អាហ្វហ្គានីស្ថាន ៖ ក្មេងៗសិស្សសាលាសាសនាមួយនៅភាគខាងជើងអាហ្វហ្គានីស្ថាន៩នាក់បានបាត់បង់ជីវិត និងរងរបួសជាច្រើននាក់ទៀតក្រោយពីមានការបំផ្ទុះគ្រាប់បែកមួយនៅក្នុងសាលាដោយពួកប្រកាន់សាសនាបណ្តាលឲ្យក្មេងៗក្លាយជាជនរងគ្រោះដោយអយុត្តិធម៌ ។ នេះបើតាមប្រភពពីទីភ្នាក់ងារសារព័ត៌មាន AFP បានចេញផ្សាយនៅថ្ងៃទី១៨ ខែមិថុនា ឆ្នាំ២០២០ ។
តាមប្រភពពីអ្នកនាំពាក្យកម្លាំងប៉ូលិសក្នុងតំបន់បានឲ្យដឹងថា តាមលទ្ធផលស្រាវជ្រាវជាបឋមការបំផ្ទុះនេះបង្កឡើងដោយគ្រាប់កាំភ្លើងត្បាល់ ។ នៅពេលនេះគេមិនទាន់ដឹងថា គ្រាប់កាំភ្លើងត្បាល់នេះនាំចូលសាលារៀនដោយរបៀបណានោះទេ ។
កម្លាំងប៉ូលិសបានឲ្យដឹងទៀតថា ក្នុងចំណោមជនរងគ្រោះគឺជាសិស្ស មានអាយុក្រោម១៨ឆ្នាំទាំងអស់ និងមានសិស្ស៦នាក់ផ្សេងទៀតរងរបួស ។ ហេតុការខាងលើកើតឡើងនៅក្នុងសាលារៀនមួយក្នុងស្រុក Ishkamish ស្ថិតនៅក្នុងខេត្ត Takhar ។ ហេតុការផ្ទុះគ្រាប់បែកខាងលើកើតឡើងក្រោយពេលមានករណីផ្ទុះពីរលើកផ្សេងទៀតនៅព្រះវិហារ ក្នុងទីក្រុងកាប៊ុល ក្នុងខែមិថុនានេះ ។
តាមប្រភពសារព័ត៌មានខាងលើ ការបំផ្ទុះនេះបានកើតឡើងជាបន្តបន្ទាប់នៅក្នុងប្រទេសអាហ្វហ្គានីស្ថាន ក្នុងពេលរដ្ឋាភិបាល និងក្រុមតាលីបង់ ត្រៀមតភ្ជាប់កិច្ចពិភាក្សាបញ្ចប់អំពើហិង្សាដែលអូសបន្លាយរយៈពេលជិត២ទសវត្សរ៍កន្លងមក ។
អ្នកនាំពាក្យក្រសួងមហាផ្ទៃអាហ្វហ្គានីស្ថាន លោក Tareq Arian បានឲ្យដឹងថា ក្នុងរយៈពេល១សប្តាហ៍កន្លងមកក្រុមតាលីបង់បានវាយប្រហារដល់ទៅ២២២លើក ទៅលើទីតាំងនានារបស់កម្លាំងសន្តិសុខអាហ្វហ្គានីស្ថានបណ្តាលឲ្យមានអ្នកស្លាប់៤២២នាក់ ៕