ខេត្តតាកែវ៖ នាថ្ងៃទី២៤ ខែកុម្ភៈ ឆ្នាំ២០២១ អាជ្ញាធរខេត្តតាកែវ បានប្រកាសរកឃើញមនុស្សជាង១០នាក់ មានជាប់ពាក់ព័ន្ធផ្ទាល់ និងប្រយោលទៅនឹងព្រឹត្តិការណ៍សហគមន៍ ២០ កុម្ភៈ។
អភិបាលស្រុកបាទីលោក ភួន ឈីម បានប្រាប់ឲ្យដឹងថា អាជ្ញាធរស្រុក បានបញ្ជូនមនុស្សចំនួន ៣ នាក់ដែលប៉ះពាល់ផ្ទាល់ទៅធ្វើចត្តាឡីស័ក នៅសណ្ឋាគារ Seven Day In ក្នុងក្រុងដូនកែវ ហើយមានមនុស្ស១១ នាក់ផ្សេងទៀតដែលប៉ះពាល់ប្រយោលធ្វើចត្តាឡីស័កនៅផ្ទះ។
លោកប្រាប់ថា អ្នកដែលធ្វើចត្តាឡីស័កនៅផ្ទះ ដោយសារតែអ្នកទាំងនោះ បានជួបប្រាស្រ័យប្រយោល ប៉ុន្តែត្រូវស្ថិតក្រោមការតាមដាននៅផ្ទះ យកសំណាកផងដែរ។ អ្នកប៉ះពាល់ផ្ទាល់នោះ មានបុរសពីរនាក់ធ្វើការនៅក្នុងសណ្ឋាគារមួយនៅកោះពេជ្រ ដែលជាចំណុចសង្ស័យរបស់មន្ត្រីសុខាភិបាល និងបុរសម្នាក់ទៀតជាអ្នករត់ម៉ូតូកង់បី។
លោក នុត ស៊ីណាត ប្រធានមន្ទីរសុខាភិបាលខេត្ត បានបញ្ជាក់ឲ្យដឹងថា អាជ្ញាធរបានរកឃើញអ្នកប៉ះពាល់ផ្ទាល់តែម្តងចំនួន ៤ នាក់ ដែលប៉ះពាលផ្ទាល់មកធ្វើចត្តាឡីស័ក ខណៈដែលគ្រួសារអ្នកទាំងនេះ ជាង ១០ នាក់ផ្សេងទៀត ត្រូវដាក់ឲ្យធ្វើចត្តាឡីស័កនៅផ្ទះ ក្រោមការតាមដានរបស់មន្ត្រីសុខាភិបាលយ៉ាងប្រុងប្រយ័ត្ន។
លោក នុត ស៊ីណាត បានបន្ថែមទៀតថា អ្នកធ្វើចត្តាឡីស័កទាំងអស់នាពេលបច្ចុប្បន្នមានជិត ៦០ នាក់ ក្នុងមណ្ឌលចត្តាឡីស័កចំនួន២កន្លែង នៅសាលាគរុកោសល្យ និងសណ្ឋាគារ Seven Day In ៕