ភ្នំពេញ៖ កាលពីពេលថ្មីៗនេះមានកូនដំរីមួយក្បាលអាយុប្រហែល១មួយសប្ដាហ៍ និងមានរូបរាងស្គមស្គាំង ត្រូវបានពលរដ្ឋប្រទះឃើញកាលពីថ្ងៃទី១៧ មករា នៅដែនជម្រកសត្វព្រៃភ្នំព្រេច ស្រុកកោះញែក ខេត្តមណ្ឌលគិរី។ កូនដំរី ដែលទំនងរង្វេងចេញពីហ្វូងនេះ ត្រូវបានក្រុមឧទ្យានុរក្ស សង្គ្រោះ និងផ្តល់ចំណីនៅថ្ងៃទី១៨ មករា។
អ្នកនាំពាក្យក្រសួងបរិស្ថានលោក នេត ភាក្ត្រា បានឲ្យដឹងថា៖«ពេទ្យសត្វ និងមន្ត្រីឧទ្យានុរក្ស បានមើលថែកូនដំរីយ៉ាងយកចិត្តទុកដាក់ និងរង់ចាំហ្វូងរបស់វាមករកវិញ។ ករណីហ្វូង ឬមេរបស់វាមិនត្រលប់មក ក្រុមឧទ្យានុរក្ស នឹងបន្តមើលថែ ហើយរកកន្លែងសម្រាប់ចិញ្ចឹមកូនដំរីនេះ»។
គួររំលឹកដែលថា កាលពីថ្ងៃទី១៥ ខែមករា ឆ្នាំ២០២០ ប្រជានេសាទបានប្រទះឃើញសាកសពសត្វដំរី ១ក្បាលបានងាប់នៅក្នុងទឹកក្នុងអូរលាវ ព្រំប្រទល់រវាង ខេត្តរតនគិរី និងខេត្តមណ្ឌលគិរី ៕
