រាជធានីបាងកក៖ រហូតមកដល់ថ្ងៃទី១៧ ខែតុលា ឆ្នាំ២០២០ ប៉ូលិសបានអនុវត្ដច្បាប់ដាក់ប្រទេសក្នុងគ្រាអាសន្ន បង្កឲ្យមានការប៉ះទង្គិចគ្នា ជាមួយនឹងក្រុមបាតុករ ដោយបណ្ដាលឲ្យមានមនុស្សជាច្រើននាក់ រងរបួស ក្នុងនោះមានប៉ូលិសចំនួន៤នាក់ និងក្រុមបាតុករចំនួន៣នាក់ផងដែរ។
បើតាមមជ្ឈមណ្ឌល Erawan នៃរដ្ឋបាលទីក្រុងបាងកក បានឲ្យដឹង នៅថ្ងៃសៅរ៍ (ទី១៧) នេះថា ប៉ូលិសបានប្រើប្រាស់រថយន្ដបាញ់ទឹក ដើម្បីបំបែកហ្វូងបាតុករ ទាមទារឲ្យធ្វើវិសោធនកម្មរដ្ឋធម្មនុញ្ញ និងធ្វើកំណែទម្រង់របបរាជានិយម។ ការបង្រ្កាបនេះ នាំឲ្យមានការប៉ះទង្គិចគ្នា រវាងប៉ូលិស និងក្រុមបាតុករ។ ប៉ុន្ដែនៅក្នុងហេតុការណ៍ហិង្សានេះ បានបណ្ដាលឲ្យប៉ូលិស៤នាក់រងរបួស ក្នុងចំណោមអ្នករងរបួសទាំងអស់ចំនួន៧នាក់។
បើតាមសារព័ត៌មានថៃ The Nation បានផ្សាយថា នៅក្នុងការប៉ះទង្គិចគ្នានេះ បានបង្កឲ្យមានមនុស្ស៧នាក់រងរបួស ហើយប៉ូលិសថៃដែលរងរបួសទាំង៤នាក់នោះ ត្រូវគេបញ្ជូនទៅព្យាបាល នៅក្នុងមន្ទីរពេទ្យប៉ូលិស ( Police General Hospital) នៅក្នុងទីក្រុងបាងកក។ ដោយឡែកក្រុមបាតុករ៣នាក់ដែលរងរបួសដែរនោះ ក៏ត្រូវបានបញ្ជូនទៅព្យាបាល នៅក្នុងមន្ទីរពេទ្យរដ្ឋ និងឯកជន។
ប្រភពព័ត៌មានដដែលបានបន្ដថា ប៉ូលិសបានប្រើប្រាស់រថយន្ដពន្លត់អគ្គិភ័យ បាញ់ទឹកបង្ក្រាបទៅលើក្រុមបាតុករគាំទ្រលទ្ធិប្រជាធិបតេយ្យ កាលពីល្ងាច ថ្ងៃទី១៦ ខែតុលា ដើម្បីបណ្ដេញពួកគេ ចេញពីទីលាន Pathumwan ។ នៅក្នុងការបង្រ្កាបនោះ ប៉ូលិសមិនប្រើឧស្ម័នបង្ហូរទឹកភ្នែកនោះទេ ប៉ុន្តែប៉ូលិសបានប្រើប្រាស់សារធាតុគីមីម្យ៉ាង អាចបណ្តាលឱ្យមានបញ្ហាខ្លះៗនៅដល់ស្បែក នៅពេលត្រូវនឹងទឹកនោះ តែមិនជាបញ្ហាអ្វីធ្ងន់ធ្ងរនោះឡើយ។
ក្រោយពេលក្រុមនិស្សិត និងអ្នកគាំទ្រលទ្ធិប្រជាធិបតេយ្យ បាននាំគ្នាធ្វើបាតុកម្ម អស់រយៈពេលប៉ុន្មានខែចុងក្រោយនេះ លោក ប្រាយុទ្ធ ចាន់អូចា នាយករដ្ឋមន្រ្ដីថៃ កាលពីវេលាម៉ោង៤ព្រឹក ថ្ងៃទី១៥ ខែតុលា បានចេញបទបញ្ជាមួយ ដាក់ប្រទេសក្នុងគ្រាអាសន្ន។ បទបញ្ជានេះ ទើបនាំឲ្យមានការបង្រ្កាបទៅលើក្រុមបាតុករ។ ជាមួយគ្នានេះដែរ លោកនាយករដ្ឋមន្រ្ដីថៃ បានច្រានចោលការទាមទាររបស់ក្រុមបាតុករ ជំរុញឲ្យលោកចុះចេញពីតំណែង ហើយលោកប្ដេជ្ញានៅតែកាន់តំណែងនេះបន្ដទៀត៕
