បរទេស៖ ក្រោយពេលប្រធានាធិបតីថ្មីរបស់សហរដ្ឋអាមេរិក បានដាក់ចេញគោលនយោបាយជាអាទិភាព ប្រយុទ្ធប្រឆាំងនឹងវីរុសកូរ៉ូណានោះមក រហូតមកដល់ពេលនេះ ចំនួនអ្នកឆ្លង និងស្លាប់ដោយសារកូវីដ-១៩ មានការថយចុះខ្លាំង ដោយមានករណីស្លាប់ថ្មី ជាង១ ៧០០នាក់ និងឆ្លងថ្មី ជាង ៦ ០០០នាក់ ខណៈពីមុនមានករណីឆ្លងប្រចាំថ្ងៃ ចន្លោះពី១៨ម៉ឺននាក់ទៅជាង២០ម៉ឺននាក់ និងស្លាប់ចន្លោះពី ៣ ០០០ទៅជាង៤ ០០០នាក់។
លោក ចូ បៃដិន (Joe Biden) ប្រធានាធិបតីសហរដ្ឋអាមេរិក ក្រោយពេលចូលស្បថ ឡើងកាន់តំណែងជាប្រធានាធិបតីភ្លាម លោកបានដាក់ចេញផែនការជាអាទិភាពបំផុតទៅលើការប្រយុទ្ធប្រឆាំងនឹងវីរុសកូរ៉ូណា (ហៅកាត់ កូវីដ-១៩= Coronavirus Disease 2019) ។ ភ្លាមៗនោះ លោកប្រធានាធិបតីបានថ្លែងទៅកាន់ប្រជាជាតិរបស់ខ្លួនថា ក្នុងរយៈពេល១០០ថ្ងៃ នៃការកាន់តំណែងជាលើកដំបូងរបស់លោក គឺប្រជាពលរដ្ឋអាមេរិកាំង១០០លាននាក់ ត្រូវតែទទួលបានការចាក់វ៉ាក់សាំងបង្ការកូវីដ។
បើតាមសារព័ត៌មាន VOA បានចេញផ្សាយ កាលពីថ្ងៃទី១៣ ខែកុម្ភៈ ឆ្នាំ២០២១ថា មជ្ឈមណ្ឌលគ្រប់គ្រង និងបង្ការជំងឺ (CDC) របស់សហរដ្ឋអាមេរិក បានបញ្ជាក់ថា បើគិតត្រឹមព្រឹក ថ្ងៃទី១៣ ខែកុម្ភៈ ឆ្នាំ២០២១ CDC បានគ្រប់គ្រងវ៉ាក់សាំងជាង៥០លានដូស នៅក្នុងប្រទេស (សហរដ្ឋអាមេរិក) ហើយបានចែកចាយវ៉ាក់សាំងប្រហែល៦៩,៩លានដូលផ្សេងទៀត។
CDC បានបន្ថែមថា បើគិតត្រឹមវេលាខាងលើ មានប្រជាពលរដ្ឋអាមេរិក ជាង៣៧លាននាក់បានទទួលការចាក់វ៉ាក់សាំងម្ដងរួចមកហើយ និងជាង១៣លាននាក់ផ្សេងទៀត បានទទួលការចាក់វ៉ាក់សាំង ចំនួន២លើក (មនុស្សម្នាក់ត្រូវចាក់វ៉ាក់សាំងនេះចំនួន២លើក)។
បើតាម CDC បានឲ្យដឹងទៀតថា ក្នុងរយៈពេល២៤ថ្ងៃ នៃការឡើងកាន់តំណែងរបស់ប្រធានាធិបតីថ្មីរបស់សហរដ្ឋអាមេរិក លោក ចូ បៃដិន គឺប្រជាពលរដ្ឋអាមេរិកជាង៥០លាននាក់ បានចាក់វ៉ាក់សាំងបង្ការកូវីដ-១៩រួចរាល់ហើយ។ ប៉ុន្ដែក្នុងចំណោមអ្នកទទួលការចាក់វ៉ាក់សាំងទាំងនោះ រួមមាន ជាង១៣លានាក់បានចាក់វ៉ាក់សាំងចំនួន២ដងរួចមកហើយ និងជាង៣៧លាននាក់ ទើបតែចាក់វ៉ាក់សាំងបង្ការកូវីដបានម្ដងប៉ុណ្ណោះ។
ទោះជាយ៉ាងណា រហូតមកដល់ពេលនេះ អាមេរិកមិនត្រឹមតែជាប្រទេសមហាអំណាចខាងសេដ្ឋកិច្ច និងយោធាប៉ុណ្ណោះទេ សូម្បីតែវ៉ាក់សាំងបង្ការកូវីដ-១៩ សហរដ្ឋអាមេរិក មានក្រុមហ៊ុនផលិតវ៉ាក់សាំងល្បីៗ រហូតដល់ទៅ៤ នៅក្នុងចំណោមក្រុមហ៊ុនផលិតវ៉ាក់សាំងបង្ការកូវីដ-១៩ល្បីៗ ចំនួន៧ នៅលើពិភពលោក។ រីឯក្រុមហ៊ុនផលិតវ៉ាក់សាំងល្បីរបស់អាមេរិកទាំងនេះ រួមមាន ក្រុមហ៊ុន Pfizer (សហការផលិតជាមួយក្រុមហ៊ុនអាល្លឹម៉ង់ BioNTech) ក្រុមហ៊ុន Moderna ក្រុមហ៊ុន Novavax និងក្រុមហ៊ុន Johnson & Johnson ។ ចំណែកឯវ៉ាក់សាំងបង្ការកូវីដ-១៩របស់ក្រុមហ៊ុនទាំងនេះ សុទ្ធមានប្រសិទ្ធភាព និងសុវត្ថិភាពខ្ពស់ជាងវ៉ាក់សាំងរបស់ចិន។
បើតាមគេហទំព័រ Worldometer បានចេញផ្សាយ កាលពីវេលាម៉ោង៨ និង៣០នាទីព្រឹក ថ្ងៃទី១៧ ខែកុម្ភៈ ឆ្នាំ២០២១ ថា ក្នុងរយៈពេល២៤ម៉ោងកន្លងមកនេះ នៅលើទឹកដីសហរដ្ឋអាមេរិក មានករណីឆ្លងថ្មី នៃជំងឺកូវីដ-១៩ ចំនួន ៦៣ ២៤៣នាក់ និងករណីស្លាប់ថ្មី ចំនួន ១ ៧៣៧នាក់។ ប៉ុន្ដែបើគិតតាំងពីការផ្ទុះឡើងដំបូង នៃជំងឺកូវីដ១៩ នៅទីក្រុងវូហាន (ចិនអានអ៊ូហាន) ខេត្តហ៊ូប៉ី នាភាគកណ្ដាល ប្រទេសចិន នៅក្នុងអំឡុងឆ្នាំ២០១៩ ហើយបន្ដឆ្លង រហូតមកដល់វេលាខាងលើនេះ នៅលើសហរដ្ឋអាមេរិក មានអ្នកឆ្លងសរុប ២៨ ៣៨១ ០៦៥នាក់ ស្លាប់ ៤៩៩ ៩៤១នាក់ អ្នកព្យាបាលជាសះស្បើយ ១៨ ៤៧៧ ២៨៨នាក់ និងអ្នកកំពុងសម្រាកព្យាបាល ៩ ៤០៣ ៨៣៥នាក់ ហើយក្នុងនោះមានអ្នកឈឺធ្ងន់ ១៨ ៧១៦នាក់៕
