ខេត្តកំពង់ឆ្នាំង ៖ បើយោងតាមអង្គការសម្ព័ន្ធមិត្តសត្វព្រៃ Wildlife Alliance Cambodia បានអោយដឹងនៅថ្ងៃទី៣០ មិថុនានេះថា កាលពីថ្មីៗនេះ ក្រុមសង្គ្រោះសត្វព្រៃបន្ទាន់ (WRRT) របស់អង្គការសម្ព័ន្ធមិត្តសត្វព្រៃ បានធ្វើការដកហូតសត្វបក្សីជិត៤០០ក្បាល ដែលបានកំពុងដាក់លក់ នៅតាមបណ្តោយផ្លូវជាតិលេខ៥ ដែលស្ថិតនៅក្នុងខេត្តកំពង់ឆ្នាំង ។
អង្គការសម្ព័ន្ធមិត្តសត្វព្រៃ បានបន្តថា បក្សីងាប់ចំនួន៣៦៥ក្បាល ត្រូវបានរកឃើញក្នុងការចុះបង្ក្រាបនេះ រួមទាំងសត្វព្រាបងាប់ ចំនួន០៩ក្បាល ។ ក្នុងនោះ សត្វព្រាបចំនួន២២ក្បាល ដែលនៅរស់ ត្រូវដោះលែងអោយចូលទៅក្នុងព្រៃវិញ ដោយក្រុមសង្គ្រោះសត្វព្រៃបន្ទាន់ (WRRT) ។
ប្រភពដដែលបានបញ្ជាក់ថា ក្នុងការចាប់អ្នកលក់សត្វខុសច្បាប់ គឺមានភាពពិបាកមែនទែន ដោយសារតែអ្នកលក់ទាំងនោះ តែងតែយកសត្វព្រៃ ទៅលាក់ទុក នៅក្នុងព្រៃក្បែរនោះ រឺអ្នកលក់សត្វព្រៃទាំងនោះ បានរត់គេចខ្លួនបាត់ នៅពេលដែលដឹងថា សមត្ថកិច្ចសត្វព្រៃ បានចុះមកធ្វើការបង្ក្រាប ។
ជាមួយគ្នានេះ អង្គការសម្ព័ន្ធមិត្តសត្វព្រៃ អំពាវនាវទៅដល់ប្រជាពលរដ្ឋកម្ពុជា សូមបញ្ឈប់ការបរិភោគសាច់សត្វព្រៃ។ ការយកសត្វព្រៃទៅធ្វើជាសត្វចិញ្ចឹម រឺការប្រើប្រាស់សាច់សត្វព្រៃ មានន័យថា ជាការបំផ្លាញសម្បត្តិធម្មជាតិរបស់ប្រទេសកម្ពុជា។ យើងត្រូវតែរួមគ្នាការពារសត្វព្រៃសម្រាប់មនុស្សជំនាន់ក្រោយបានស្គាល់ ៕