រាជធានីភ្នំពេញ ៖ សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ថ្លែងប្រាប់អ្នកសារព័ត៌មានកាលពីល្ងាចថ្ងៃទី២៥ មិថុនា ម្សិលមិញនេះថា ក្រសួងសុខាភិបាល គ្រោងសាកល្បងដាក់ម៉ាស៊ីនស្វែងរកមេរោគកូវីដ១៩ ចំនួន៦៤ទីតាំង ។
រដ្ឋមន្ត្រី បន្តថា សព្វថ្ងៃនេះ បណ្តាប្រទេសនៅលើសកលលោក បានយកម៉ាស៊ីន សម្រាប់ពិនិត្យ និងព្យាបាលអ្នកកើតជំងឺរបេង ដាក់ឲ្យប្រើប្រាស់ក្នុងវិស័យសុខាភិបាល ដើម្បីស្វែងរក និងពិនិត្យ អ្នកឆ្លងមេរោគកូវីដ–១៩ ដូច្នេះក្រសួងសុខាភិបាលកម្ពុជា មានម៉ាស៊ីនជីនអ៊ិចស្ពឺដ ចំនួន៨៣គ្រឿង បានសម្រេចដាក់ឲ្យដំណើរការសាកល្បង ជំហានដំបូង នៅក្នុងខេត្តសៀមរាប ចំនួន០១ទីតាំង និងគ្រោងដាក់ដំណើរការចំនួន៦៣ ទីតាំងផ្សេងទៀត (សរុប៦៤ទីតាំង) ។
លោកសាស្ត្រាចារ្យ ម៉ម ប៊ុនហេង បន្ថែមថា បើមន្ត្រីសុខាភិបាលយើងអនុវត្តន៍បានជោគជ័យ យើងអាចចូលរួមសម្រាលបន្ទុកការងារវិទ្យាស្ថានប៉ាស្ទ័រកម្ពុជា និងវិទ្យាស្ថានសុខភាពសាធារណៈ នៃក្រសួងសុខាភិបាល បានរហ័ស ព្រោះវាជាការងារអាទិភាពមួយរបស់រាជរដ្ឋាភិបាល ក្នុងការប្រយុទ្ធនឹងជំងឺកូវីដ១៩ ដោយខាងមជ្ឈមណ្ឌលជាតិកំចាត់រោគបេងមានម៉ាស៊ីនស្រាប់ ក៏សូមផ្សារភ្ជាប់ជាមួយការងារនេះ យើងក៏កំពុងតាមដានសុខភាពរបស់ប្រជាពលរដ្ឋទាក់ទង នឹងជំងឺសួត និងជំងឺកូវីដ១៩ ដែលសព្វថ្ងៃនៅមនី្ទរពេទ្យកុមារជាតិកំពុងធ្វើ ហើយវិទ្យាស្ថានសុខភាពសាធារណៈ ក៏កំពុងស្រាវជ្រាវចំពោះអ្នកដែលមានជំងឺសួត ដែលមកដល់ពេលនេះ មិនឃើញមានករណីជំងឺកូវីដ១៩ មានកើតឡើងក្នុងសហគមន៍នោះទេ ។
ឯកឧត្តម រដ្ឋមន្ត្រីក្រសួងសុខាភិបាល ក៏បានបញ្ជាក់ដែរថា ស្របពេលករណីជំងឺកូវីដ១៩ នៅតែបន្តឆ្លង ជាករណីនាំចូលពីបរទេសមកកាន់កម្ពុជានោះ កម្ពុជានឹងពង្រឹងវិធានការការពារ ត្រួតពិនិត្យយ៉ាងរឹងមាំ នៅតាមច្រកចេញ ចូលតាមព្រំដែនប្រទេសជិតខាង ជាពិសេសជនជាតិខ្មែរ និងបរទេស ធ្វើដំណើរមកពីក្រៅប្រទេស ចូលមកកាន់ប្រទេស តាមជើងហោះហើរច្រកអាកាសយានដ្ឋានអន្តរជាតិភ្នំពេញ ត្រូវធ្វើតេស្ត យកសំណាក ពិសោធន៍ រកមេរោគកូវីដ១៩ ។ ក្នុងករណីរកឃើញថា មានអ្នកឆ្លងមេរោគកូវីដ១៩ ត្រូវយកគាត់ទៅព្យាបាលនៅមន្ទីរពេទ្យមិត្តភាព ខ្មែរ-សូវៀត ហើយបុគ្គលដែលប៉ះពាល់ និងជិតស្និត យកគាត់ទៅធ្វើចត្តាឡីស័ក រយៈពេល១៤ថ្ងៃ នៅមណ្ឌលសុខភាពចាក់អង្រែក មូលដ្ឋានទ័ពអាកាស មណ្ឌលវិទ្យាល័យជម្ពូវ័ន និងបណ្តាសណ្ឋាគារ ៕
