ខេត្តកំពង់ស្ពឺ៖ ជនសង្ស័យ៣នាក់ បានក្លែងបន្លំសញ្ញាបត្រវេជ្ជបណ្ឌិត ដែលបានយកទម្រង់តាមសញ្ញាបត្ររបស់សាកលវិទ្យាល័យវិទ្យាសាស្ត្រសុខាភិបាល ត្រូវបានក្រុមប្រឹក្សាគណៈគ្រូពេទ្យជាតិស្នើសុំការផ្ទៀងផ្ទាត់ពីសាកលវិទ្យាល័យវិទ្យាសាស្ត្រសុខាភិបាល។
ជនសង្ស័យទាំង៣នាក់ដែលក្លែងបន្លំនោះ ទី១មានឈ្មោះ សាយ សុវណ្ណ ទី២ឈ្មោះ ម៉ក់សុខជា និង ទី៣ឈ្មោះ ខា វ៉េងហួត។
បើតាមប្រភពព័ត៌មានបានឲ្យដឹងថា យោងតាមលិខិតរបស់លោកសាស្ត្រាចារ្យវេជ្ជបណ្ឌិត ធា គ្រុយ ប្រធានក្រុមប្រឹក្សាគណៈគ្រូពេទ្យជាតិ ជម្រាបមក លោកប្រធានក្រុមប្រឹក្សាគណៈគ្រូពេទ្យខេត្តកំពង់ស្ពឺ កាលពីថ្ងៃទី៣១ ខែធ្នូ ឆ្នាំ២០២០ កន្លងទៅនេះបានឲ្យដឹងថា ក្រោយពីមានការសង្ស័យចំពោះ «សញ្ញាបត្រវេជ្ជបណ្ឌិត» របស់ឈ្មោះ សាយ សុវណ្ណ ម៉ក់សុខជា និង ខា វ៉េងហួត ដែលបានយកទម្រង់តាមសញ្ញាបត្ររបស់សាកលវិទ្យាល័យវិទ្យាសាស្ត្រសុខាភិបាល , ក្រុមប្រឹក្សាគណៈគ្រូពេទ្យជាតិ បានស្នើសុំការផ្ទៀងផ្ទាត់ពីសាកលវិទ្យាល័យវិទ្យាសាស្ត្រសុខាភិបាល នៅថ្ងៃទី៣ ខែវិច្ឆិកា ឆ្នាំ២០២០ ដោយសាកលវិទ្យាល័យវិទ្យាសាស្ត្រសុខាភិបាល បានចេញលិខិតបញ្ជាក់ថា សញ្ញាបត្រវេជ្ជបណ្ឌិតរបស់អ្នកទាំង៣នេះ ពុំមែនជាសញ្ញាបត្រដែលចេញដោយសាកលវិទ្យាល័យវិទ្យាសាស្ត្រសុខាភិបាល ទេ។
ចំពោះករណីក្លែងបន្លំសញ្ញាបត្រវេជ្ជបណ្ឌិតនេះ ត្រូវបានប្រធានក្រុមប្រឹក្សាគណៈគ្រូពេទ្យជាតិ ណែនាំដល់ប្រធានក្រុមប្រឹក្សាគណៈគ្រូពេទ្យ ខេត្តកំពង់ស្ពឺ ចាត់វិធានការ ៤ ចំណុច រួមមាន៖ ១.ដកហូតសញ្ញាបត្រដើមរបស់លោក សាយ សុវណ្ណ ម៉ក់ សុជា និង ខា វ៉េងហួត ២.ធ្វើលិខិតជូនមន្ទីរសុខាភិបាល ខេត្តកំពង់ស្ពឺ ដើម្បីចាត់វិធានការ តាមផ្លូវច្បាប់ ដែលមានចែងក្នុងក្រមព្រហ្មទណ្ឌ ស្តីពី ការក្លែងបន្លំឯសារ។ ៣.ជូនដំណឹងទៅគណៈគិលាននុបដ្ឋាក និងគណៈវិជ្ជាជីវៈសុខាភិបាលដទៃទៀតដែរ បើមានការចាំបាច់ ដោយពួកគាត់ភាគច្រើនជាគិលានុបដ្ឋាក ហើយរមែងបានចុះបញ្ជីជាមួយគណៈគិលានុបដ្ឋាក។ ៤.ក្រោយមានវិធានការទាំងអស់ហើយ សូមលោកប្រធាន រៀបចំឲ្យមានរបាយការណ៍ត្រឡប់មកថ្នាក់ជាតិវិញ ដើម្បីគណៈគ្រូពេទ្យជាតិ រៀបចំផ្សព្វផ្សាយក្នុងគេហទំព័រ និង Facebook Page របស់គណៈគ្រូពេទ្យជាតិ។
គួររម្លឹកថា វិធានការខាងលើនេះ ត្រូវបានធ្វើឡើង ក្រុមប្រឹក្សាគណៈគ្រូពេទ្យជាតិ បានស្នើសុំការផ្ទៀងផ្ទាត់ពីសាកលវិទ្យាល័យវិទ្យាសាស្ត្រសុខាភិបាល នៅថ្ងៃទី០៣ ខែវិច្ឆិកា ឆ្នាំ២០២០។ សាកលវិទ្យាល័យ វិទ្យាសាស្ត្រសុខាភិបាល បានចេញលិខិតបញ្ជាក់ថា សញ្ញាបត្រវេជ្ជបណ្ឌិតរបស់អ្នកទាំង ៣នេះ ពុំមែនជាសញ្ញាបត្រ ដែលចេញដោយសាកលវិទ្យាល័យវិទ្យាសាស្ត្រសុខាភិបាលទេ ៕