ខេត្តកំពត ៖ ដំណាក់កាលជំងឺកូវីដ១៩រាតត្បាតនេះ ប្រជាពលរដ្ឋដែលធ្លាក់ក្នុងស្ថានភាពក្រីក្រ ប្រមាណជាជិត៣,០០០គ្រួសារ នៅខេត្តកំពត បានទទួលប្រាក់ជំនួយឧបត្ថម្ភពីរាជរដ្ឋាភិបាលកម្ពុជា ។
លោក មឿង គង្គា ប្រធានមន្ទីរផែនការខេត្តកំពត បានបញ្ជាក់ថា តាមរយៈការធ្វើជំរឿន ស្តីពីប្រជាពលរដ្ឋដែលធ្លាក់ក្នុងស្ថានភាពក្រីក្រ ទូទាំង ៩៣ ឃុំ-សង្កាត់មន្ទីរផែនការ បានបញ្ជូនប័ណ្ណសមធម៌(ប័ណ្ណក្រីក្រ) បញ្ជាក់អត្តសញ្ញាណគ្រួសារក្រីក្រ ចំនួន៣,០០៥សន្លឹក នៅទូទាំងខេត្ត ។
ក្នុងនោះជនក្រីក្រ២.៧២៥គ្រួសារ បានទទួលប្រាក់គោលការណ៍របស់រាជរដ្ឋាភិបាលរួចរាល់ហើយ ក្រោយដំណើរការជំហានទីមួយ ចាប់ពីថ្ងៃទី២០ ខែឧសភា ដល់ទី១ ខែមិថុនា ឆ្នាំ២០២០ ។
លោកប្រធានមន្ទីរ បានបន្តថា ការកំណត់អត្តសញ្ញាណ និងផ្តល់ប័ណ្ណក្រីក្រ កំពុងធ្វើបន្តយ៉ាងយកចិត្តទុកដាក់ នៅគ្រប់មូលដ្ឋានទាំងអស់ ។ ប្រសិនបើចំនួនជនក្រីក្រ កើនលើសពីសន្លឹកប័ណ្ណ ដែលបានបញ្ជូនទៅមូលដ្ឋានរួចរាល់នោះ មន្ទីរនឹងធ្វើរបាយការណ៍ទៅក្រសួង ដើម្បីទទួលយកមកចែកជូនបន្ថែម ដោយមិនឱ្យខ្វះចន្លោះ ក្រុមគ្រួសារណាមួយឡើយ ៕
