បច្ចុប្បន្នការដាំដំណាំជាលក្ខណៈគ្រួសារ (សួនដំណាំគ្រួសារ) ពីមួយថ្ងៃទៅមួយថ្ងៃកាន់តែមានការចាប់អារម្មណ៍ច្រើនឡើង ក្នុងនោះគេក៏ឃើញការដាំបន្លែនៅក្នុងកេះ (ឡាំង) ស្នោក៏ពេញនិយមដែរ ពីព្រោះកេះស្នោធុននឹងទឹកភ្លៀងនិងកំដៅថ្ងៃ ព្រមទាំងមានតម្លៃថោក ឬក៏អាចយកពីកន្លែងដែលគេបោះចោល។
ប៉ុន្តែប្រជាពលរដ្ឋមួយចំនួនបានទទួលព័ត៌មាន និងខ្លះទៀតយល់ថា កេះស្នោនេះនៅពេលត្រូវកំដៅ ថ្ងៃខ្លាំងវានឹងចេញជាតិគីមីដែលគេបានផ្សំបង្កើតកេះស្នោនេះ រួចហើយបន្លែដែលដាំនៅក្នុងកេះនេះស្រូប យកសារធាតុគីមីនោះ។ បន្លែនេះត្រូវបានប្រជាពលរដ្ឋយកទៅបរិភោគ គឺបណ្តាលឲ្យប៉ះពាល់ដល់សុខភាពទន្ទឹមនឹងពួកគេប្រឹងគេចចេញពីបន្លែគីមីនោះ។
ចំងល់នេះលោកបណ្ឌិត យ៉ង សាំងកុមារ ជំនាញកសិកម្ម និងជាអតីតប្រធានអង្គការសេដាក បានពន្យល់ថា ជាធម្មតាកេះស្នោនៅពេលត្រូវកំដៅខ្លាំង គឺវាពិតជាចេញសារធាតុគីមីដែលមាននៅក្នុងកេះស្នោនោះមែន «ប៉ុន្តែយើងមិនបាច់ព្រួយបារម្មណ៍ទេ ពីព្រោះកេះស្នោដែលយើងបានដាំបន្លែនោះ គឺវាមានដី ពិសេសយើងបានស្រោចទឹក ឬដាក់ទឹក (ដាំបន្លែលើទឹក) ដូច្នេះកេះស្នោនេះវាមិនក្តៅរហូតដល់កំរិតដែលបណ្តាលឲ្យសារធាតុគីមីចេញឡើយ»។
យោងតាមការពន្យល់ខាងលើនេះ សូមប្រជាពលរដ្ឋឈប់បារម្មណ៍ទៀតទៅក្នុងការបរិភោគបន្លែដាំនៅក្នុងកេះស្នោដែលខ្លាចប៉ះពាល់ដល់សុខភាពនោះ ៕
ប្រភពៈ សមាគន៏សម្បូរសប្បាយ
