ភ្នំពេញ៖ ប្រិយមិត្តបានជ្រាបមកហើយថា ឃាតករឈ្មោះ ដួង មុនីរដ្ឋ អាយុ២៧ឆ្នាំ ជាមន្រ្តីកងរាជអាវុធហត្ថ ពាក់ស័ក្កិ៤ដែលបាញ់សម្លាប់ DJ ចាក់ភ្លេងនៅក្លឹបកម្សាន្ដ ឈ្មោះ ហូ មិនា រួចគេចខ្លួនបាត់ រហូតដល់សព្វថ្ងៃសមត្ថកិច្ចមិនទាន់ចាប់ខ្លួនបានផងនោះ ពេលនេះបងស្រីរបស់ជនសង្ស័យម្នាក់ត្រូវសមត្ថកិច្ចចាប់ខ្លួនជាមួយនឹងគ្រឿងញៀនជិត១គីឡូក្រាម កាលពីយប់ថ្ងៃទី០៨ ខែសីហា ឆ្នាំ២០១៩ នៅចំណុចតាមផ្លូវសាធារណៈ ស្ថិតក្នុងភូមិអូឌឹម សង្កាត់ចោមចៅ ខណ្ឌពោធិ៍សែនជ័យ។
ជនសង្ស័យឈ្មោះ ដួង រស្មីច័ន្ទ ភេទស្រី (ស្លៀកពាក់ និងតែងតួធ្វើប្រុស) អាយុ២៨ឆ្នាំជន មុខរបរ និងស្នាក់នៅមិនពិតប្រាកដ។ វត្ថុតាងចាប់យក៖ សារធាតុញៀនប្រភេទមេតំហ្វេតាមីន(ICE)ប្រមាណ៩៨៦.៦៧ ក្រាម (ជិត១គីឡូក្រាម), ជញ្ជីងថ្លឹង១ និងទូរស័ព្ទដៃ១គ្រឿង ។
ជនសង្ស័យត្រូវបានសមត្តកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ តាមនីតិវិធី។
ចំណែកជនសង្ស័យជាប្អូន នឹងជាឃាតករឈ្មោះ ដួង មុនីរដ្ឋ ជាមន្រ្តីកងរាជអាវុធហត្ថ ពាក់ស័ក្កិ៤ ដែលបាញ់សម្លាប់ DJ ចាក់ភ្លេងនៅក្លឹបកម្សាន្ដ ក្នុងភោជនីយដ្ឋានហេបភីណេស ផ្ទះលេខ៨៥ ផ្លូវលេខ៦៣ ភូមិ៩ សង្កាត់បឹងរាំង ខណ្ឌដូនពេញ កាលពីថ្ងៃទី០៩ ខែមករា ឆ្នាំ២០២០នោះ ត្រូវបានព្រះរាជអាជ្ញាលោកកែវ សុធា ចេញដីកាបញ្ជានៅរសៀលថ្ងៃទី២១ ខែមករា ឆ្នាំ២០២០នេះ ឲ្យចូលមកបង្ហាញខ្លួននៅអធិការដ្ឋាននគរបាលខណ្ឌដូនពេញ ឲ្យបានមុនថ្ងៃទី០៣ ខែកុម្ភៈ ឆ្នាំ២០២០ ដើម្បីសាកសួរលើបណ្ដឹងព្រហ្មទណ្ឌ ពីបទឃាតកម្ម។
ករណីនេះមហាជនរិះគន់ថាជនសង្ស័យឈ្មោះ ដួង រស្មីច័ន្ទ ជាបង ជួញដូរគ្រឿងញៀនជិត១គីឡូក្រាម សមត្ថកិច្ចចាប់ខ្លួនបានយកទៅផន្ទាទោសតាមច្បាប់ ចុះចំណែកជនសង្ស័យជាប្អូនឈ្មោះដួង មុនីរដ្ឋ ជាមន្រ្តីកងរាជអាវុធហត្ថ ពាក់ស័ក្កិ៤ បាញ់សម្លាប់មនុស្សសាហាវព្រៃផ្សៃបំផុតជាច្រើនថ្ងៃមកហើយ ហេតុអ្វីសមត្ថកិច្ចនៅតែចាប់ខ្លួនមិនទាន់បានយកមកផ្ដន្ទាទោស ដើម្បីរកយុត្តិធម៌ជូនក្រុមគ្រួសារជនរងគ្រោះផង? ៕