រាជធានីភ្នំពេញ៖ នៅក្នុងទីក្រុងរាជធានីភ្នំពេញមានបឹងសរុបទាំងអស់ចំនួន២៦ ហើយក្នុងនោះបឹងចំនួន១៦ត្រូវបានលុបទាំងស្រុង នឹងបឹង១០ទៀតត្រូវបានលុបនៅផ្នែកខ្លះ នេះបើតាមការលើងឡើងរបស់សមាគមធាងត្នោត។ ប្រជាជនមានការព្រួយបារម្ភយ៉ាងខ្លាំងចំពោះសកម្មភាពលុបបឹងពីមួយថ្ងៃទៅមួយថ្ងៃ សមាគមធាងត្នោតមើលឃើញថា ការលុបបឹងនេះធ្វើឲ្យផលប៉ះពាល់ជីវចម្រុះ និងបរិស្ថាន ហើយបង្កឲ្យមានទឹកជំនន់។ លើសពីនេះពលរដ្ឋរាប់ពាន់គ្រួសារប្រឈមនឹងការគំរាមកំហែង រួមទាំងបាត់បង់លំនៅដ្ឋាន។
ជីវភាពប្រជាពលរដ្ឋជាច្រើនដែលពឹងផ្អែកលើបឹង និងដីសើមទាំងនោះកំពុងទទួលរងផលប៉ះពាល់ដោយប្រជាពលរដ្ឋជាច្រើនពាន់គ្រួសារត្រូវបានគេបណ្តេញចេញពីលំនៅឋាន ឬប្រឈមនឹងការគំរាមកំហែងពីការបណ្តេញចេញនៅថ្ងៃខាងមុខ ខណៈដែលគម្រោងអភិវឌ្ឍន៍នៅបន្តគំរាមកំហែងលំនៅឋាន និងការងាររបស់ប្រជាពលរដ្ឋទាំងនោះ។ ផលប៉ះពាល់ផ្នែកបរិស្ថាននៃនិន្នាការទាំងនេះ នៅមិនទាន់ត្រូវបានគេដឹងច្បាស់លាស់នៅឡើយ ប៉ុន្តែការប៉ាន់ស្មានមួយចំនួនបង្ហាញនូវផលអាក្រក់ធ្ងន់ធ្ងរដែលនឹងកើតមានឡើង ដូចជាទឹកជំនន់ ការបំពុលបរិស្ថាន និងការថមថយនៃទីបង្កកំណើតរបស់មច្ឆាក្នុងបឹងទាំងនោះ។
ផ្អែកលើរបាយការណ៍របស់សមាគមធាងត្នោត បឹងទាំង១៦ ដែលត្រូវបានលុបទាំងស្រុង គឺ បឹងត្របែក១ នៅខណ្ឌចំការមន, បឹងតាម៉ាត នៅខណ្ឌដង្កោ, បឹងស្ទោរ នៅខណ្ឌច្បារអំពៅ, បឹងឈូក នៅខណ្ឌច្បារអំពៅ, បឹងសាឡាង នៅខណ្ឌទួលគោល, ប្រឡាយលូ៥ នៅខណ្ឌមានជ័យ, ត្រពាំងឈូក នៅខណ្ឌសែនសុខ, បឹងទួលពពែ នៅខណ្ឌដង្កោ, បឹងរាជសីហ៍ នៅខណ្ឌសែនសុខ, បឹងចិញ្ចឹមក្រពើ នៅខណ្ឌសែនសុខ, បឹងឈូក នៅខណ្ឌឫស្សីកែវ, បឹងពោងពាយ នៅខណ្ឌសែនសុខ, បឹងអូរអង្កាម នៅខណ្ឌឫស្សីកែវ, បឹងកក់ នៅខណ្ឌទួលគោល, បឹងសាឡាង នៅខណ្ឌឫស្សីកែវ និង បឹងទទឹងថ្ងៃ នៅខណ្ឌជ្រោយចង្វារ។
ចំណែក បឹងទាំង១០ទៀត ដែលបានចាក់ដីលុបផ្នែកខ្លះ គឺ បឹងត្របែក២ នៅខណ្ឌចំការមន, បឹងទំពុន១ និងបឹងទំពុន២ នៅខណ្ឌមានជ័យ, បឹងជើងឯក នៅខណ្ឌដង្កោនិងខណ្ឌមានជ័យ, បឹងតាមោក ឬបឹងកប់ស្រូវ នៅខណ្ឌព្រែកព្នៅ, បឹងខាំពង នៅខណ្ឌជ្រោយចង្វារ, បឹងប៉ាយ៉ាប នៅខណ្ឌឫស្សីកែវនិងខណ្ឌសែនសុខ, បឹងឈូក នៅខណ្ឌឫស្សីកែវ, បឹងក្បាលដំរី នៅខណ្ឌសែនសុខ និងបឹងសំរោង នៅព្រែកព្នៅ ៕
ប្រភព៖ សមាគមធាងត្នោត