រាជធានីភ្នំពេញ ៖ នៅល្ងាចថ្ងៃទី២ កក្កដា ២០២០នេះ បើយោងតាមហ្វេសប៊ុកផ្លូវការរបស់លោក ផែង វណ្ណៈ បានធ្វើលិខិតសុំទោសលោកជំទាវ ឡោក ខេង ដែលជាតំណាងរាស្ត្រមណ្ឌលភ្នំពេញ ជាសាធារណៈហើយ ។
សូមជម្រាបថា កាលពីថ្ងៃទី៣០ មិថុនា លោក ផែង វណ្ណៈ បានបង្ហោះសារថា «ខ្ញុំបានបំភ្លឺជូនតំណាងអយ្យការអមសាលាដំបូងរាជធានីភ្នំពេញរួចហើយ ។ បន្ទាប់ពីបានឃើញពាក្យបណ្តឹងរបស់លោកជំទាវ ឡោក ខេង ទើបខ្ញុំដឹងថា មានពាក្យសំដីខ្ញុំខ្លះ និយាយលើស ដែលនាំអោយប៉ះពាល់ដល់កិត្តិយសលោកជំទាវ ។ ខ្ញុំនឹងធ្វើលិខិតសុំទោសលោកជំទាវ ជាសាធារណៈ នៅថ្ងៃស្អែក ចំពោះកំហុសឆ្គងខ្លះរបស់ខ្ញុំ ។ សូមអរគុណបងប្អូនទាំងអស់គ្នា ដែលបារម្ភពីខ្ញុំ ខ្ញុំមិនអីទេ» ។
គួររម្លឹកផងដែរថា សូមបញ្ជាក់ថា កាលពីថ្ងៃទី០១ ខែមិថុនា ឆ្នាំ២០២០ លោក អ៊ុ សុភក្តិ ព្រះរាជអាជ្ញារងអមសាលាដំបូងរាជធានីភ្នំពេញ បានចេញដីកាកោះហៅលោក ផែង វណ្ណៈ ឲ្យចូលបំភ្លឺនៅវេលាម៉ោង២ និង៣០នាទី រសៀលថ្ងៃទី៣០ ខែមិថុនា ឆ្នាំ២០២០ នេះ ដើម្បីសាកសួរពីដំណើររឿង «បណ្តឹងរបស់លោកស្រី ឡោក ខេង ចុះថ្ងៃទី២១ ខែមេសា ឆ្នាំ២០២០ ដែលប្តឹងលោកពីបទ ញុះញង់អោយមានការរើសអើង , បរិហារកេរ្តិ៍ជាសាធារណៈ និងបទ ជេរប្រមាថជាសាធារណៈ» ។
ការប្តឹងនេះ កើតឡើយក្រោយពេលលោក ផែង វណ្ណៈ បានផ្សាយព័ត៌មាន អំពីក្រុមលួចលក់ដីប្រពលរដ្ឋទំហំជាង២ហិកតា នៅភូមិសំរោងខាងត្បូង សង្កាត់សំរោង ខណ្ឌព្រែកព្នៅ ។ មេខ្លោងលួចលក់ដីឈ្មោះឡុង ដារា ត្រូវបានសមត្ថកិច្ចចាប់ខ្លួនបញ្ជូនទៅអយ្យការអមសាលាដំបូងរាជធានី ចាត់ការតាមផ្លូវច្បាប់ និងត្រូវបានចៅក្រមចេញដីកាឃុំខ្លួនដាក់ពន្ធនាគាររួចហើយ ៕