បរទេស៖ ឥណ្ឌា ជាប្រទេសផលិតវ៉ាក់សាំងដ៏ធំបំផុត សម្រាប់ផ្គត់ផ្គង់ នៅលើពិភពលោក ប៉ុន្ដែដោយសារការផ្ទុះវីរុសកូវីដ-១៩កាន់តែខ្លាំងឡើង នៅក្នុងប្រទេសដែលមានប្រជាពលរដ្ឋច្រើនបំផុតលំដាប់ទី២របស់ពិភពលោក ហើយមិនមានវ៉ាក់សាំងគ្រប់គ្រាន់ សម្រាប់ចាក់ជូនប្រជាពលរដ្ឋនោះ ទើបក្រសួងសុខាភិបាល បានចេញមកអះអាងថា ឥណ្ឌាមិនអាចផលិតវ៉ាក់សាំងបង្ការកូវីដ-១៩ទាន់ ក្នុងពេលភា្លមៗនេះទេ។ នេះបើតាមការចេញផ្សាយរបស់ India Today ។
លោក Lav Agarwal រដ្ឋមន្រ្ដីក្រសួងសុខាភិបាលឥណ្ឌា បានថ្លែងថា «វ៉ាក់សាំងបង្ការកូវីដ-១៩មិនអាចផលិតបានភ្លាមៗនោះទេ។ ការផលិតនឹងត្រូវចំណាចពេលវេលាសមរម្យ សម្រាប់ផលិតវ៉ាក់សាំងបង្ការកូវីដ-១៩ ចែកជូនដល់រដ្ឋទាំងអស់របស់ប្រទេសឥណ្ឌា»។
លោក Lav Agarwal បានបញ្ជាក់ កាលពីថ្ងៃទី២៤ ខែឧសភាថា «មិនមែនវ៉ាក់សាំងទាំងអស់ ដែលផលិត នៅក្នុងប្រទេសឥណ្ឌា អាចផលិតបានភ្លាមៗ សម្រាប់ចែកចាយនោះដែរ»។ លោក Agarwal បានថ្លែងបែបនេះ ដើម្បីឆ្លើយតបទៅនឹងសំណួរ អំពីការខ្វះចន្លោះ រវាងការផលិតវ៉ាក់សាំង និងលទ្ធភាពផ្គត់ផ្គង់វ៉ាក់សាំង នៅក្នុងប្រទេសឥណ្ឌា។
លោករដ្ឋមន្រ្ដីបានបន្ថែមថា «យើងចាំបាច់ត្រូវតែយល់ដឹងអំពីបញ្ហានេះ នៅក្នុងវិធី២យ៉ាង គឺការផលិត ហើយបន្ទាប់មក គឺលទ្ធភាព នៃវ៉ាក់សាំង នៅក្នុងវិស័យនេះ។ ប្រសិនបើវ៉ាក់សាំង Covishield ចំនួន ៦៥ ០០០ ០០០លានដូស (6.5 crore [doses] of Covishield) កំពុងដំណើរការផលិត ហើយជាមធ្យម នៃវ៉ាក់សាំង Covaxin ចំនួន ១៥ ០០០ ០០០ដូស(1.5 crore [doses]ត្រូវបានផលិតក្នុងខែនេះ ប្រសិនបើការផលិតនេះមានវ៉ាក់សាំងត្រឹមតែ ចំនួន៨០ ០០០ ០០០ដូស គឺចំនួនសរុប មិនអាចផ្គត់ផ្គង់បានភ្លាមៗឡើយ។
លោក Lav Agarwal បានបន្ដថា “ករណីនេះមានដំណើរការពាក់ព័ន្ធ ក្នុងការធានាដល់លទ្ធភាពរបស់វា។ បន្ទាប់ពីការផលិតរួច ការសិក្សាពីសុវត្ថិភាព និងប្រសិទ្ធភាព ក៏ត្រូវបានធ្វើ ដោយចំណាយពេលប្រហែលមួយសប្តាហ៍។ ក្រោយមកវ៉ាក់សាំងទាំងនេះត្រូវបានបញ្ជូនទៅកាន់មជ្ឈមណ្ឌលមន្ទីរពិសោធន៍ឱសថ (CDL) ដែលមានមូលដ្ឋាន នៅក្នុងទីក្រុង Kasauli ស្ថិតក្នុងរដ្ឋ Himachal Pradesh ដើម្បីធ្វើតេស្តិ៍។ បន្ទាប់ពីបញ្ចប់ការធ្វើតេស្តហើយ ទើបវ៉ាក់សាំងទាំងនេះ ត្រូវបញ្ជូនទៅតាមបណ្តាញសម្រាប់ផ្គត់ផ្គង់ នៅក្នុងប្រទេសឥណ្ឌា។
លោករដ្ឋមន្រ្ដីបានបន្ថែមថា «វាអាចចំណាយពេលយ៉ាងតិច ចន្លោះពី៨-១០ថ្ងៃ មុនពេលវ៉ាក់សាំងទាំងនេះ ទៅដល់គោលដៅរបស់វា។ ដោយសារតែបញ្ហានេះ ទើបធ្វើឲ្យការផលិតវ៉ាក់សាំង មិនអាចធ្វើបានភ្លាមៗ សម្រាប់ការផ្គត់ផ្គង់ដល់រដ្ឋទាំងអស់របស់ឥណ្ឌា»៕