ខេត្តកណ្ដាល៖ ស្រុកស្អាង គឺជាស្រុកដែលសំបូរទៅដោយកសិករនិយមដាំបន្លែនាៗ សម្រាប់យកទៅផ្គត់ផ្គង់តម្រូវការនៅលើទីផ្សារ នឹងដាំទុកបិរភោគខ្លួនឯងផង បើយើងក្រលេកមើលនៅខាងមុខផ្ទះរបស់កសិករមួយចំនួននៅស្រុកស្អាង ដែលបានដាំបន្លែធម្មជាតិនៅមុខផ្ទះសម្រាប់ហូប ព្រោះមិនហ៊ានហូបបន្លែខ្លួនឯងដែលដាំនៅចម្ការ។ កសិករទាំងអស់អះអាងថា បន្លែទាំងស្រុងដែលពួកគេដាំនៅចម្ការទុកសម្រាប់លក់នៅលើទីផ្សារ គឺបានបាញ់ថ្នាំពុលគីមីគ្រប់មុខ៣ឬ៤ដងក្នុងមួយសប្តាហ៍ ដើម្បីឱ្យបន្លែល្អ និងសម្លាប់ ក៏ដូចការពារបន្លែទាំងនោះពីការរំខាន់របស់ពពួកសត្វល្អិតចង្រៃ។ ដោយឡែកបន្លែដែលពួកគេដាំនៅមុខផ្ទះសម្រាប់ហូបប្រចាំគ្រួសារវិញ គឺមិនប្រើប្រាស់ជី និងថ្នាំពុលគីមីអ្វីឡើយ។
នេះបើតាមការលើកឡើងរបស់អ្នកស្រីលាង ហ្កេចបានឲ្យដឹងថា អ្នកស្រីទើបតែចាប់ផ្តើមដាំស្ពៃក្តោបនៅមុខផ្ទះសម្រាប់ហូបខ្លួនឯងនោះ បានពីរដង(ប្រហែលកន្លះឆ្នាំ) ប៉ុណ្ណោះ ព្រោះអ្នកស្រីមិនហ៊ានហូបបន្លែដែលខ្លួនឯងដាំនៅចម្ការធំដែលបានប្រើប្រាស់ថ្នាំពុលគីមីច្រើនលើសលុប សម្រាប់លក់នៅលើទីផ្សារទេ។ ស្រ្ដីវ័យ៤៩ឆ្នាំ បានបញ្ជាក់ប្រាប់សារព៏ត៌មាន “KBN”ថា «សព្វថ្ងៃនេះ កុំថាឡើយបន្លែលក់នៅលើទីផ្សារ ពិសេសបន្លែពពួកស្លឹក ខ្ញុំមិនទិញហូប…សូម្បីតែបន្លែខ្ញុំដាំនៅចម្ការខ្លួនឯង ក៏មិនហ៊ានហូបដែរ។ ព្រោះយើងការដឹងថា បន្លែនៅចម្ការហ្នឹង…បានប្រើថ្នាំពុលច្រើនប៉ុណ្ណា…មិនថាខ្ញុំ មិនថាគេ បន្លែយើងនៅចម្ការ គឺសុទ្ធតែបាញ់ថ្នាំពុលមួយថ្ងៃ…រំលងមួយថ្ងៃ…។ ដោយឡែក បន្លែដែលខ្ញុំដាំនៅមុខផ្ទះវិញ គឺខ្ញុំមិនបានប្រើប្រាស់ថ្នាំគីមីអ្វីឡើយ គឺទុកឱ្យដាំលូតលាស់តាមធម្មជាតិ តែម្តង» ៕