គូឡាឡាំពួរ ៖ ប្រទេសម៉ាឡេស៊ី បានប្រកាសថា បុរសអាយុ៧១ឆ្នាំម្នាក់ មកពីទីក្រុងមេឡាកា គឺជាអ្នកជំងឺ Covid-19 ទី១៥ហើយ ដែលបានទទួលមរណភាពកាលពីម៉ោង៥ និង៣៥នាទីព្រឹកថ្ងៃទី២៤ ខែមីនា នេះបើតាម malaymail របស់ម៉ាឡេស៊ី ។
លោកវេជ្ជបណ្ឌិត Noor Hisham Abdullah រដ្ឋមន្ត្រីក្រសួងសុខាភិបាលបាននិយាយថា បុរសដែលស្លាប់ជាករណីជនជាតិម៉ាឡេស៊ីទី (១.៥១៩) ត្រូវបានគេសង្ស័យថា មានទំនាក់ទំនងជិតស្និទ្ធជាមួយអ្នកជំងឺដែលគេស្គាល់ថា ជាករណីទី (៧០៣) ។ បុរសទាំងពីរ បានចូលរួមការជួបជុំគ្នា នៅឯវិហារឥស្លាមក្នុងតំបន់ Seri Petaling Jamek ដែលបានប្រារព្ធធ្វើឡើងកាលពីខែមុន ។
លោកវេជ្ជបណ្ឌិត បាននិយាយនៅក្នុងសេចក្តីថ្លែងការណ៍ថា “មរណភាពរបស់អ្នកជំងឺនៅព្រឹកថ្ងៃនេះ ក្រសួងសូមចូលរួមរំលែកទុក្ខដល់ក្រុមគ្រួសារនៃសព” ។
គិតត្រឹមម៉ោង ៥ល្ងាច ថ្ងៃម្សិលមិញ ម៉ាឡេស៊ី រកឃើញអ្នកឆ្លងវីរុស Covid-19 ចំនួន ១៥៩ ករណីបន្ថែមថ្មី នាំឲ្យចំនួនសរុបក្នុងប្រទេសនេះកើនដល់ ១.៥១៨ករណី ។
យ៉ាងណា ប្រទេសម៉ាឡេស៊ី នៅតែអនុវត្តបទបញ្ជាដែលកំណត់ឲ្យប្រជាជនភាគច្រើននៅក្នុងផ្ទះរបស់ពួកគេរហូតដល់ដំណាច់ខែ ៕