហ៍, ការងារ, ពាណិជ្ជកម្ម និងចូលនិវត្ដន៍។ វិធានការថ្មីនេះធ្វើឡើង ស្របតាមវិសោធនកម្មលើបទប្បញ្ញត្ដិ ដែលត្រូវបានអនុម័ត ដោយគណៈរដ្ឋមន្រ្ដី នៅក្នុងអំឡុងខែមេសា ឆ្នាំ២០២០។
លោកស្រី Traisuree Taisaranakul បានបន្ថែមថា បច្ចុប្បន្ន អ្នកកាន់ទិដ្ឋាការ NIV តម្រូវឲ្យមានប្រាក់ធានារ៉ាប់រង ត្រឹមតែ ៤០ ០០០បាត (ប្រាក់ថៃ) ឬស្មើនឹង ១ ២៨៥ដុល្លារអាមេរិក សម្រាប់ការព្យាបាល នៅខាងក្រៅមន្ទីរពេទ្យ ឬប្រាក់ ៤០០ ០០០បាត ស្មើនឹង ១២ ៨៥០ដុល្លារ សម្រាប់ព្យាបាល នៅក្នុងមន្ទីរពេទ្យ។ ប៉ុន្ដែនៅថ្ងៃខាងមុខ អ្នកស្នើសុំ NIV ត្រូវតែបង្ហាញភ័ស្ដុតាង ពួកគេមានការធានារ៉ាប់រង សម្រាប់ប្រឆាំងនឹងជំងឺកូវីដ-១៩ ហើយប្រសិនបើពួកគេមានសិទ្ធិទទួលបានការធានារ៉ាប់រងសុខុមាលភាព ឬធានារ៉ាប់រង ដែលគាំទ្រដោយរដ្ឋនោះ ការធានារ៉ាប់រងអប្បបរមា ក៏ត្រូវអនុវត្តដូចគ្នាដែរ។ រីឯអ្នកទាំងឡាយណា ដែលចង់បន្ត NIV ថ្មីរបស់ពួកគេ គឺមានសេរីភាព ក្នុងការទិញការធានារ៉ាប់រងពីបរទេស។
ប្រសិនបើពួកគេទទួលបានការធានារ៉ាប់រង ដែលឧបត្ថម្ភដោយរដ្ឋ ពួកគេត្រូវតែបញ្ជូនឯកសារភស្តុតាង បញ្ជាក់ដោយស្ថានទូត នៃប្រទេសរបស់ពួកគេ ប្រចាំនៅទីក្រុងបាងកក ឬចេញដោយមន្រ្តីមានការអនុញ្ញាត ពីក្រសួងការបរទេស នៃប្រទេសកំណើតរបស់ពួកគេ។ ប្រសិន បើមានអ្នកណាម្នាក់ ត្រូវបានគេបដិសេធពីការធានារ៉ាប់រងចាំបាច់ ចំពោះជំងឺកូវីដ-១៩ ដោយសារតែពួកគេត្រូវបានគេចាត់ទុកថា ជាក្រុមមានហានិភ័យ ពួកគេត្រូវតែបង្ហាញឯកសារបដិសេធ ក៏ដូចជា ភស្តុតាង នៃសន្តិសុខហិរញ្ញវត្ថុ គណនីធនាគារ ឬការធានារ៉ាប់រងសុខភាពផ្សេងទៀត ដែលមានតម្លៃអប្បបរមា ១០០ ០០០ ដុល្លារអាមេរិក។
លោកស្រី Traisuree បានបន្ដថា ចាប់តាំងពីគណៈរដ្ឋមន្រ្ដីអនុម័តនូវបទបញ្ជាថ្មីនេះ ជាគោលការណ៍ជំហានបន្ទាប់ គឺការិយាល័យអន្ដោប្រវេសន៍ ត្រូវតែផ្សព្វផ្សាយឲ្យបានលម្អិត និងចេញជាផ្លូវការនូវបទបញ្ជានេះ។ រីឯក្រសួងការបរទេស ក៏នឹងធ្វើការងារឲ្យរលូនលើនីតិវិធីសុំ NIV ហើយក្រសួងសុខាភិបាលសាធារណៈ និងក្រសួងមហាផ្ទៃ នឹងទទួលខុសត្រូវចំពោះបទប្បញ្ញាត្ដិពាក់ព័ន្ធ និងប្រាប់ដល់សាធារណជន អំពីបទប្បញ្ញត្ដិនេះ។
លោកស្រី Traisuree បានបន្ថែមថា បែបបទ NIV បច្ចុប្បន្នមានការខុសឆ្គង ដោយសារជនបរទេស ដែលមានអាយុជា៧០ មិនអាចទិញប័ណ្ណធានារ៉ាប់រង នៅក្នុងប្រទេសថៃបាន។ ករណីនេះបណ្ដាលឲ្យពួកគេ មិនមានលក្ខណៈសម្បត្ដិគ្រប់គ្រាន់ ក្នុងការស្នាក់នៅ រយៈពេលយូរ នៅក្នុងព្រះរាជាណាចក្រអាស៊ានមួយនេះ៕