ខេត្តតាកែវ៖ សារាចរណែនាំរបស់សម្ដេចក្រឡាហោមសខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបញ្ជាក់ច្បាស់ម្ដងហើយម្ដងទៀតថាមិនអនុញ្ញាតឲ្យមានការជួលដីស្រែឲ្យទៅជនជាតិវៀតណាមធ្វើស្រែប្រាំងនោះជាដាច់ខាត។ប៉ុន្តែបណ្តាស្រុកខ្លះជាប់ព្រំដែនវៀតណាមនៃខេត្តតាកែវនៅតែបំពានសេចក្តីណែនាំរបស់សម្ដេចក្រឡាហោមម្ដងហើយម្ដងទៀត។
អាជ្ញាធរស្រុកកោះអណ្ដែត បុរីជលសារនិងអង្គរបុរីត្រូវគេរាយការណ៍ថាបានជួលដីស្រែប្រាំងរាប់សិបតាហើយទៅជនជាតិវៀតណាមចូលមកធ្វើស្រែប្រាំងដែលប្រការនេះការបំពាននិងគឺបំពានសេចក្តីណែនាំរបស់សម្ដេចក្រឡាហោមសខេង។ជនជាតិវៀតណាមខ្លះបានបោះតង់ធ្វើរោងនៅជាអចិន្ត្រៃយ៍តែម្ដងនិងខ្លះពេលល្ងាចវិលត្រឡប់ទៅប្រទេសគេវិញ។
មន្ត្រីនគបាលអន្តោប្រវេសន៍ខេត្តបង្ហើបឲ្យដឹងថា មានជនជាតិវៀតណាម ចូលមកធ្វើស្រែនារដូវប្រាំងលើទឹកដីក្នុងស្រុកបូរីជលសារ និងស្រុកកោះអណ្តែត ពិតប្រាកដមែន ដោយពួកគេទាំងនោះខ្លះបោះតង់សង់ជារោងស្នាក់នៅធ្វើស្រែ ខ្លះទៀតមិនបានធ្វើរោងស្នាក់នៅធ្វើនៅក្បែរដីស្រែដែលកំពុងបង្កបង្កើនផលនោះទេ គឺមកព្រឹក រួចត្រឡប់ទៅវិញល្ងាច។ ចំណែកស្រុកកោះអណ្តែត មានជនជាតិវៀតណាមធ្វើស្រែ តែពួកគេមានលិខិតអនុញ្ញាតិស្នាក់នៅក្នុងប្រទេសកម្ពុជាស្របច្បាប់ និងខ្លះក៏ចូលមកធ្វើរោង ដើម្បីស្នាក់នៅផងដែរ។
ចំពោះករណីមានការបែកធ្លាយជនជាតិវៀតណាមមកជួលដីធ្វើស្រែក្នុងស្រុកបូរីជលសារនេះ លោក ទុយ សុភ័ក្រ អភិបាលស្រុកបូរីជលសារ មិនអាចទាក់ទងសុំការបំភ្លឺបានទេ ដោយហៅទូរស័ព្ទចូលមិនមានអ្នកទទួល។
លោក ផាន ផល អធិការនគរបាលស្រុកបូរីជលសារ បានឲ្យដឹងថា រឿងនេះលោកមិនដឹងច្បាស់នោះទេ ហើយលោកក៏មិនជាប់ពាក់ព័ន្ធក្នុងរឿងជួលដីឲ្យវៀតណាមធ្វើស្រែប្រាំងនោះដែរ គឺមានឈ្មោះទាហានព្រំដែនម្នាក់ជាអ្នកធ្វើ។
រឿងរ៉ាវនៃការជួលដីស្រែទៅឲ្យជនជាតិវៀតណាមនៅជិតព្រំដែនក្នុងខេត្តតាកែវបានកើតឡើងជាញឹកញាប់ទោះបីជាក្រសួងមហាផ្ទៃបានណែនាំម្ដងហើយម្ដងទៀតយ៉ាងណាក៏ដោយ។គេរង់ចាំមើលថាតើថ្នាក់ដឹកនាំខេត្តតាកែវនឹងបណ្ដាស្រុកទាំងឡាយអ្នកបានជួលដីឲ្យជនជាតិវៀតណាមចូលមកធ្វើស្រែនោះបានអ្វីឆ្លើយតបជាមួយថ្នាក់ដឹកនាំក្រសួងមហាផ្ទៃ?
ចំពោះករណីនេះអភិបាលខេត្តតាកែវមិនអាចទាក់ទងដើម្បីសុំការបំភ្លឺបានទេនៅថ្ងៃអាទិត្យនេះ។
ដោយឡែកលោក សុខ ឥសាន ធ្លាប់មានប្រសាសន៍ថា, រាជរដ្ឋាភិបាលកម្ពុជាមានផែនការនិងអនុវត្តការអភិវឌ្ឍន៍តំបន់ព្រំដែនយូរមកហើយដើម្បីប្រែក្លាយឲ្យទៅជាព្រំដែនមិត្តភាពសាមគ្គីភាពនិងសហប្រតិបត្តិការយូរអង្វែង។
លោកបន្តថា រដ្ឋបានហាមមិនឲ្យប្រជាជនកម្ពុជាលក់ ជួលឬប្រវ៉ាស់ដីស្រែចម្ការទៅឲ្យជនជាតិបរទេសយូរមកហើយ៕
