(ភ្នំពេញ)៖ ក្រុមហ៊ុន ខ្មែរ ប៊ែវើរីជីស ធ្វើការបរិច្ចាគទឹកបរិសុទ្ធ កម្ពុជា ទ្រង់ទ្រាយធំចំនួន១៩៤០កេស ជូនដល់ប៉ុស្តិ៍ត្រួតពិនិត្យចំនួន១៩៤ប៉ុស្តិ៍ នៅទូទាំងប្រទេស ដោយប៉ុស្តិ៍នីមួយៗទទួលបាន១០កេសជារៀងរាល់ខែ ចាប់ពីខែមីនាដល់ខែធ្នូ ឆ្នាំ២០២១។
ការបរិច្ចាគទឹកបរិសុទ្ធ កម្ពុជា ដែលជាផ្នែកមួយនៃយុទ្ធនាការ «ទឹកចិត្តកម្ពុជា» របស់ក្រុមហ៊ុន ខ្មែរ ប៊ែវើរីជីស ត្រូវបានប្រគល់ដល់ដៃមន្ត្រីនគរបាលចរាចរណ៍ទូទាំងប្រទេស ដែលកំពុងសម្រួលចរាចរណ៍យ៉ាងសស្រាក់សស្រាំជូនពលរដ្ឋគ្រប់ពេលវេលា មិនថាយប់ ឬថ្ងៃ។
លោកស្រី គង់ កុសល នាយិកាទីផ្សារ ខ្មែរ ប៊ែវើរីជីស បានថ្លែងថា៖ «យុទ្ធនាការ «ទឹកចិត្តកម្ពុជា» របស់ក្រុមហ៊ុន ខ្មែរ ប៊ែវើរីជីស សូមរួមចំណែកគាំទ្រ និងលើកទឹកចិត្តដល់មន្ត្រីនគរបាលចរាចរណ៍ ដែលបានបំពេញកាតព្វកិច្ចថែរក្សាសណ្ដាប់ធ្នាប់ចរាចរណ៍ឲ្យមានរបៀបរៀបរយជូនពលរដ្ឋជារៀងរាល់ថ្ងៃ។ យើងសង្ឃឹមយ៉ាងមុតមាំថា តាមរយៈ «ទឹកចិត្តកម្ពុជា» ដែលបានបរិច្ចាគទៅដល់ទីតាំងនៃប៉ុស្តិ៍ត្រួតពិនិត្យនានា គឺបានជួយសម្រាលភាពនឿយហត់ខ្លះៗអំឡុងពេលបំពេញការងារ»៕
