បរទេស៖ ក្រោយពេលរលកបាតុកម្មយ៉ាងកក្រើកប្រទេសថៃ បានស្ងប់ស្ងាត់ ដោយសារការផ្ទុះឡើងកូវីដ១៩នោះមក ព្រះមហាក្សត្រថៃ Maha Vajiralongkorn បានតែងតាំងស្នំឯក ជាមហេសីទីពីរ។
ស្នំឯក Sineenat Wongvajirapakdi ត្រូវបានព្រះមហាក្សត្រថៃ Maha Vajiralongkorn បានដកហូតតំណែង កាលពីឆ្នាំ២០១៩ ក្រោមការចោទប្រកាន់ ពីបទ «ខ្វះការគោរពដល់ព្រះរាជអគ្គមហេសី» ។ ប៉ុន្ដែនៅពេលនេះ ព្រះមហាក្សត្រថៃ បានសម្រេចតែងតាំងស្នំឯក Sineenat ឲ្យក្លាយជាព្រះមហេសីទីពីរ កាលពីថ្ងៃទី២៦ ខែមករា ឆ្នាំ ២០២១ នៅក្នុងឱកាសខួបកំណើតអាយុ៣៦ឆ្នាំរបស់នាង។
ព្រះមហាក្សត្រថៃ និងមហេសីថ្មី Sineenat បានគ្រងឈុតដូចគ្នា ចូលរួមពិធីដោះលែងសត្វនិងត្រី នៅក្នុងពិធីបុណ្យសាសនាមួយ ដើម្បីអបអរសាទរស្នំឯក ត្រូវបានតែងតាំងជាមហេសីទីពីរ។ រីឯការតែងតាំងរបស់ព្រះមហាក្សត្រថៃនេះ បានបង្កឲ្យមានការភ្ញាក់ផ្អើលយ៉ាងខ្លាំង ចំពោះប្រជាពលរដ្ឋថៃ។
ព្រះនាង Sineenat ត្រូវបានតែងតាំងជាស្នំឯក ហើយក្លាយជាមនុស្សដំបូងទទួលបានតំណែងនេះ ដែលមិនធ្លាប់មាន នៅក្នុងរយៈពេល១០០ឆ្នាំ នៃប្រវត្ដិរបស់ស្ដេចថៃ។ ប៉ុន្ដែក្រោយមក ព្រះនាងត្រូវបានដកហូតដំណែងទាំងអស់ ហើយបាត់ខ្លួន តាំងពីពេលនោះមក។ លុះមកដល់ខែកញ្ញា ឆ្នាំ២០២០ នាង Sineenat ត្រូវបានតែងតាំងជាស្នំឯកសាជាថ្មីវិញ ហើយចុងក្រោយ ត្រូវបានព្រះមហាក្សត្រ តែងតាំងជាព្រះរាជអគ្គមហេសីទីពីររបស់ស្ដេចថៃ។
ប្រជាពលរដ្ឋថៃ កាលពីប៉ុន្មានខែមុននេះ បាននាំគ្នាធ្វើបាតុកម្មយ៉ាងកក្រើកប្រទេសអាស៊ានមួយនេះ ដោយទាមទារឲ្យធ្វើកំណែទម្រង់ស្ថាប័នព្រះមហាក្សត្រ (ដកហូតអំណាចខ្លះរបស់ព្រះមហាក្សត្រ) ទាមទារឲ្យនាយករដ្ឋមន្រ្ដីចុះចេញពីតំណែង និងធ្វើវិសោធនកម្មរដ្ឋធម្មនុញ្ញ។ ប៉ុន្ដែរលកបាតុកម្មនេះបានស្ងប់ស្ងាត់ទៅវិញ ក្រោយមានច្បាប់ហាមឃាត់ជួបជុំគ្នា ដើម្បីទប់ស្កាត់កូវីដ ដែលបានផ្ទុះឡើងជាថ្មី នៅក្នុងប្រទេសថៃ៕