ខេត្តបន្ទាយមានជ័យ ៖ ជនរងគ្រោះម្នាក់ជាមនុស្សគរ ត្រូវបានជនមួយក្រុម ជាអ្នកស្គាល់ដែលធ្វើការជាមួយគ្នា បបួលផឹកស៊ី បង្ខំរហូតស្រវឹងខ្លាំង រួចក៏ធ្វើសកម្មភាពវាយប្លន់សម្លាប់យកម៉ូតូ និងខ្សែក ថែមទាំងគាស់យកធ្មេញមាសរបស់ជនរងគ្រោះទៀតផង ។
ហេតុការណ៍វាយប្លន់យ៉ាងព្រៃផ្សៃនេះ បានកើតឡើងកាលពីថ្ងៃទី២៨ មេសា ២០២០ នៅក្នុងភូមិអូរតាគល់ ឃុំឫស្សីស្រុក ស្រុកមង្គលបុរី ខេត្តបន្ទាយមានជ័យ ។
បើតាមលោកឧត្តមសេនីយ៍ទោ អាត់ ខែម ស្នងការខេត្ដបន្ទាយមានជ័យ បានប្រាប់អោយដឹងថា ជនរងគ្រោះជាមនុស្សគ រស់នៅភូមិអូអាកុល ឃុំឬស្សីស្រុក ស្រុកមង្គលបុរី ។ ចំណែកឯក្រុមជនល្មើសចំនួន ៥នាក់ (ស្រីម្នាក់) រស់នៅភូមិឃុំជាមួយគ្នា ។
លោកស្នងការខេត្ដបន្ទាយមានជ័យ បានបន្តថា ជនល្មើសទាំង៥នាក់នេះបានបបួលជនរងគ្រោះ ផឹកស្រា នៅក្នុងខ្ទមមួយកន្លែង ក្នុងភូមិ-ឃុំដូចខាងលើ ពេលនោះជនល្មើសទាំង៥នាក់ ក៏មានគំនិតប្លន់ ក៏បបួលជនរងគ្រោះឲ្យផឹកស្រវឹងខ្លាំង ។ បន្ទាប់មកពួកគេ ក៏ចេញពីទីតាំងខាងលើមកដល់ស្ពានមួយកន្លែង នៅក្នុងផ្លូវ ទៅខេត្ដសៀមរាប ក៏បន្ដឲ្យជនរងគ្រោះផឹកស្រវឹងឲ្យកាន់តែខ្លាំង ពេលនោះជនល្មើសក៏ចាប់ផ្ដើមធ្វើសកម្មភាព យកដំបងវាយ និងយកខ្សែក្រវ៉ាក់រឹតក ហើយចាប់ជនរងគ្រោះ ជ្រមុជចូលទឹកប្រឡាយ រហូតដល់ស្លាប់ ហើយជនល្មើសក៏បានគាស់យកធ្មេញមាស របស់ជនរងគ្រោះដែលជាមនុស្សគ ទៀតផង ។
បន្ទាប់ពីធ្វើសកម្មភាពវាយប្លន់ហើយ ក្រុមជនល្មើសបានដឹកសាកសពជនរងគ្រោះ តាមម៉ូតូ យកទៅចោលក្នុងប្រឡាយមួយកន្លែងទៀត នៅសង្កាត់ម្កាក់ ក្រុងសិរីសោភ័ណ្ឌ នៅផ្លូវជាតិ៥៦ ។
លោកស្នងការខេត្ដបន្ទាយមានជ័យ បញ្ជាក់ថា ក្រុមជនល្មើសបានគេចពីស្រុកមង្គលបុរី ទៅលាក់ខ្លួននៅទីតាំងរបស់ស្ដ្រីម្នាក់ ដែលជាប្រពន្ធរបស់ជនល្មើសម្នាក់ ក្នុងចំណោមជនល្មើស៤នាក់ នៅភូមិកំរែក ឃុំស្វាយសរ ស្រុកបរិបូរណ៍ ខេត្តកំពុងឆ្នាំង ។ ទើបត្រូវកម្លាំងសមត្ថកិច្ចខេត្ត ដឹកនាំដោយឧត្តមសេនីយ៍ទោ អាត់ ខែម ស្នងការខេត្ដ តាមចាប់បានជនសង្ស័យទាំង៥នាក់ ។ ក្រុមជនដៃដល់ ត្រូវបានកម្លាំងជំនាញ កំពុងកសាងសំណុំរឿង ដើម្បីចាត់ការទៅតាមនីតិវីធី ៕
