បរទេស៖ រហូតមកដល់ពេលនេះ ប្រទេសម៉ាឡេស៊ី កំពុងចាប់ផ្ដើមផ្ទុះករណីឆ្លងកូវីដ-១៩ថ្មី រហូតដល់ជា ៦០០០ករណី ទើបនាយករដ្ឋមន្រ្ដី នៃរាជាណាចក្រមួយនេះ កំពុងតែបង្កើនយុទ្ធសាស្រ្ដ ដើម្បីទប់ស្កាត់នូវវីរុសដ៏កំណាចនេះ ហើយលោកលើកឡើងថា ទោះជាយ៉ាងនេះក្ដី ប្រសិនបើមិនឲ្យមនុស្សធ្វើការ សេដ្ឋកិច្ចជាតិនឹងត្រូវដួលរលំ ពិបាកនឹងស្ដារឡើងវិញ នាពេលក្រោយ។
សារព័ត៌មាន Malaymail បានដកស្រង់របាយការណ៍របស់ក្រសួងសុខាភិបាលម៉ាឡេស៊ី យកមកចុះផ្សាយ នៅថ្ងៃទី២៤ ខែឧសភា ថា ថ្ងៃនេះ ម៉ាឡេស៊ីរកឃើញករណីឆ្លងកូវីដ-19ថ្មី ចំនួន ៦ ៥០៩នាក់ និងករណីស្លាប់ ៤៩នាក់ ធ្វើឲ្យចំនួនអ្នកឆ្លងសរុប នៅក្នុងប្រទេស កើនដល់ ៥១៨ ៦០០នាក់ និងស្លាប់សរុប ២ ២៤៨នាក់។
សារព័ត៌មាន TNP បានដកស្រង់សម្ដីរបស់លោក Muhyiddin Yassin នាយករដ្ឋមន្រ្ដីម៉ាឡេស៊ី ថ្លែង កាលថ្ងៃទី២៣ ខែឧសភា ថា «យើងមានការចាំបាច់ត្រូវតែប្រយុទ្ធប្រឆាំងនឹងជំងឺដ៏កាចសាហាវនេះ ដើម្បីធ្វើឲ្យមានតុល្យភាពឡើងវិញ រវាងជីវិតរស់នៅ និងជីវភាពប្រចាំថ្ងៃ ក្នុងការអនុវត្ដនូវវិធានការដ៏តឹងរឹងនេះ។ នេះជាអ្វីដែលរដ្ឋាភិបាលមិនបានសម្រេចចិត្តត្រូវបិទប្រទេស ព្រោះវាជះឥទ្ធិពលដល់ជីវភាពរស់នៅប្រចាំថ្ងៃ ហើយមនុស្សជាច្រើននឹងបាត់បង់ការងារធ្វើ។
លោកនាយករដ្ឋមន្រ្ដី បានបញ្ជាក់ថា ប្រសិនបើមនុស្សមិនធ្វើការ សេដ្ឋកិច្ចនឹងដួលរលំ ហើយប្រទេសត្រូវអភិវឌ្ឍសេដ្ឋកិច្ចនេះឡើងវិញ។ រដ្ឋាភិបាលត្រូវចំណាយថវិកា ចំនួន ១៩០ពាន់លានដុល្លារ ជាមួយនឹងកញ្ចប់ថវិកាជំរុញ ចំនួន៦ផ្សេងទៀត។ នេះមិនមែនជាចំនួនមួយដ៏តិចតួចនោះទេ ហើយករណីនេះក៏មិនដែលបានកើតឡើង នៅក្នុងប្រទេសម៉ាឡេស៊ីដែរ។ ចំណែកផលិតផលក្នុងស្រុកសរុប (GDP) របស់ប្រទេសចំនួន២០ភាគរយ ត្រូវយកមកប្រើប្រាស់ ដើម្បីជួយដល់ប្រជាពលរដ្ឋ។ នេះជាអ្វីដែលប្រជាពលរដ្ឋត្រូវតែយល់ដឹងអំពីបញ្ហានេះ»។
លោកនាយករដ្ឋមន្រ្ដីម៉ាឡេស៊ី បានបញ្ជាក់ នៅក្នុងកិច្ចសម្ភាសន៍ពិសេសមួយ ជាមួយនឹងបណ្ដាញទូរទស្សន៍ RTM និង Bernama កាលពីថ្ងៃទី២៣ ខែឧសភា ថា «ប្រសិនបើយើងបិទវិស័យសេដ្ឋកិច្ចទាំងអស់ យើងប្រឈមមុខនឹងបញ្ហាកាន់តែធ្ងន់ឡើងបន្ថែមទៀត ហើយប្រទេសជាតិមិនអាចស្ដារឡើងវិញបាន នាពេលក្រោយ»។
នៅក្នុងចំណោមវិធានការនានា ត្រូវបានប្រកាស កាលពីថ្ងៃទី២២ ខែឧសភា ឆ្នាំ២០២១នោះ គឺផ្សារទំនើប ភោជនីយដ្ឋាន និងផ្សារនានា នឹងបើកដំណើរការឡើងវិញ តិចម៉ោង។ ម្ចាស់អាជីវកម្ម នឹងបើកចាប់ពីម៉ោង៨ព្រឹកដល់ម៉ោង៨យប់។ ដោយឡែកអ្នកដើរទិញអីវ៉ាន់ ត្រូវបានអនុញ្ញាតឲ្យត្រឹមតែ រយៈពេល២ម៉ោងប៉ុណ្ណោះ។
ជាមួយគ្នានេះ រដ្ឋាភិបាលក៏ចង់ឲ្យជនស៊ីវិល ប្រហែល៨០ភាគរយ ចាប់ផ្ដើមធ្វើការងារតាមផ្ទះ ខណៈវិស័យឯកជនត្រូវបានផ្ដល់យោបល់អនុញ្ញាតបុគ្គលិកត្រឹមតែប្រហែល៤០ភាគរយ ត្រូវធ្វើការដូចគ្នានេះ។ ច្បាប់ថ្មីបន្ថែមលើបម្រាម កាលថ្ងៃទី១២ ខែឧសភា លើការបរិភោគអាហារពេលយប់ នៅតាមភោជនីយដ្ឋាន និងហាងអាហារ ដោយអាចអនុញ្ញាតត្រឹមតែការវេចខ្ចប់ និងដឹកចែកចាយតែប៉ុណ្ណោះ៕
