រាជធានីភ្នំពេញ៖ កាលពីល្ងាចថ្ងៃទី១៤ ខែមិថុនា ឆ្នាំ២០២១ មានករណីវៀតណាម បានដាក់សាឡង់កាត់ទន្លេ ដើម្បីកុំឲ្យពលរដ្ឋវៀតណាម ដែលរស់នៅលើផ្ទះបណ្ដែតទឹកអាចឆ្លងចូលប្រទេសវៀតណាមវិញបាន ខណៈសមាគមវៀតណាមនៅកម្ពុជា ប្រកាសមិនឲ្យជនជាតិវៀតណាមដែលរស់នៅលើផ្ទះបណ្ដែតទឹក ចូលប្រទេសវៀតណាមឡើយ ក្រោមហេតុផលដោយសារតែស្ថានភាពនៃការរីករាលដាលជំងឺកូវីដ-១៩ នៅក្នុងប្រទេសរបស់ខ្លួន។
យោងតាមប្រភពព័ត៌មានច្បាស់ការក្នុងស្រុកបានឲ្យដឹងថា មានបែត្រីចំនួន២ ទូកចំនួន២៤ និងមនុស្សជាង៦០នាក់ ប្រមាណ១៥គ្រួសារ បានធ្វើដំណើរចង់ឆ្លងដែនទៅវៀតណាម ប៉ុន្តែសមត្ថកិច្ចវៀតណាមនៅច្រកព្រំដែន កោះរការ ខេត្ត ព្រៃវែង ដាក់សាឡង់កាត់ទន្លេមិនឲ្យពួកគេឆ្លងទៅប្រទេសកំណើតគេទេ ក្រោមលេសថាខ្លាចឆ្លងកូវីដ។
ប្រភពដដែលនេះបានបន្តទៀតថា សមត្ថកិច្ចព្រំដែនច្រកកោះរកា បានព្យាយាមចូលទៅសួរនាំ និងលួងលោមអោយជនជាតិវៀតណាមទាំងនោះបកត្រឡប់ក្រោយទៅចតរង់ចាំជាមួយក្រុមផ្ទះបែត្រីដទៃទៀតនៅចំណុចឃុំខ្ពបអាទាវ ក្នុងស្រុកលើកដែក ដើម្បីងាយស្រួលចាត់ចែងគ្រប់គ្រង ប៉ុន្តែពួកគេបានប្រកែកដោយអះអាងទាមទារឆ្លងព្រំដែនចូលទៅប្រទេសវៀតណាមអោយខាងតែបាន ហើយបើមិនព្រមអោយពួកគេចូលទៅទេនោះ ពួកគេសុខចិត្តស្លាប់នៅព្រំដែននេះទាំងអស់គ្នា គឺមិនព្រមបកត្រឡប់ក្រោយឡើយ ៕
