រដ្ឋធានី BAMAKO៖ កងទ័ពម៉ាលី បានចាប់ឃុំខ្លួនប្រធានាធិបតី នាយករដ្ឋមន្រ្ដី និងរដ្ឋមន្រ្ដីក្រសួងការពារជាតិ អស់រយៈពេលជាច្រើនម៉ោងកន្លងមកហើយ បន្ទាប់ពីការរុះរើរដ្ឋាភិបាលមួយ ដែលបានរក្សាទុកសមាជិក នៃរបបយោធាចំនួន២រូប ដែលបានកាន់កាប់អំណាច នៅក្នុងរដ្ឋប្រហារមួយ កាលពី៩ខែមុន។ នេះបើតាមសារព័ត៌មាន India Today ចេញផ្សាយ នៅថ្ងៃទី២៥ ខែឧសភា ឆ្នាំ២០២១។
សារព័ត៌មានប៉ាងកកប៉ុស្ដិ៍ បានចេញផ្សាយ នៅព្រឹក ថ្ងៃទី២៥ ខែឧសភា ថា ក្រុមមន្រ្តីម៉ាលី ដែលតូចចិត្តនឹងការរុះរើរដ្ឋាភិបាល បានចាប់ខ្លួនប្រធានាធិបតី និងនាយករដ្ឋមន្រ្តី នាំទៅឃុំឃាំងនៅក្នុងមូលដ្ឋានកងទ័ពមួយ នៅខាងក្រៅរដ្ឋធានី BAMAKO ។ សកម្មភាពរបស់ពួកយោធានេះ ត្រូវបានអន្ដរជាតិថ្កោលទោស និងទាមទារឲ្យដោះលែងមន្រ្ដីជាន់ខ្ពស់ម៉ាលីទាំងនោះជាបន្ទាន់។
លោក Bah Ndaw ប្រធានាធិបតី និងលោក Moctar Ouane នាយករដ្ឋមន្ដ្រីកំពុងតែដឹកនាំរដ្ឋាភិបាលបណ្ដោះអាសន្នមួយដែលត្រូវបានបង្កើតឡើង ក្រោមការគំរាមកំហែង ពីការដាក់ទណ្ឌកម្មនៅក្នុងតំបន់ បន្ទាប់ពីការដាក់ទណ្ឌកម្ម កាលពីខែសីហា ហើយមានការចាប់ឃុំខ្លួន កាលពីថ្ងៃចន្ទ ទី២៤ ខែឧសភា ទើបបានបង្កើនការភ័យខ្លាច ចំពោះការធ្វើរដ្ឋប្រហារជាលើកទី ២។
មន្រ្ដីជាន់ខ្ពស់២រូប សុំលក្ខខណ្ឌមិនបញ្ចេញឈ្មោះ បានប្រាប់ដល់ទីភ្នាក់ងារសារព័ត៌មាន AFP ថា ក្រុមទាហានបានចាប់លោក Ndaw ប្រធានាធិបតី និងលោក Ouane នាយករដ្ឋមន្ត្រីម៉ាលី ទៅកាន់មូលដ្ឋានកងទ័ព Kati នៅជាយរដ្ឋធានី Bamako ប្រទេសម៉ាលី។ ការចាប់ឃុំខ្លួនប្រមុខរដ្ឋ និងប្រមុខរដ្ឋាភិបាលម៉ាលីនេះ បានធ្វើឡើង ក្រោយពេលមានការរុះរើរដ្ឋាភិបាលដ៏រសើបមួយ កាលពីព្រឹក ថ្ងៃចន្ទ ទី២៤ ខែឧសភា ដែលត្រូវបានរៀបចំឡើង ដើម្បីឆ្លើយតបទៅនឹងការរិះគន់កាន់តែខ្លាំងលើរដ្ឋាភិបាលបណ្តោះអាសន្ន។
ដោយឡែកក្រុមយោធានៅតែចង់រក្សាអំណាចខ្លួន ដែលបានគ្រប់គ្រង នាអំឡុងពេលរដ្ឋបាលមុន ក្នុងពេលរុះរើរដ្ឋាភិបាលនោះ។ មេដឹកនាំរដ្ឋប្រហារ២រូប គឺលោក Sadio Camara អតីតរដ្ឋមន្រ្ដីក្រសួងការពារជាតិ និងលោកវរសេនីយ៍ Modibo Kone អតីតរដ្ឋមន្រ្ដីក្រសួងមហាផ្ទៃ ត្រូវដាក់ជំនួសតំណែងនេះ។
ក្រុមមេដឹកនាំរដ្ឋប្រហារ និងនាយទាហានបានប្រើឥទ្ធិពលដ៏គួរឱ្យកត់សម្គាល់លើរដ្ឋាភិបាល ដោយធ្វើឱ្យមានការសង្ស័យលើការសន្យារៀបចំការបោះឆ្នោត នៅដើមឆ្នាំក្រោយនេះ។ ការរុះរើរដ្ឋាភិបាលនេះ បានកើតឡើង ចំពេលមានបញ្ហាប្រឈមផ្នែកនយោបាយ ដែលកំពុងកើនឡើង នៅក្នុងរដ្ឋធានីបាម៉ាកូ និងរងសម្ពាធពីការកំណត់ពេលវេលា សម្រាប់កំណែទម្រង់៕