បន្ទាយមានជ័យ ៖ ប្រជាពលរដ្ឋប្រទះឃើញគ្រាប់យុទ្ធភ័ណ្ឌមិនទាន់ផ្ទុះចំនួន១៥គ្រាប់ បានរាយការណ៍ប្រាប់អាជ្ញាធរ និងបន្តទៅអង្គភាពបោសសម្អាតិមីន ហេឡូត្រាស្ត ដើម្បីនាំទៅកម្ទេចចោល ។
ហេតុការណ៍ប្រទះឃើញនេះកាលពីព្រឹកថ្ងៃទី១១ ឧសភា ២០២០ នៅព្រំដែនកម្ពុជា-ថៃ ស្ថិតក្នុងភូមិអូរកំបុត ឃុំគោករមៀត ស្រុកថ្មពួក ខេត្តបន្ទាយមានជ័យ ។
លោកវរសេនីយ៍ឯក ឡុង សំណាង មេបញ្ជាការវរសេនាតូចនគរបាលការពារព្រំដែនលេខ៨០៧ បានឱ្យដឹងថា ប្រជាពលរដ្ឋម្នាក់ឈ្មោះ ជុំ រស្មី អាយុ៥៣ឆ្នាំ រស់នៅភូមិអូរកំបុត ឃុំគោករមៀត ស្រុកថ្មពួក បានភ្ជួរដីធ្វើចម្ការ ហើយប្រទះឃើញគ្រាប់មីនចំនួន១៥គ្រាប់ ដែលបន្សល់ទុកតាំងពីសម័យសង្គ្រាម បានរាយការណ៍មកកម្លាំងនគរបាលការពារព្រំដែនប៉ុស្តិ៍អូរកំបុត ចុះទៅពិនិត្យជាក់ស្តែង ហើយក៏បានប្រគល់ទទួលគ្រាប់មីនទាំងនោះ ដើម្បីយកទៅកម្ទេចចោល ៕
