រាជធានីភ្នំពេញ៖ មហាជនមានការភ្ញាក់ផ្អើលយ៉ាងខ្លាំងពាក់ព័ន្ធជម្លោះក្នុងសង្គមតារាចម្រៀងរ៉េបខ្មែរ ធ្លាយពីការច្រៀងឌឺដងគ្នាតាមរយៈយូធូប ឥឡូវមកដល់វេលាប្ដឹងផ្ដល់គ្នា ដោយតារាចម្រៀងរ៉េប នេត្រ ចាន់តារាវីត ហៅ Vid Cooler បានដាក់ពាក្យប្ដឹងតារាចម្រៀងរ៉េបដូចគ្នា គឺប្រុសឡា ម្ចាស់បទ “នារីសក់ខ្លី” ត្រៀមតតាំងគ្នាតាមរយៈផ្លូវតុលាការវិញម្ដង ដែលមានជម្លោះឈានទៅដល់ការប្រើអំពើហិង្សាបង្កជារបួសស្នាមដេរ៣០ថ្នេរ។
យ៉ាងណាមិញគេមិនទាន់ដឹងថា ជម្លោះរវាងក្រុមតារាចម្រៀងរ៉េបទាំងពីរនាក់ខាងលើនេះ ផ្តើមចេញពីបញ្ហាអ្វីនោះឡើយ ប៉ុន្តែបើតាមការបញ្ជាក់តាមរយៈពាក្យបណ្តឹងរបស់លោក Vid Cooler បានឲ្យដឹងថា ហេតុការណ៍ជម្លោះនោះ បានកើតឡើងនៅក្នុងហាងមួយកន្លែង ស្ថិតនៅក្នុងសង្កាត់ជ័យជំនះ ខណ្ឌដូនពេញ កាលពីថ្ងៃទី៦ ខែសីហា ឆ្នាំ២០២០មកម្ល៉េះ។
បើយោងតាមអ្វីដែល Vid Cooler បានសរសេរសារបង្ហោះតាមបណ្តាញសង្គមហ្វេសប៊ុកនោះ បានឲ្យដឹងថា ស្វាគមន៍លោក តារាល្បីៗ ទាំងប៉ុន្មានដួងនៅខាងក្រោមនេះ..! ។
លោកបញ្ជាក់ថា សូមលោកអញ្ជើញមកតុលាការ មើម្បីដោះស្រាយរឿងនេះ ខ្ញុំរង់ចាំនៅតុលាការ…!! មានភស្តុតាងនេះ រឿងស្អុយជាច្រើនដែលលោកត្រូវចូលខ្លួន…!! កុំគេចវេះ ព្រោះរឿងនេះ បើមិនដោះស្រាយ គឺវាជាប់ជាមួយអស់លោកមួយជីវិត…!!។ ចុងក្រោយ ខ្ញុំពិតជាសោកស្ដាយណាស់ ដែលពួកគាត់ជាបុគ្គលគំរូ ទៅកាន់ក្មេងជំនាន់ក្រោយ ដែលប្រព្រឹត្តអំពើហិង្សាដែលសង្គមមិនគាំទ្រ!។
ដោយឡែកជុំវិញករណីជម្លោះខាងលើនេះ បើតាមឯកសារពាក្យបណ្ដឹងដែល Vid Cooler បានបង្ហោះនោះបានឲ្យដឹងពីសាច់រឿងនៃដើមចមនោះថា ករណីហិង្សានេះ បានកើតឡើងកាលពីថ្ងៃទី៦ ខែសីហា ២០២០ នៅវេលាម៉ោង ៤ :០០ ដោយរូបលោក (Vid Cooler) បានទៅទទួលទានអាហារនៅហាងផ្ទះលេខ ២៥ E0 ផ្លូវលេខ ១៨៤ សង្កាត់ជ័យជំនះ ខណ្ឌដូនពេញ ដោយខាងលោកមានគ្នា២នាក់អង្គុយញ៉ាំស្រាបៀ។ ពេលនោះ លោកបានដើរទៅតុមួយផ្សេងដែលមានប្រុសឡា និងគ្នីគ្នា៤នាក់កំពុងញ៉ាំអាហារជុំគ្នាដែរ។
Vid Cooler បញ្ជាក់ថា លោកបានយកកែវទៅក្នុងបំណងសុំជល់កែវជាមួយភាគីប្រុសឡា ហើយពេលនោះ ប្រុសឡា បាននិយាយថា «ថ្ងៃនេះវាបង់លុយ» ហើយលោកបានហៅប្រុសឡា ចេញមកក្រៅដើម្បីនិយាយគ្នា ប៉ុន្តែពេលចេញដល់ខាងក្រៅ មិនទាន់បាននិយាយគ្នាផង ស្រាប់តែឈ្មោះ 4t5 ដែលលោកអះអាងថា ជាប្អូនរបស់ប្រុសឡា បានយកដបស្រាវាយលោក បណ្ដាលឲ្យរបួសដេរ៣០ថ្នេរ ឯអ្នកបង្កក៏បានគេចខ្លួនបាត់ទៅ។
ជាការកត់សម្គាល់ ពាក់ព័ន្ធបញ្ហាខាងលើនេះ គេនៅមិនទាន់បានដឹងនៅឡើយទេថា ភាគីទាំងពីរបានសម្រេចដោះស្រាយគ្នាយ៉ាងណានោះឡើយ ក្នុងពេលដែលហេតុការណ៍នេះបានកើតឡើងមកជាច្រើនខែមកហើយ ប៉ុន្តែលោក Vid Cooler ទើបតែបញ្ចេញឲ្យមហាជនបានដឹងនៅថ្ងៃទី២៦ ខែមករា ឆ្នាំ២០២១នេះប៉ុណ្ណោះ ៕
