ខេត្តកំពង់ធំ ៖ នៅរសៀលថ្ងៃទី២៤ ខែមិថុនា ឆ្នាំ២០២០ កងកម្លាំងរាជអាវុធហត្ថខេត្តកំពង់ធំ បានចុះបង្ក្រាបបនល្បែងស៊ីសងខុសច្បាប់ ដោយឃាត់ខ្លួនបានមនុស្សប្រុសស្រីចំនួន៨នាក់ ស្ថិតនៅភូមិថ្មសំលៀង ឃុំក្រយៀ ស្រុកសន្ទុក ខេត្តកំពង់ធំ ។
ការចុះប្រតិបត្តិការបង្ក្រាបបនល្បែងស៊ីសងនេះ ធ្វើឡើងក្រោយពីទទួលបានការសំណូមពររបស់បងប្អូនប្រជាពលរដ្ឋ ដែលបានរាយការណ៍ទៅសមត្ថកិច្ចបង្ក្រាបបនល្បែងស៊ីសង នៅក្នុងមូលដ្ឋានដែលកំពុងតែបង្វក់ស្មារតី ឲ្យស្ត្រីមេផ្ទះ ក្លាយជាស្ត្រីនៅក្នុងបនល្បែង និងដោយមានការអនុញ្ញាតពីលោកព្រះរាជអាជ្ញា នៃអយ្យការអមសាលាដំបូងខេត្តកំពង់ធំ ផងដែរ ។
ជាលទ្ធផល សមត្ថកិច្ចកងរាជអាវុធហត្ថខេត្តកំពង់ធំ បានដកហូតបៀ៣ហ៊ូ, ក្រដាសឆ្នោតឡូតូ១០សន្លឹក និងម៉ូតូ៤គ្រឿង ។ ចំពោះវត្ថុតាង ត្រូវបាននាំយកទៅរក្សាទុក នៅទីបញ្ជាការកងរាជអាវុធហត្ថខេត្តកំពង់ធំ ចំណែកមនុស្ស ត្រូវបានអបរំណែនាំ ហើយឲ្យទៅផ្ទះវិញ ៕