រាជធានីភ្នំពេញ ៖ សមត្ថកិច្ចកងរាជអាវុធហត្ថរាជធានីភ្នំពេញ បានបញ្ជូនជនសង្ស័យ០២នាក់ ករណីលួចមានស្ថានទម្ងន់ទោស(ឆក់) ទៅតុលាការ នៅព្រឹកថ្ងៃទី១២ ខែឧសភា ឆ្នាំ២០២០ ។
ជនសង្ស័យទាំង០២នាក់មានទី១ ឈ្មោះ ឆៃ ប៊ុនឈឿន អាយុ២៨ឆ្នាំ មុខរបរជាងផ្សារដែក ទីលំនៅបច្ចុប្បន្ន ភូមិសំរោង សង្កាត់ព្រែកព្នៅ ខណ្ឌព្រែកព្នៅនិងទី២ ឈ្មោះ រី មីន អាយុ២២ឆ្នាំ មុខរបរមិនពិតប្រាកដ ទីលំនៅបច្ចុប្បន្នផ្ទះលេខ១១៧២ ផ្លូវឯកឧត្តម ជា សុផារ៉ា សង្កាត់ច្រាំងចំរេះ ខណ្ឌឫស្សីកែវ ។
សូមជម្រាបថា កាលពីវេលាម៉ោង០២និង៣០នាទីយប់ថ្ងៃទី០៨ ឧសភា ២០២០ នៅចំណុចផ្លូវព្រះមុន្នីវង្ស កែងផ្លូវ១១០ សង្កាត់ស្រះចក ខណ្ឌដូនពេញ ជនសង្ស័យនិងបក្ខពួកចំនួន៥នាក់ ជិះម៉ូតូចំនួន០២គ្រឿង បានធ្វើសកម្មភាពឆក់ទៅលើជនជាតិចិន ចំនួន០៤នាក់កំពុងដើរ ប៉ុន្តែមិនបានសម្រេច ក៏ត្រូវបានជនរងគ្រោះស្រែកឆោរឡោ ឡើងបង្កការភ្ញាក់ផ្អើល ដល់សមត្ថកិច្ចមូលដ្ឋានអាវុធហត្ថខណ្ឌដូនពេញ កំពុងជិះល្បាត ភ្លាមៗនោះជនស្ស័យក៏ព្យាយាមបើកម៉ូតូរត់គេចខ្លួន ត្រូវបានកម្លាំងល្បាតជួយអន្តរាគមន៍ដេញតាមពីក្រោយ រហូតដល់ចំណុច ម៉ូឌែនប្រាំ ក្នុងខណ្ឌឫស្សីកែវ ពួកគេបានផ្តួលម៉ូតូភ្លាមៗនោះសមត្ថកិច្ចអាវុធហត្ថឃាត់ខ្លួនបានតែម្តង ចំណែកបក្ខពួកចំនួន ០៣នាក់ទៀតកំពុងរត់គេចខ្លួន៕
