រដ្ឋធានីប៉ារីស៖ ប៉ូលិសបារាំង បានឲ្យដឹងថា កាលពីថ្ងៃទី២៩ ខែតុលា ឆ្នាំ២០២០ មានការវាយប្រហារ ដោយអំពើភេរវកម្ម ទៅលើមនុស្សនៅក្នុងទីក្រុងណៃស៍ ដោយបានបណ្ដាលឲ្យមនុស្សយ៉ាងហោចណាស់ចំនួន៣នាក់ស្លាប់ និងជាច្រើននាក់ផ្សេងទៀតរងរបួស។
សារព័ត៌មាន NBC news បានផ្សាយ តាមការដកស្រង់ពីប៉ូលិសបារាំង ថា នៅក្នុងអំពើវាយប្រហារភេរវកម្មនោះ មានមនុស្ស៣នាក់ស្លាប់ និងមនុស្សជាច្រើននាក់ផ្សេងទៀត រងរបួស។ ភេរវករបានប្រើប្រាស់កាំបិតដេញចាក់ប្រហារទៅលើពលរដ្ឋ ហើយជនដៃដល់ម្នាក់ ត្រូវបានប៉ូលិសឃាត់ខ្លួន។
លោក Christian Estrosi អភិបាលក្រុង បានសរសេរ នៅលើបណ្តាញសង្គម Twitter ថា ការវាយប្រហារដោយកាំបិតនេះ បានកើតឡើង នៅជិតព្រះវិហារ Notre Dame កាលពីវេលាម៉ោង៩ និង១០នាទីព្រឹក(ម៉ោងក្នុងតំបន់) ហើយប៉ូលិសបានចុះទៅដល់កន្លែងកើតហេតុ និងបានចាប់ជនដៃដល់ម្នាក់ផងដែរ។ ជាមួយគ្នានេះ លោកអភិបាលក្រុងបានចាត់ទុកការវាយប្រហារនេះ ជាអំពើភេរវកម្ម។
ជាមួយគ្នានេះដែរ លោក Gerald Darmanin រដ្ឋមន្ត្រីក្រសួងមហាផ្ទៃបារាំង បានប្រកាសថា លោកបានកោះប្រជុំជាបន្ទាន់ ស្តីអំពីការវាយប្រហារខាងលើ។ រីឯកម្លាំងប៉ូលិសជំនាញក៏បាន និងកំពុងតែស្រាវជ្រាវ អំពីការវាយប្រហារខាងលើផងដែរ។
ដោយឡែក ប្រព័ន្ធផ្សព្វផ្សាយក្នុងតំបន់ បានឲ្យដឹងថា មានស្នូរកាំភ្លើង នៅសង្កាត់ Notre-Dame ក្នុងទីក្រុងណៃ៍ស៍ កាលពីវេលាម៉ោង៩ព្រឹក។ ហេតុការណ៍ថ្មីនេះ បានកើតឡើង រំលងតែ១៣ថ្ងៃ ក្រោយការចាប់អារក.លើគ្រូបង្រៀនបារាំងម្នាក់ ឈ្មោះ Samuel Paty បង្កឡើងដោយភេរវករអ៊ិស្លាម កាលពីថ្ងៃទី១៦ ខែតុលា ឆ្នាំ២០២០។ ជាមួយគ្នានេះ លោក ម៉ាក្រុង រដ្ឋាភិបាលប្រធានាធិបតី បារាំង បានចាត់ទុកថា នេះជាសកម្មភាពវាយប្រហាររបស់ក្រុមភេរវករ៕