តាមប្រភពពីទីភ្នាក់ងារសារព័ត៌មាន The Sun បានចេញផ្សាយថា ខ្សែប្រយុទ្ធឆ្នើម Cristiano Ronaldo នឹងមិនចូលនិវត្តន៍ពីបាល់ទាត់ឡើយរហូតទាល់តែគាត់តាមទាន់កំណត់ត្រាដ៏អស្ចារ្យបំផុតរបស់វិរបុរសប្រេស៊ីល Pele នេះជាការលើកឡើងរបស់អតីតខ្សែការពារក្រុមបីសាចក្រហម Gary Neville ។
Ronaldo ដែលបច្ចុប្បន្នមានវ័យ៣៥ឆ្នាំ ប៉ុន្តែនៅតែមានឈ្មោះថាជាម៉ាស៊ីនរកគ្រាប់បាល់របស់ Juventus ហើយគិតមកទល់នឹងពេលនេះគាត់រកបាន៧២៥គ្រាប់ហើយក្នុងនាមជាកីឡាករអាជីព ។ កីឡាកររូបនេះក៏ជាប់កំណត់ត្រានៅក្លឹបចាស់របស់គាត់ Real Madrid ដោយរកគ្រាប់បាល់បានច្រើនជាងគេក្នុងប្រវត្តិសាស្ត្រក្លឹប ។
យ៉ាងណាមិញចំនួនគ្រាប់បាល់របស់ Ronaldo នៅតែតាមពីក្រោយកំណត់ត្រារកគ្រាប់របស់ Pele ឆ្ងាយនៅឡើយ ដោយវិរបុរសប្រេស៊ីលរកបានដល់ទៅ១២៨១គ្រាប់ក្នុងការលេង១៣៦៣ប្រកួតក្នុងអាជីពរបស់គាត់ មានន័យថា Ronaldo ត្រូវការ៥៥៦គ្រាប់ទៀតដើម្បីតាមស្មើ Pele ។
អតីតមិត្តរួមក្រុមរបស់អតីតខ្សែប្រយុទ្ធក្រុមបីសាចក្រហម Gary Neville ជឿថា Cristiano Ronaldo គឺជាកីឡាករមានមហិច្ឆតា និងចង់អោយគ្រប់គ្នាទទួលស្គាល់គាត់ថា ជាកីឡាករល្អបំផុតក្នុងប្រវត្តិសាស្ត្របាល់ទាត់ ដោយចង់បំបែកកំណត់ត្រារបស់ Pele ។
Neville ប្រាប់ Sky Sport ថា «ខ្ញុំមានការជឿជាក់ថា Ronaldo ចង់ផ្តួលកំណត់ត្រាគ្រាប់បាល់របស់ Pele ហើយវាជាអ្វីដែលគាត់គិតក្នុងចិត្ត» ។ Ronaldo ជាកីឡាករដែលបានបង្កើតកំណត់ត្រារាប់មិនអស់នៅក្នុងពិភពបាល់ទាល់ ហើយបើទោះបីជាបច្ចុប្បន្នគាត់មានវ័យជ្រេរបន្តិចមែន ប៉ុន្តែគាត់នៅតែអាចរកគ្រាប់បាល់បានដល់ទៅ២១គ្រាប់ក្នុងការបង្ហាញខ្លួន២២លើកអោយ Juventus រដូវកាលនេះ ៕
