បរទេស៖ ការផ្ទុះឡើងនូវរលកទី៣ នៃជំងឺកូវីដ-១៩ នៅក្នុងប្រទេសថៃ នាពេលនេះ កំពុងក្លាយជារឿងមួយដ៏លំបាក និងអាក្រក់បំផុត ជាពិសេស បញ្ហាហិរញ្ញវត្ថុ ដោយសារតែអាជីវកម្មជាច្រើន ត្រូវបានបង្ខំចិត្តបិទទ្វារសាជាថ្មី។ នេះបើតាមសារព័ត៌មានថៃ The Nation ចេញផ្សាយ នៅថ្ងៃទី២៥ ខែឧសភា ឆ្នាំ២០២១។
ទោះជាវីរុសប្រភេទ SARS-CoV-2 បានរាលដាលមកដល់ក្នុងប្រទេសថៃ ដោយមានដើមកំណើតចេញពីទីក្រុង Wuhan ប្រទេសចិន កាលពីខែមករា ឆ្នាំ២០២០ក៏ដោយ ក៏វីរុសបម្លែងខ្លួន នៅចក្រភពអង់គ្លេស ដែលឆ្លង និងសម្លាប់មនុស្សកើនឡើង រហូតដល់១,៧ដង បានបង្កជារលកទីបី នៅក្នុងខែមេសា ឆ្នាំ២០២១នេះ។ វីរុសនេះត្រូវបានគេរកឃើញថា បានឆ្លងនៅកន្លែងកម្សាន្តជាច្រើន នៅក្នុងតំបន់ Thong Lor របស់ទីក្រុងបាងកក។
មជ្ឈមណ្ឌលគ្រប់គ្រងស្ថានភាពកូវីដ-១៩របស់ថៃ ហៅកាត់ CCSA កាលពីថ្ងៃទី៨ ខែឧសភា ឆ្នាំ២០២១ ក៏បានរាយការណ៍ថា វីរុសបម្លែងខ្លួននៅប្រេស៊ីល ក៏ត្រូវបានរកឃើញ នៅក្នុងកន្លែងផ្សេងៗផងដែរ។
មន្រ្ដីសុខាភិបាលថៃ កាលពីថ្ងៃទី២១ ខែឧសភា បានអះអាងថា កម្មករជាច្រើននាក់ធ្វើការ នៅក្នុងការដ្ឋានតំបន់ Lak Si ស្ថិតក្នុងទីក្រុងបាងកក បានឆ្លងវីរុសបម្លែងខ្លួន នៅឥណ្ឌា។ បន្ទាប់មក នៅថ្ងៃទី២២ ខែឧសភា ឆ្នាំ២០២១ វីរុសបម្លែងខ្លួន នៅអាហ្វ្រិកខាងត្បូង ក៏ត្រូវបានរកឃើញលើអ្នកជំងឺជាច្រើន នៅក្នុងស្រុក Tak Bai ខេត្ត Narathiwat ផងដែរ៕