យោងតាមប្រភពពីទីភ្នាក់ងារសារព័ត៌មាន BBC បានចេញផ្សាយថា តារាឆ្នើមសញ្ជាតិប្រេស៊ីល កីឡាករខ្សែប្រយុទ្ធ Neymar Jr ដែលបច្ចុប្បន្នលេងឲ្យក្លិបអ្នកមានបារាំង PSG ត្រូវបានតុលាការអេស្ប៉ាញសម្រេចឲ្យចាញ់ក្តីដោយត្រូវបង់ប្រាក់ចំនួន ៧.៤៨ លានដុល្លារទៅឲ្យអតីតក្លិបរបស់ខ្លួន FC Barcelona ។
ខ្សែប្រយុទ្ធវ័យ២៨ឆ្នារូបនេះបានដាក់ពាក្យបណ្ដឹងទៅកាន់សាលាឧទ្ធរណ៍ភ្លាមៗប្រឆាំងនឹងសេចក្តីសម្រេចនេះ ក្រោយពីចៅក្រមសម្រេចគាំទ្រក្លិបអ្នកមានបុណ្យ FC Barcelona ។ ចំណែកឯក្លិប Barcelona វិញក៏បានស្វាគមន៍ចំពោះសាលក្រមរបស់តុលាការដែលការពារផលប្រយោជន៍ស្របច្បាប់របស់ខ្លួន ។
កន្លងមកអតីតខ្សែប្រយុទ្ធក្លិបអ្នកមានបុណ្យ FC Barcelona កីឡាករ Neymar Jr បានអះអាងថា ក្លិប Barcelona នៅមិនទាន់ទូទាត់ប្រាក់ចំនួន៤៨លានដុល្លារដែលជាប្រាក់លើកទឹកចិត្តក្នុងកិច្ចសន្យារយៈពេល៥ឆ្នាំរវាង Neymar និងក្លិប Barcelona មុនពេលដែលរូបគេចាកចេញទៅកាន់ក្លិបអ្នកមានបារាំង PSG នៅខែសីហា ឆ្នាំ២០១៧ ។
ខ្សែប្រយុទ្ធសញ្ជាតិប្រេស៊ីលរូបនេះក៏បានដាក់ពាក្យបណ្តឹងទៅកាន់ស្ថាប័នគ្រប់គ្រង FIFA ផងដែរ បន្ទាប់ពី Barcelona បានបដិសេធមិនបង់ប្រាក់ឲ្យគាត់បន្ទាប់ពីការផ្ទេរដែលមានតម្លៃ២៤៨លានដុល្លារកាលពីឆ្នាំ២០១៧ តែទោះជាយ៉ាងណារហូតមកទល់ពេលនេះ FIFA មិនបានចាត់វិធានការអ្វីនោះទេដោយនិយាយថា នឹងទុករឿងក្ដីនេះឲ្យទៅតុលាការអេស្ប៉ាញជាអ្នកដោះស្រាយ ៕
