បរទេស៖ គេហទំព័រ The Royal Gazette នៅថ្ងៃទី២៥ ខែឧសភា ឆ្នាំ២០២១ បានចេញផ្សាយ នូវក្រឹត្យបន្ទាន់មួយ ដោយអនុញ្ញាតឲ្យក្រសួងហិរញ្ញវត្ថុថៃ បន្ដខ្ចីថវិកាបន្ថែម សម្រាប់ដោះស្រាយបញ្ហាសង្គម និងសេដ្ឋកិច្ច ដែលរងផលប៉ះពាល់ពីការផ្ទុះឡើង នៃវីរុសកូវីដ-១៩។
ក្រឹត្យបន្ទាន់នេះចែងថា ថវិកាត្រូវខ្ចីនោះ មិនត្រូវលើសពី៥០០ពាន់លានបាត (ប្រាក់ថៃ) ឬស្មើនឹងជាង១៥,៩៣ពាន់លាន (១៥ ៩៣៤ ៦៩៥ ៨២២)ដុល្លារសហរដ្ឋអាមេរិក។ ថវិកាទាំងនោះ មានគោលបំណងផ្ដល់នូវជំនួយចំបាច់ និងចេញថ្លៃសំណងដល់មុខរបររបស់ប្រជាពលរដ្ឋ ដែលរងផលប៉ះពាល់ពីរលកថ្មី នៃការរាតត្បាតពីជំងឺកូវីដ-១៩។
ប្រភពព័ត៌មានពីក្រសួងហិរញ្ញវត្ថុថៃ បានឲ្យដឹងថា ថវិកាដែលត្រូវខ្ចីបន្ថែម ចំនួន ៥០០ពាន់លានបាត ឬស្មើនឹងជាង១៥,៩៣ពាន់លានដុល្លារអាមេរិកនោះ នឹងយកមកបម្រុងទុកប្រើប្រាស់ លើគោលដៅអាទិភាព ចំនួន៣ រួមមាន៖
១-ថវិកា៣០ពាន់លានបាត ឬស្មើនឹង ៩៥៦ ០៨១ ៧៤៩ដុល្លារអាមេរិក៖ ប្រើប្រាស់សម្រាប់ការទិញឱសថនានា, វ៉ាក់សាំងបង្ការកូវីដ-១៩,សម្ភារវេជ្ជសាស្រ្ដ ក៏ដូចជា ការប្រើប្រាស់សម្រាប់ការស្រាវជ្រាវ និងការអភិវឌ្ឍវ៉ាក់សាំងក្នុងស្រុក ដែលផលិត និងការចំណាយពាក់ព័ន្ធនឹងផ្នែកវេជ្ជសាស្រ្ដដទៃទៀត។
២-ថវិកាចំនួន៣០០ពាន់លានបាត ឬស្មើនឹង ៩ ៥៦០ ៨១៧ ៤៩៣ដុល្លារអាមេរិក៖ ប្រើប្រាស់សម្រាប់ផ្តល់ជូនថវិកា ជួយកាត់បន្ថយនូវបន្ទុកហិរញ្ញវត្ថុរបស់ប្រជាជន នៅក្នុងអំឡុងពេលមានវិបត្តិកូវីដ-១៩នេះ។
៣-ថវិកា១៧០ពាន់លានបាត ឬស្មើនឹងជាង៥,៤១ពាន់លាន (៥ ៤១៧ ៧៩៦ ៥៧៩) ដុល្លារអាមេរិក៖ ប្រើប្រាស់សម្រាប់ការជំរុញសេដ្ឋកិច្ច, ការបង្កើតការងារ និងការលើកកម្ពស់លើការវិនិយោគ ដើម្បីស្តារសេដ្ឋកិច្ចឡើងវិញ បន្ទាប់ពីវិបត្តិរាតត្បាត ត្រូវបានដោះស្រាយរួចរាល់។
គណៈរដ្ឋមន្រ្ដី នៃរដ្ឋាភិបាលថៃ កាលពីពេលកន្លងមកនេះ ធ្លាប់អនុម័តឲ្យឲ្យក្រសួងហិរញ្ញវត្ថុខ្ចីលុយ រហូតដល់៧០០ពាន់លានបាត (ប្រាក់ថៃ) ឬស្មើនឹង២២,២៤ពាន់លានដុល្លារអាមេរិក សម្រាប់ដោះស្រាយផលប៉ះពាល់ពីវិបត្ដិកូវីដ-១៩ម្ដងរួចមកហើយ។
សារព័ត៌មានថៃ The Nation កាលពីថ្ងៃទី១៨ ខែឧសភា បានផ្សាយថា គណៈរដ្ឋមន្រ្ដីថៃបានអនុម័តតាមសំណើរបស់ក្រសួងហិរញ្ញវត្ថុ ដើម្បីខ្ចីថវិកា ចំនួន៧០០ពាន់លានបាត (ជាង២២,២៤ពាន់លានដុល្លារអាមេរិក) ដើម្បីដោះស្រាយផលប៉ះពាល់ពីវិបត្ដិកូវីដ-១៩។ នេះជាលុយខ្ចីបន្ថែមទៅលើកញ្ចប់ថវិកាកម្ចី កាលពីមុន ចំនួន១លានលានបាត ឬស្មើនឹងជាង៣១,៧៨ពាន់លានដុល្លារសហរដ្ឋអាមេរិក។
ក្រសួងហិរញ្ញវត្ថុថៃ បានថ្លែងថា ក្រសួងមានការចាំបាច់ សម្រាប់ការខ្ចីថវិកា ចំនួន៧០០ពាន់លានបាតបន្ថែមទៀត ដោយសារថវិកានៅសល់តែ ចំនួន១៨០ពាន់លានបាត ឬស្មើនឹងជាង៥,៧២ពាន់លានដុល្លារអាមេរិក នៃថវិកាកម្ចីពីមុន ចំនួន១លានលានបាត (ជាង៣២ពាន់លានដុល្លារ)។ ដោយឡែកថវិកាសល់ចំនួន ១៨០ពាន់លាន (ជាង៥,៧ពាន់លានដុល្លារអាមេរិក)នោះ គឺ១៥០ពាន់លានបាត ស្មើនឹងជាង ៤,៧៦ពាន់លានដុល្លារអាមេរិក នឹងចាត់ចែងទៅលើកិច្ចការសាធារណៈ ដើម្បីជួយដោះស្រាយនូវទុក្ខលំបាករបស់ប្រជាពលរដ្ឋ ហើយ៣០ពាន់លានបាត (ជាង៩៥៣លានដុល្លារ) នឹងផ្ដល់ដល់ក្រសួងសុខាភិបាលសាធារណៈ។
ក្រសួងហិរញ្ញវត្ថុថៃ បានបញ្ជាក់ថា ក្នុងទំហំទឹកប្រាក់កម្ចី ចំនួន៧០០ពាន់លានបាត ឬស្មើនឹង ២២,២៤ពាន់លានដុល្លារនោះ គឺ៥០០ពាន់លានបាត ឬស្មើនឹងជាង១៥,៨៩ពាន់លានដុល្លារនឹងយកទៅដោះស្រាយបញ្ហាវិបត្ដិកូវីដ-១៩។ ដោយឡែកថវិកានៅសល់២០០ពាន់លានបាត ឬស្មើនឹងជាង៦,៣៥ពាន់លានដុល្លារ នឹងយកទៅដោះស្រាយលើបញ្ហាការប្រមូលចំណូលទាបជាងគោលដៅ ក្នុងឆ្នាំសារពើពន្ធ ២០២១-២០២២៕
