រាជធានីភ្នំពេញ៖ រាជរដ្ឋាភិបាលកម្ពុជា បានសម្រេចចេញជាគោលការណ៍ ជ្រើសរើសយន្ដការភាពជាដៃគូ រវាងរដ្ឋ និងឯកជន លើការសាងសង់អាកាសយានដ្ឋានថា្នក់តំបន់ នៅលើទឹកដីខេត្តមណ្ឌលគិរី។
លោក ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរស៊ីវិល បានឲ្យដឹងថា គម្រោងសិក្សាអំពីលទ្ធភាព នៃការសាងសង់អាកាសយានដ្ឋានថ្មីនេះជិតចប់ហើយ។ ប៉ុន្ដែបើតាមការប៉ាន់ប្រមាណតម្លៃត្រួសៗ លើការស្ថាបនាអាកាសយានដ្ឋាន លំដាប់ 4C នេះ អាចនឹងត្រូវចំណាយថវិកា រហូតដល់១០០ លានដុល្លារអាមេរិក។
លោក ស៊ីន ចាន់សិរីវុត្ថា បានបញ្ជាក់ថា ទោះជាយ៉ាងណា នៅពេលនេះ អាជ្ញាធរអាកាសចរណ៍ស៊ីវិល ត្រូវពិភាក្សា និងពិគ្រោះយោបល់ អំពីនីតិវិធី ដែលត្រូវធ្វើ ហើយវាអាចចំណាយពេល ចន្លោះពី៦ទៅ៨ខែ ទើបដឹងថា រដ្ឋាភិបាលអាចចាប់ផ្តើមគម្រោងនៅពេលណា។
លោក ស៊ីន ចាន់សិរីវុត្ថា បានបន្ថែមថា ការពិភាក្សានេះត្រូវទាមទារលក្ខខណ្ឌតម្រូវការច្រើនសម្រាប់ឲ្យភាគីទាំងពីរ អនុវត្តការងារទៅបាន ថាភាគីឯកជនចង់បានអ្វី និងរដ្ឋមានគោលបំណងអ្វីខ្លះ។ ប៉ុន្ដែនៅឯកភាពគ្នារួចហើយ ទើបរដ្ឋាភិបាលធ្វើកិច្ចព្រមព្រៀងសម្បទាន ចាប់ផ្ដើមស្ថាបនាតែម្ដង។
បើតាមលិខិតរបស់ទីស្តីការណ៍គណៈរដ្ឋមន្ត្រី បានអនុញ្ញាតឲ្យរដ្ឋលេខាធិការដ្ឋានអាកាសចរណ៍ស៊ីវិលដឹកនាំ និងរៀបចំកិច្ចព្រមព្រៀងក្របខ័ណ្ឌជាមួយក្រុមហ៊ុន Powerchina International Group សាងសង់ព្រលានថ្មី តាមនីតិវិធីជាធរមាន ដូចបានអនុវត្តកន្លងមកសម្រាប់គម្រោងផ្លូវល្បឿនលឿន ពីភ្នំពេញ-ព្រះសីហនុ និងភ្នំពេញ-បាវិត។
លោក ស្វាយ សំអ៊ាង អភិបាលខេត្តមណ្ឌលគិរី ធ្លាប់បានបញ្ជាក់ កាលពីខែកក្កដា ឆ្នាំ២០២០ថា អាជ្ញាធរខេត្តត្រៀមទុកដីទំហំ៦០០ ហិកតារ សម្រាប់សាងសង់អាកាយានដ្ឋានថ្មីរួចហើយ។ រីឯតំបន់នោះមានចម្ងាយប្រហែល២០គីឡូម៉ែត្រ ពីក្រុងសែនមនោរម្យ ហើយតំបន់នោះក៏ជាទីតាំងអាកាសយានដ្ឋានចាស់ ដែលត្រូវបានអភិវឌ្ឍទៅជាសួនសាធារណៈផងដែរ។
ក្រោយពេលរាជរដ្ឋាភិបាលកម្ពុជា កាលពីពេលថ្មីៗនេះ បានសម្រេចឱ្យក្រុមហ៊ុន Powerchina International Group សិក្សាទៅលើគម្រោងសាងសង់អាកាសយានដ្ឋានថ្នាក់តំបន់ នៅខេត្តមណ្ឌលគិរី នោះមក អ្នកជំនាញវិស័យដីធ្លី បានមើលឃើញថា ដំណើរចាប់ផ្តើមរបស់រដ្ឋាភិបាល នៅពេលនេះ ជាសញ្ញាវិជ្ជមានមួយ សម្រាប់ពេលអនាគត។ ជាមួយគ្នានេះ ហាងឆេងដី នៅខេត្តមណ្ឌលគិរី អាចនឹងឡើងថ្លៃខ្ពស់ផងដែរ៕
