ខេត្តស្វាយរៀង៖ ក្រុមការងារមន្ទីរកសិកម្ម រុក្ខាប្រមាញ់ និងនេសាទខេត្តស្វាយរៀង ចុះពិនិត្យធ្វើបច្ចុប្បន្នភាព ដើម្បីស្វែងរកទិន្នន័យការប្រមូលផលរបស់កសិករចិញ្ចឹមត្រី និងកង្កែប ចំនួន៥៤គ្រួសារ នៅស្រុកស្វាយជ្រំ កាលពីថ្ងៃទី១០ ខែធ្នូ ឆ្នាំ២០២០ នៅភូមិឃួច ឃុំក្រោលគោ ។
មន្ត្រីបច្ចេកទេសការិយាល័យផលិតកម្ម និងបសុព្យាបាល និងមន្ត្រីបច្ចេកទេសខណ្ឌរដ្ឋបាលជលផល ចុះពិនិត្យធ្វើបច្ចុប្បន្នភាព ដើម្បីស្វែងរកទិន្នន័យការប្រមូលផលរបស់កសិករចិញ្ចឹមត្រី និងកង្កែប ចំនួន៥៤គ្រួសារ ដែលលោករដ្ឋមន្ត្រីក្រសួងកសិកម្ម បានផ្តល់កូនត្រី កូនកង្កែប តង់ ចំណី វីតាមីន កាលថ្ងៃទី ១៥ ខែសីហា ឆ្នាំ២០២០ កន្លងមក នៅភូមិខាងលើ។
លទ្ធផលនៃការប្រមូលផលរបស់កសិករ រួមមាន៖ គ្រួសារចិព្ចឹាមត្រីចំនួន ៣២គ្រួសារ ប្រមូលផលសរុប បានចំនួន ៣២០០គីឡូក្រាម ។ គ្រួសារចិញ្ចឹមកង្កែប ចំនួន២២គ្រួសារ ប្រមូលផលសរុប ចំនួន១៧៦០គីឡូក្រាម ។
ចំពោះផលត្រី ប្រជាកសិករបានឱ្យដឹងថា គាត់បានយកធ្វើការកែឆ្នៃ ធ្វើប្រហុក ត្រីលាក់ ហូបបណ្តើរៗផង និងលក់ចេញផង។
ប្រជាកសិករបានបន្តទៀតថា ចំពោះគ្រួសារចិញ្ចឹមត្រីភាគច្រើន គាត់ចង់ចិញ្ចឹមបន្តទៀតដែរ តែគាត់ហូបមិនទាន់អស់ ហើយខ្លះទៀតគាត់ថាមិនមានលុយទិញកូនត្រី និងចំណីទេ ។
ជាមួយគ្នានោះ ក្រុមការងារមន្ទីរកសិកម្មខេត្ត បានណែនាំឱ្យប្រជាកសិករដាក់កូនត្រីចិញ្ចឹមបន្តទៀត ដើម្បីបានហូបពេញមួយឆ្នាំ ។
ចំណែកផ្នែកផលិតកម្មនិងបសុព្យាបាល បានផ្តល់ជំនួយបច្ចេកទេសចិញ្ចឹមគោបំប៉ន ផ្សព្វផ្សាយជំងឺផ្តាសាយបក្សី តាមរយៈផ្ទាំងរូបភាព។
ចំណែកកសិករឈ្មោះ នាង សេង បានទទួលអំណោយមេគោចំនួន០១ក្បាល ពីលោកវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ខណៈកសិករឈ្មោះ វ៉ា សា វន់ ទទួលអំណោយទូរភ្ញាស់ចំនួន០២គ្រឿងផងដែរ៕
