រាជធានៅភ្នំពេញ ៖ នៅរសៀលថ្ងៃទី១០ ខែកក្កដា ឆ្នាំ២០២០នេះ លោក លី សុខលេង ចៅក្រមជំនុំជម្រះសាលាដំបូងរាជធានីភ្នំពេញ និងលោក សាយ ណូរ៉ា ជាតំណាងអយ្យការបាន សម្រេចប្រកាសសាលក្រមផ្តន្ទាទោសជនជាប់ចោទចំនួន៣នាក់ រួមមាន ៖
ទី១.ឈ្មោះ ប៉ុក ស្រីល័ក្ខ ភេទស្រី ជនជាតិខ្មែរមុខរបរលក់ដូរ ។
ទី២.ឈ្មោះ យុន ស្រីនូ ភេទស្រី ជនជាតិខ្មែរ មុខរបរលក់ដូរ ម្នាក់ៗ២០ឆ្នាំ ពិន័យម្នាក់ៗ ៤០លានរៀលបង់ចូលថវិការដ្ឋ ពីបទជួញដូរ ដឹកជញ្ជូនដោយខុសច្បាប់នូវសារធាតុញៀន ។
និងទី៣. ឈ្មោះ NDUKWU JONATHAN CHUKWUJEKWU ភេទប្រុស អាយុ២៦ឆ្នាំ ជនជាតិនីហ្សេរីយ៉ា មុខរបរកីឡាករបាល់ទាត់ ដាក់ពន្ធនាគារ អស់មួយជីវិត ពិន័យ១០០លានរៀល បង់ចូលថវិការដ្ឋ ។
ក្រោមការចោទប្រកាន់ពីបទជួញដូរ រក្សាទុក ដឹកជញ្ជូនដោយខុសច្បាប់នូវសារធាតុញៀន ប្រព្រឹត្តនៅសង្កាត់វាលវង់ខណ្ឌ៧ មករា កាលពីថ្ងៃទី១១ ខែវិច្ឆិកា ពាក់ព័ន្ធករណីលាក់គ្រឿងញៀនជិត៦គីឡូ ដាក់ក្នុងធុងបាស់១គ្រឿង គ្រោងនាំទៅប្រទេស វៀតណាម ។
សូមជម្រាបថា កាលពីថ្ងៃទី១១ វិច្ឆិកា ២០១៩ កម្លាំងជំនាញ(ក៥) នៃមន្ទីរប្រឆាំងបទល្មើសគ្រឿងញៀនដឹកនាំដោយលោក សាន សុទ្ធី នាយករងមន្ទីរសហការជាមួយក្រុមហ៊ុនដឹកជញ្ជូនអ្នកដំណើរ ដានដាន អិចប្រេសបើស ដឹកនាំសម្របសម្រួលពីលោក ស៊ិត វណ្ណៈ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញបានត្រួតពិនិត្យកញ្ចប់បញ្ញើ មានភាពមិនប្រក្រតីមួយ ដែលផ្ញើពីរាជធានីភ្នំពេញ ទៅទីក្រុងហូជីមិញ ប្រទេសវៀតណាម ។
ការប្រតិបត្តិការនេះធ្វើឡើងនៅក្រុមហ៊ុន ដានដាន ស្ថិតនៅសង្កាត់វាលវង់ ខណ្ឌ៧មករា ដោយរកឃើញសារធាតុញៀនប្រភេទមេតំហ្វេតាមីន (ICE) ៦កញ្ចប់ធំ ស្មើនឹង ៥,៨៩៥.៨២ក្រាម ដែលបង្កប់នៅក្នុងធុងបាស់ធំ ១គ្រឿង ។
បន្ទាប់មកសមត្ថកិច្ចជំនាញបានបន្តការស៊ើបអង្កេត ដោយកំណត់បានមុខសញ្ញាពាក់ព័ន្ធ រហូតឈានទៅចាប់ខ្លួនជនសង្ស័យចំនួន ៣នាក់ ដែលមានឈ្មោះ ប៉ុក ស្រីល័ក្ខ ភេទស្រី ជនជាតិខ្មែរមុខរបរលក់ដូរ (អ្នកដឹកជញ្ជូនគ្រឿងញៀនឆ្លងដែន), ឈ្មោះ យុន ស្រីនូ ភេទស្រី ជនជាតិខ្មែរ មុខរបរលក់ដូរ (អ្នកដឹកជញ្ជូនគ្រឿងញៀនឆ្លងដែន) និងឈ្មោះ NDUKWU JONATHAN CHUKWUJEKWU ភេទប្រុស ជនជាតិនីហ្សេរីយ៉ា មុខរបរកីឡាករបាល់ទាត់ (មេខ្លោងដឹកជញ្ជូនគ្រឿងញៀនឆ្លងដែន) ។
នៅថ្ងៃដដែលនោះ សមត្ថកិច្ចបានបន្តឆែកឆេរផ្ទះជួលរបស់ឈ្មោះ NDUKWU JONATHAN CHUKWUJEKWU ភូមិសន្សំកុសល សង្កាត់បឹងទំពុន ខណ្ឌមានជ័យ ដោយរកឃើញវត្ថុតាងមួយចំនួនទៀត រួមមាន ៖ កញ្ឆាក្រៀម ៩ក្រាម, ជញ្ជីងថ្លឹង១គ្រឿង, ម៉ាស៊ីនបាញ់ទឹក ៨គ្រឿង, ម៉ាស៊ីនបូមធូលី ១គ្រឿង, ធុងបាស់ ១គ្រឿង,ទូរស័ព្ទ ៣គ្រឿង និងលិខិតឆ្លងដែន ៣ ក្បាល ។ បើសរុបវត្ថុតាងគ្រឿងញៀន ដែលចាប់បាន មានមេតំហ្វេតាមីន (ICE) ចំនួន ៥ ៨៩៥,៨២ ក្រាម និងកញ្ឆាក្រៀម ៩ ក្រាមបន្ថែមទៀត ៕