នៅព្រឹកថ្ងៃពុធនេះនៅក្នុងប្រទេសឥណ្ឌាមានករណីផ្ទុះឡកម្តៅមួយ នៅឯស្ថានីយ៍ថាមពលកម្តៅ Neyveli នៅរដ្ឋតាមិលណាឌូ ភាគខាងត្បូងប្រទេសឥណ្ឌា ដែលយ៉ាងហោចណាស់មានមនុស្ស៥នាក់បានស្លាប់ និង១៧នាក់ទៀតបានរងរបួសជាបន្ដបន្ទាប់ ។ នេះបើយោងតាមប្រភពទីភ្នាក់ងារសារព័ត៌មាន Sputnik ដែលបានចុះផ្សាយនៅថ្ងៃទី០១ ខែកក្កដា ឆ្នាំ២០២០ នេះ ។
ចំនួនអ្នកស្លាប់បន្តបន្ទាប់ទៀតអាចនឹងកើនឡើង ខណៈមានមនុស្សជាច្រើនកំពុងជាប់នៅខាងក្នុងនោះ ។ ក្រុមពន្លត់អគ្គីភ័យផ្ទាល់របស់ស្ថានីយ៍ក៏បានអន្តរាគមន៍យ៉ាងប្រញាប់ប្រញាល់នៅកន្លែងផ្ទុះឡកម្តៅដើម្បីជួយសង្គ្រោះកម្មករដែលនៅជាប់គាំង ។
អាជ្ញាធរបានឲ្យដឹងថា ៖ «ក្រុមជួយសង្គ្រោះពីរដ្ឋបាលស្រុក Cuddalore ក៏បានទៅដល់កន្លែងដើម្បីវាយតម្លៃស្ថានភាព។ មូលហេតុនៃការផ្ទុះនេះកំពុងស្ថិតក្រោមការស៊ើបអង្កេត។ » ។
សារព័ត៌មាន Daily Indian Express បានដកស្រង់សំដីសកម្មជន Nityanand Jayaraman បាននិយាយថា មនុស្ស ៥ នាក់ដែលត្រូវបានស្លាប់គឺជាកម្មករកិច្ចសន្យា ។ លោកបាននិយាយថា នេះគឺជាការផ្ទុះលើកទី ២ ហើយដែលបានកើតឡើងនៅរោងចក្រចាប់តាំងពី ខែមីនា មក ។
កាលពីថ្ងៃទី៧ ឧសភា កន្លងមកក៏ករណីផ្ទុះនៅឯរោងចក្ររបស់ក្រុមហ៊ុន Neyveli Lignite Corporation នៅ Cuddalore បានបណ្តាលឱ្យកម្មករ៨នាក់រងរបួសផងដែរ ។ ហើយនៅប្រទេសឥណ្ឌាថាមពលអគ្គីសនីប្រមាណ៧០ភាគរយត្រូវបានបង្កើតឡើងដោយរោងចក្រថាមពលកំដៅខាងលើនេះ ៕