អ្នកវិទ្យាសាស្ត្រនៃមន្ទីរពិសោធន៍របស់ចិនកំពុងតែដុតដៃដុតជើងបង្កើតវ៉ាក់សាំងប្រឆាំងជំងឺរាតត្បាតកូវីដ១៩ ធ្វើឲ្យចំនួនសត្វស្វាមិនគ្រប់គ្រាន់សម្រាប់ការធ្វើតេស្តបណ្តាលឲ្យសត្វស្វាមានតម្លៃកើនឡើង១គុណនឹង១០ ខណៈវ៉ាក់សាំងប្រឆាំងកូវីដ៩នេះក៏គ្រោងនឹងធ្វើតេស្តលើមនុស្សឆាប់ៗផងដែរ ។
ក្រុមហ៊ុនល្បីឈ្មោះ Yisheng Biopharma ខាងផលិតវ៉ាក់សាំងដែលមានមូលដ្ឋាននៅទីក្រុង Shenyang កំពុងខិតខំបង្កើតវ៉ាក់សាំងប្រឆាំងកូវីដ៩ចាប់តាំងពីវីរុសមួយនេះបានផ្ទុះឡើងដំបូងមកម្ល៉េះ ។ វ៉ាក់សាំងកូវីដ១៩ នេះធ្លាប់ត្រូវបានសាកល្បងរួចមកហើយលើសត្វទន្សាយ និងកណ្តុ ដោយលទ្ធផលទទួលបានមកវិញល្អព្រោះសត្វទាំងនេះមានកម្រិតអង់ទីករខ្ពស់ ។ ហើយវាមិនត្រឹមតែជាវ៉ាក់សាំងការពារឆ្លងជំងឺកូវីដ១៩ប៉ុណ្ណោះទេ ថែមទាំងអាចព្យាបាលអ្នកជំងឺកូវីដ១៩បានទៀតផង ។
ក្រុមហ៊ុនខាងលើធ្លាប់ទិញសត្វស្វាក្នុងមួយក្បាលតម្លៃ១៤០០ដុល្លារ ទៅ២៨០០ដុល្លារប៉ុន្តែដោយសារតែកង្វះខាតរកសត្វស្វាមិនបានពេលនេះតម្លៃសត្វស្វាបានកើនឡើង១គុណនឹង១០ ។ ចិនជាប្រទសមួយដែលផ្គត់ផ្គង់សត្វស្វាដល់មន្ទីរពិសោធន៍នានាដ៏ធំមួយដែលនាំចេញសត្វស្វាដល់ទៅ២០០០០ក្បាលកាលពីឆ្នាំ២០១៩ និងបានប្រើប្រាស់សត្វស្វាក្នុងការស្រាវជ្រាវដល់ទៅ១៨០០០ក្បាលដើម្បីធ្វើតេស្តក្នុងប្រទេសចិន ៕
