ខេត្តព្រះសីហនុ ៖ កម្លាំងនគរបាលខេត្តព្រះសីហនុបានឃាត់ខ្លួនជនសង្ស័យម្នាក់ពាក់ព័ន្ធករណីឃាតកម្មគិតទុកជាមុនដែលប្រតិបត្តិការខាងលើបានធ្វើឡើងកាលពីវេលាម៉ោង០៤និង០០នាទីរសៀល ថ្ងៃទី២៣ ខែសីហា ឆ្នាំ២០២០ ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុបានឱ្យដឹងថា ជនសង្ស័យឈ្មោះ ថៃ រ៉េត (ហៅគុន) ភេទប្រុស អាយុ៣៧ឆ្នាំ មុខរបរកម្មករ មានស្រុកកំណើត ស្រុកថ្មគោល ខេត្តបាត់ដំបង បច្ចុប្បន្នរស់នៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ ត្រូវឃាត់ខ្លួនពីបទឃាតកម្មគិតទុកជាមុន ដែលបានប្រព្រឹត្តកាលពីថ្ងៃទី១៥ ខែសីហា ឆ្នាំ២០២០ វេលាម៉ោងប្រហែល៩និង០០នាទី ស្ថិតនៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ ទៅលើជនរងគ្រោះឈ្មោះ ទូច ចក់ អាយុ៣១ឆ្នាំ មុខរបរកម្មករ មានស្រុកកំណើតភូមិចម្ការខ្នុរ ឃុំកែវផុស ស្រុកស្ទឹងហាវ បច្ចុប្បន្នរស់នៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ ។
លោកស្នងការបានបន្តថា តាមការសាកសួរជនសង្ស័យបានឆ្លើយថា ខ្លួនខឹងជនរងគ្រោះជេរម៉ែជាយូរមកហើយ រហូតនៅថ្ងៃទី១៥ សីហា ទើបខ្លួនបានផឹកស៊ីជាមួយជនរងគ្រោះបន្ទាប់មកបានដើរតាមពីក្រោយជនរងគ្រោះហើយមានឱកាសក៏យកដៃគ្រៀក.កជនរងគ្រោះពីក្រោយជាប់ ហើយយកខ្សែក្រវ៉ាត់រឹត.កជនរងគ្រោះរហូតដល់ស្លាប់តែម្ដង ។ បច្ចុប្បន្នជនសង្ស័យត្រូវបានកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងខេត្តព្រះសីហនុ ៕
ដោយ ៖ សំណាង
