ខេត្តមណ្ឌលគិរី៖ មន្រ្ដីជាន់ខ្ពស់ក្រសួងបរិស្ថាន បានថ្លែង ការបង្កើនមុខរបរថ្មីជូនប្រជាពលរដ្ឋ នៅក្នុងសហគមន៍ការពារព្រៃឈើ នឹងជួយឲ្យការអភិរក្សព្រៃឈើ ប្រកបដោយប្រសិទ្ធភាព។
នៅក្នុងដំណើរទស្សនកិច្ចសិក្សា នៅក្នុងដែនជម្រកសត្វព្រៃស្រែពក ខេត្តមណ្ឌលគិរី រៀបចំដោយក្រសួងបរិស្ថាន និង អង្គការ WWF ចាប់ពីថ្ងៃទី១៥-១៩ ខែមករា ឆ្នាំ២០២១ លោក នេត្រ ភក្ត្រា រដ្ឋលេខាធិការក្រសួងបរិស្ថាន បានថ្លែងថា ការបង្កើតមុខរបរថ្មីជូនដល់ប្រជាពលរដ្ឋ នៅក្នុងដែនការពារព្រៃឈើ នឹងធ្វើឲ្យការអភិរក្សព្រៃឈើមានប្រសិទ្ធភាព។
អ្នកនាំពាក្យក្រសួងបរិស្ថាន បានបញ្ជាក់ថា កាលពីមុនប្រជាពលរដ្ឋ រស់នៅជុំវិញតំបន់ការពារធម្មជាតិ និងតំបន់ការពារធម្មជាតិមួយចំនួន ភាគច្រើន ពួកគាត់ប្រកបមុខរបរ ជាអាទិ៍ ប្រមូលអនុផលព្រៃឈើ។ ប៉ុន្តែពួកគាត់ខ្លះបានចូលព្រៃកាប់ឈើ បរបាញ់សត្វ និងដាក់អន្ទាក់ចាប់សត្វព្រៃជាដើម។ ការធ្វើបែបនេះនឹងបំផ្លិចបំផ្លាញដល់ធនធានធម្មជាតិរបស់យើង។ ដូច្នេះដើម្បីការពារព្រៃឈើ និងសត្វព្រៃរបស់យើងឱ្យបានគង់វង្សនោះ មានតែការបង្កើតបង្កើតនូវមុខរបរថ្មីជូនដល់ប្រជាពលរដ្ឋ ហើយគាំទ្រផ្នែកបច្ចេកទេស និង បង្កើតនូវចំណូលសម្រាប់ពួកគាត់។
លោក សេង ទៀក ប្រធានអង្គការ WWF ប្រចាំកម្ពុជា បានថ្លែងថា អង្គការបានសហការជាមួយក្រសួងបរិស្ថានគាំទ្រលើតំបន់សហគមន៍តំបន់ការពារធម្មជាតិ ចំនួន១៨ នៅខេត្តមណ្ឌលគិរី ដើម្បីជួយកែប្រែជីវភាពរបស់ប្រជាពលរដ្ឋ។ ជាមួយគ្នានេះ អង្គការបានបណ្តុះបណ្តាលបច្ចេកទេស និងគាំទ្របង្កើតមុខរបរថ្មីដល់ពួកគាត់ផងដែរ។
លោកប្រធានអង្គការ WWF ប្រចាំកម្ពុជា បានបន្ថែមថា សហគមន៍ការពារធម្មជាតិអរបួនលើស្ថិតក្នុងតំបន់ជម្រកសត្វព្រៃស្រែពក គឺក្នុងមួយឆ្នាំ ពួកគាត់ប្រមូលបានអនុផលព្រៃឈើ រួមមាន ជ័រចុង ទឹកឃ្មុំ ផ្សិតប៉ក់ ផ្សិតក្ងោក ឫសឈើសម្រាប់ផ្សំថ្នាំ និងផលិតផលផ្សេងៗទៀត ដូចជាបន្លែធម្មជាតិជាដើម រកចំណូលបាន រហូតដល់៣២១លានរៀល ឬស្មើនឹងប្រហែលជាង៨ម៉ឺនដុល្លារអាមេរិក។
លោក ងីម ឡាប៉េ ជាកសិករគំរូ នៅសហគមន៍ការពារធម្មជាតិភូមិអរបួន ឃុំអរបួន ស្រុកកោះញែក ខេត្តមណ្ឌលគិរី បាននិយាយថា ការដាំបន្លែ ជួនកាលមានខុសមានត្រូវ។ ប៉ុន្តែវាមានចំណូលទៀងទាត់ ហើយវាបានតិច ឬច្រើនទៅតាមខែណាដាំបានល្អ ហើយគាត់អាចរកប្រាក់ចំណួលផ្គត់ផ្គង់គ្រួសារបានគ្រប់គ្រាន់។ របរនេះ គឺខុសពីរបររកឈើមួយថ្ងៃកាត់ មួយថ្ងៃកោរ ជួនកាល មួយខែលួចដឹកបានតែពីរជើង ហើយខកខាន ភ័យខ្លាចអាជ្ញាធរអនុវត្តច្បាប់ និង ជួបបញ្ហាជាច្រើនទៀតផង៕
