បរទេស៖ អាជ្ញាធរព្រែកជីកស៊ុយអេ ប្រទេសអេហ្ស៊ីប បានថ្លែង កាលពីថ្ងៃទី៣១ ខែមីនា ឆ្នាំ២០២១ថា កប៉ាល់យក្សដឹកកុងតឺន័រ Ever Green ដែលជាប់គាំងកាត់ទទឹងផ្លូវនាវាចរណ៍ នៅព្រែកជីស៊ុយអេ រយៈពេល៦ថ្ងៃកន្លងមកនេះ គឺការចំណាយអាចនឹងកើនឡើងដល់១ពាន់លានដុល្លារ។
លោក Osama Rabia ប្រធានអាជ្ញាធរព្រែកជីកស៊ុយអេ បានប្រាប់ទូរទស្សន៍ Sada el-Balad របស់អេហ្ស៊ីប កាលពីថ្ងៃទី៣១ ខែមីនា ឆ្នាំ២០២១ថា «យើងនឹងបន្តការគណនា រាល់ការចំណាយទាំងអស់ ដែលយើងបានប្រើប្រាស់ តាំងពីថ្ងៃដំបូង នៃឧប្បត្តិហេតុនេះ។ ការចំណាយទាំងនេះ រួមមាន ការប្រើប្រាស់នាវាអូសទាញ និងកប៉ាល់បូមទឹកដែលបានដំណើរការ នៅម៉ោងធ្វើការ បូករួមទៅ … ចំនួនមួយពាន់លានដុល្លារសហរដ្ឋអាមេរិក»។
លោលោក Osama Rabia ប្រធានអាជ្ញាធរព្រែកជីកស៊ុយអេ បានបន្ដថា កប៉ាល់យក្សដឹកកុងតឺន័រនេះ បានជាប់គាំងកាត់ទទឹងព្រែកជីកស៊ុយអេ ដោយមិនអាចឲ្យនាវានានាធ្វើនាវាចរណ៍បានឡើយ។ មុនដំបូង រដ្ឋាភិបាលអេហ្ស៊ីបបានខាតបង់ប្រាក់ចំណូល ក្នុងមួយថ្ងៃ ចំនួន១៤លានដុល្លារអាមេរិក។ ប៉ុន្ដែនៅពេលនេះ កប៉ាល់ជារបស់កម្មសិទ្ធិរបស់ជប៉ុន ប្រតិបត្ដិការដោយតៃវ៉ាន់ ដោតទង់ជាតិប៉ាណាម៉ា បានអូសចេញហើយ និងកំពុងនៅពាក់កណ្ដាលផ្លូវនៃព្រែកជីក ដែលតភ្ជាប់ពីសមុទ្រមីឌីទែរ៉ាណេ ទៅសមុទ្រក្រហម។ នាវា Ever Green នេះ នឹងសំចត រហូតដល់ការស៊ើបអង្កេតលើឧប្បត្តិហេតុនេះ ត្រូវបានបញ្ចប់ រួមទាំងការត្រួតពិនិត្យសុវត្ថិផ្នែកខាងមុខដែលបានបុកច្រាំងព្រែកជីកនោះ។ កប៉ាល់យក្សនេះបានធ្វើនាវាចរណ៍ពីប្រទេសចិនឆ្ពោះទៅកាន់ប្រទេសហូល្លង់ មុននឹងជួបនឹងហេតុការណ៍បែបនេះ។
កប៉ាល់ Ever Green បានជាប់គាំងកាត់ទទឹងព្រែកជីកស៊ុយអេ តាំងពីថ្ងៃទី២៣ ខែមីនា ឆ្នាំ២០២១ ហើយបានបណ្ដាលឲ្យបិទផ្លូវនាវាចរណ៍ដ៏មមាញឹករបស់ពិភពលោក មិនអាចឆ្លងកាត់បាន អស់រយៈពេល៦ថ្ងៃ ទើបអាចរំដោះចេញវិញបាន ហើយបើកផ្លូវឲ្យនាវាផ្សេងចេញចូល។
កប៉ាល់ Ever Green មានបណ្ដោយប្រវែង៤០០ម៉ែត្រ ទទឹង៥៩ម៉ែត្រ មានចំណុះ ២០០ ០០០តោន និងដឹកកុងតឺន័រ ២០ ០០០។ ដោយឡែក ព្រែកជីក Suez នេះ ត្រូវបានកសាងឡើង ចន្លោះពីឆ្នាំ១៨៥៩ ដល់១៨៦៩ ដោយកម្មករអេហ្ស៊ីប ប្រហែល១,៥លាននាក់ បានជីកព្រែកនេះ ហើយត្រូវបានគេប៉ាន់ប្រមាណថា មានមនុស្ស ប្រហែល ១២០ ០០០នាក់បានស្លាប់។ ព្រែកជីកស៊ុយអេនេះ បានផ្ដល់ហិរញ្ញវត្ថុ ដោយរដ្ឋាភិបាលបារាំង និងអេហ្ស៊ីប៕