ប្រទេសថៃ៖ ក្រោយពីមានមនុស្សយ៉ាងតិច ៥៥នាក់បានរងរបួស ក្នុងនោះមាន ៦នាក់បានរងរបួសដោយគ្រាប់កាំភ្លើង ក្នុងការប៉ះទង្គិចគ្នាដ៏ខ្លាំងក្លានៅជិតរដ្ឋសភាកាលពីយប់មុន អាជ្ញាធរថៃកំពុងវែកមុខជនទីបី ដែលបានប្រើកាំភ្លើងបាញ់ទៅលើក្រុមអ្នកតវ៉ាប្រឆាំងរដ្ឋាភិបាលទាំងនោះ។ នេះបើតាមការចុះផ្សាយដោយកាសែតបាងកកប៉ុស្តិ៍ នៅថ្ងៃទី១៩ ខែវិច្ឆិកា។
ការប៉ះទង្គិចគ្នាដ៏ខ្លាំងក្លានៅជិតរដ្ឋសភារវាង ក្រុមអ្នកតវ៉ាប្រឆាំងរដ្ឋាភិបាល និងប៉ូលិស គេបានរកឃើញមនុស្សចំនួន ៦នាក់ បានរងរបួសដោយសារគ្រាប់កាំភ្លើង។ ភ្លាមៗ ក្រុមអ្នកតវ៉ាបានធ្វើការប្រមូលផ្តុំគ្នា ដើម្បីធ្វើការឡោមព័ទ្ធទីបញ្ជាការនគរបាលជាតិថៃ។
នៅក្នុងពេលវេលាដ៏តឹងតែងនោះ ហ្វូងមនុស្សដែលពេញដោយកំហឹងបានស្រែកជេរប្រមាថ និងបាញ់កាំភ្លើងទឹកទៅលើក្រុមមន្ត្រី ដែលត្រូវបានរារាំងនៅខាងក្នុងបរិវេណខាងក្រោយទ្វារដែក និងរនាំងបន្លាលួស ខណៈដែលអ្នកផ្សេងទៀតបានបិទច្រកចូលសំខាន់មួយ ទៅកាន់បរិវេណស្នងការនគរបាលថៃដោយប្រើថ្នាំពណ៌ និងគំនូរប្រឆាំងនឹងរាជានិយម និងប្រឆាំងរដ្ឋាភិបាល។
ការប្រមូលផ្តុំគ្នានេះត្រូវបានគេហៅថា ជាការសងសឹកចំពោះក្រុមនគរបាលដែលប្រើដៃធ្ងន់ ក្នុងការបំបែកក្រុមអ្នកតវ៉ានៅក្បែរអគារក្បែររដ្ឋសភាកាលពីថ្ងៃអង្គារ។ ក្រុមបាតុករបានប្រមូលផ្តុំគ្នាដោយស្ងប់ស្ងាត់ ដើម្បីជំរុញការធ្វើកំណែទម្រង់ ខណៈសមាជិកសភាបានពិភាក្សាអំពី ការធ្វើវិសោធនកម្មរដ្ឋធម្មនុញ្ញនៅក្នុងអគារសភាមាត់ទន្លេ។
គួរជម្រាបថា ក្រោយពីជជែកដេញដោលគ្នាអស់រយៈពេលពីរថ្ងៃ សមាជិកសភាថៃបានបដិសេធសំណើរលើសេចក្តីព្រាងវិសោធនកម្មច្បាប់រដ្ឋធម្មនុញ្ញដែលស្នើឡើងដោយក្រុមអ្នតវ៉ាប្រឆាំងរដ្ឋាភិបាល ដែលធ្វើឱ្យក្រុមបាតុករទាំងនោះគ្មានជំរើសផ្សេងក្រៅពីធ្វើការតវ៉ាតាមដងផ្លូវបន្តទៀតនោះទេ ៕