ភ្នំពេញ៖ ក្រុមហ៊ុន ខ្មែរ ប៊ែវើរីជីស ដែលជាពាណិជ្ជកម្មមួយរបស់ក្រុមហ៊ុន ជីប ម៉ុង ពេញចិត្ត និងគាំទ្រចំពោះការរួមចំណែកជាថវិកា៥០ម៉ឺនដុល្លាររបស់ ជីប ម៉ុង ជាមួយរាជរដ្ឋាភិបាលកម្ពុជា ក្នុងការទប់ស្កាត់ការចម្លងនៃវីរុសកូវីដ ១៩។
នាយិការទីផ្សារនៃក្រុមហ៊ុនផលិត ស្រាបៀរ កម្ពុជា មួយនេះ លោកស្រី គង់ កុសល ថ្លែងថា៖ «ក្រុមហ៊ុនផលិត ស្រាបៀរ កម្ពុជា តែងមានទំនួលខុសត្រូវខ្ពស់ចំពោះសង្គម។ ការបរិច្ចាគរបស់ក្រុមហ៊ុន ជីប ម៉ុង ក្នុងការទប់ស្កាត់វីរុសកូវីដ ១៩នេះ ធ្វើឲ្យយើងមានមោទកភាព និងគាំទ្រពេញទំហឹង។ យើងរំពឹងថា ការចូលរួមវិភាគទាននេះផ្តល់ផលវិជ្ជមានចំពោះស្ថានការណ៍បច្ចុប្បន្ន»។
លោកស្រីក៏សំណូមពរប្រជាពលរដ្ឋកម្ពុជា និងក្រសួងពាក់ព័ន្ធទាំងអស់ សូមជួយលើកទឹកចិត្តគ្នាទៅវិញទៅមក និងត្រូវមានជំនឿចិត្តចំពោះកិច្ចខិតខំប្រឹងប្រែងរបស់ភាគីពាក់ព័ន្ធគ្រប់ផ្នែក និងចូលរួមទាំងអស់គ្នា ដើម្បីទប់ស្កាត់ការចម្លងវីរុសកូវីដ ១៩នេះតាមគ្រប់រូបភាព ដែលក្រសួងស្ថាប័នមានសមត្ថកិច្ចបានណែនាំយ៉ាងខ្ជាប់ខ្ជួន៕