បរទេស៖ បើតាមសារព័ត៌មាន CNBC បានផ្សាយ នៅថ្ងៃទី១៣ ខែមករា ឆ្នាំ២០២១ថា ក្រុមហ៊ុន Google បានសម្រេចបិទគណនី YouTube របស់ប្រធានាធិបតីអាមេរិក លោក ដូណាល់ ត្រាំ មិនអាចបង្ហោះបាន រហូតដល់ប្រធានាធិបតីថ្មីឡើងកាន់អំណាច។
ក្រុមហ៊ុន Google បានបញ្ជាក់ថា ខ្លួនបានបិទគណនី YouTube របស់លោក ដូណាល់ ត្រាំ ប្រធានាធិបតី មិនឲ្យបង្ហោះអ្វីកើត នៅក្នុងរយៈពេល៧ថ្ងៃ ដោយសារលោក ត្រាំ បានរំលោភលើបទបញ្ជារបស់ក្រុមហ៊ុន។ ក្រៅពីនេះ ក្រុមហ៊ុន (Google) ក៏បានសម្រេចមិនឲ្យ Channel ដែលមានអ្នក subscribed ចំនួន ២,៧៧លាននាក់មួយនេះ ទទួលការ comment ឬ comment អ្វីបានឡើយ។
ការផ្អាកគណនីជាបណ្តោះអាសន្ននេះ មានន័យថា គណនីរបស់ប្រធានាធិបតី លោក ដូណាល់ ត្រាំ និងវីដេអូដែលត្រូវបានបង្ហោះកន្លងមក (លើកលែងតែ content រំលោភគោលការណ៍) នឹងនៅតែមាននៅលើ YouTube ដដែល។ ប៉ុន្តែលោក ត្រាំ មិនអាចបង្ហោះអ្វីថ្មីទៀតបានឡើយ។
សូមជម្រាបថា ក្រុមហ៊ុន Google កាលពីល្ងាច ថ្ងៃទី១២ ខែមករា ឆ្នាំ២០២១ (ពេលវេលានៅកាលីហ្វរញ៉ា, អាមេរិក) បានបញ្ជាក់ថា «ក្រោយពេលត្រួតពិនិត្យមើល គឺឃើញមានការព្រួយបារម្ភយ៉ាងខ្លាំង អំពីលទ្ធភាព នៃការផ្ទុះអំពើហិង្សា ទើបយើងសម្រេចចិត្តលុបចេញនូវការបង្ហោះមាតិកា (content) របស់ Channel ឈ្មោះ Donald J. Trump ដោយសាររំលោភលើគោលការណ៍នានារបស់ក្រុមហ៊ុន។ ជាការឆ្លើយតបនឹងការព្រួយបារម្ភកំពុងតែបន្ត ចំពោះការផ្ទុះអំពីហិង្សានេះ ក្រុមហ៊ុនបានសម្រេចបិទ (Disable) កន្លែងបញ្ចេញមតិ (comment) របស់គណនី Donald Trump ដូចអ្វីដែលយើងធ្លាប់បានធ្វើ ចំពោះគណនីផ្សេងៗទៀត ដើម្បីរក្សាសុវត្ថិភាព ចំពោះការបញ្ចេញមតិយោបល់នេះ»។
សូមជម្រាបថា ក្រោយការផ្ទុះឡើងនូវអំពើហិង្សា នៅក្នុងវិមានកាពីតូល (រដ្ឋសភា) រដ្ឋធានីវ៉ាស៊ីតោន សហរដ្ឋអាមេរិក បានបណ្ដាលឲ្យក្រុមបាតុករចំនួន៤នាក់ស្លាប់ និងប៉ូលិសម្នាក់ស្លាប់ ទើបក្រុមហ៊ុនបណ្ដាសង្គមធំៗរបស់អាមេរិក បានសម្រេចបិទគណនីរបស់ប្រធានាធិបតីអាមេរិក លោក ដូណាល់ ត្រាំ ។ ក្រុមហ៊ុនបណ្ដាញសង្គមធំៗទាំងនោះ រួមមាន ក្រុមហ៊ុន Facebook , Twitter និងក្រុមហ៊ុន Google ៕