រដ្ឋកាលីហ្វ័រញ៉ា ៖ នាយកដ្ឋានការពារព្រៃឈើ និងពន្លត់អគ្គីភ័យប្រចាំរដ្ឋកាលីហ្វ័រញ៉ាបាននិយាយថា ភ្លើងឆេះព្រៃកំពុងបន្តរាលដាលដល់ផ្នែកមួយចំនួននៃរដ្ឋកាលីហ្វ័រញ៉ាកាលពីថ្ងៃសៅរ៍ដែលបង្កឡើងដោយបម្រែបម្រួលអាកាសធាតុ និងមានរន្ទះបាញ់ពេលភ្លៀងបាន និងកំពុងវាយប្រហារដល់សហគមន៍កាន់តែខ្លាំង ។ នេះបើយោងតាមប្រភពពីទីភ្នាក់ងារសារព័ត៌មាន Reuters ដែលបានចេញផ្សាយនាព្រឹក ថ្ងៃទី២៣ ខែសីហា ឆ្នាំ២០២០ នេះ ។
នាយកដ្ឋានការពារព្រៃឈើ និងពន្លត់អគ្គីភ័យប្រចាំរដ្ឋកាលីហ្វ័រញ៉ាបានឱ្យដឹងថា ភ្លើងឆេះព្រៃនេះបានសម្លាប់មនុស្សចំនួន៦នាក់ និងបានដុតបំផ្លាញអគារជិត៧០០កន្លែង ចាប់តាំងពីពេលមានព្យុះរន្ទះកាលពីសប្តាហ៍មុនរួចមក ។ ទីភ្នាក់ងារនេះបាននិយាយកាលពីថ្ងៃសៅរ៍ថា ជាមួយគ្នានេះដែរអគ្គិភ័យបានដុតបំផ្លាញព្រៃជិតមួយលានហិកតា ។
តំបន់ដែលត្រូវភ្លើងឆេះព្រៃខាងលើនេះដែលកំពុងគំរាមកំហែងយ៉ាងខ្លាំងមានតំបន់សានហ្វ្រានស៊ីស្កូ, តំបន់ព្រៃក្បែរសាកលវិទ្យាល័យ កាលីហ្វ័រញ៉ា នៅសាន់តាក្លូស និងតំបន់ដ៏ធំមួយរវាងទីក្រុងសាន់ហ្វ្រាន់ស៊ីស្កូ និងរដ្ឋធានីសាក្រាម៉ង់តូ ។
យោងតាមសេចក្តីថ្លែងការរបស់សេតវិមានបានឱ្យដឹងដែរថា កាលពីថ្ងៃសៅរ៍កន្លងទៅនេះលោកប្រធានាធិបតីអាមេរិក ដូណាល់ ត្រាំ បានប្រកាសថា ៖«ភ្លើងឆេះព្រៃនេះគឺជាគ្រោះមហន្តរាយដ៏ធំមួយ» ។
ក្រុមមន្ត្រីពន្លត់អគ្គីភ័យច្រើនជាង១៤.០០០នាក់ត្រូវបានដាក់ពង្រាយទៅកាន់តំបន់ដែលរងការវាយប្រហារដើម្បីអន្តរាគមន៍ពន្លត់កុំឱ្យមានការឆេះរាលដាលកាន់តែខ្លាំងបន្តទៀត ចំណែកប្រជាជនដែលងាយរងគ្រោះត្រូវបានក្រុមជួយសង្គ្រោះជម្លៀសចេញជាបណ្តោះអាសន្ន ៕
ប្រភព ៖ Reuters , ដោយ ៖ សំណាង