ជាទូទៅយើងពិតជាមិនធ្លាប់បានដឹងពីអាថ៌កំបាំងនៃអត្ថប្រយោជន៍ដែលផ្ទុកនៅក្នុងផ្លែល្មុតនោះទេ ផ្លែល្មុតស្រស់ ជាប្រភពដ៏អស្ចារ្យនៃសារធាតុចិញ្ចឹមដ៏មានប្រយោជន៍។ ក្រៅពីការផលិតសារធាតុប្រឆាំងអុកស៊ីតកម្មផ្លែល្មុតសម្បូរទៅដោយជាតិដែក ទង់ដែង កាល់ស្យូម ម៉ាញ៉េស្យូម ប៉ូតាស្យូម និងផូស្វ័រ។
យោងតាមការសិក្សានៃអ្នកវិទ្យាសាស្ត្របានបង្ហាញថាផ្លែល្មុតសម្បូរទៅដោយសារធាតុ វីតាមីន A និង C និងមានមីក្រូសារធាតុខ្លះនៃវីតាមីន B។ ទាំង៧ចំណុចខាងក្រោមនេះគឺជាអត្ថប្រយោជន៍ដ៏អស្ចារ្យដែលអ្នកគួរតែដឹង និងគួរតែបរិភោគផ្លែល្មុត ជាប្រចាំ។
១. ជួយដល់សុខភាពភ្នែក ៖ ផ្លែល្មុតមានគុណប្រយោជន៍បំផុតសម្រាប់សុខភាពភ្នែករបស់លោកអ្នក ក៏ព្រោះតែវាសម្បូរដោយវីតាមីនអា។ មិនតែប៉ុណ្ណោះវាក៏សម្បូរទៅដោយវីតាមីនសេ ដែលជាសារធាតុសំខាន់ក្នុងការសម្លាប់រ៉ាឌីកាល់សេរី ដែលបង្កឱ្យខូចខាតដល់ប្រស្រីភ្នែកផងដែរ។
២. បង្កើនប្រព័ន្ធភាពស៊ាំ ៖ លោកអ្នកបានជ្រាបពីខាងលើហើយថា ផ្លែល្មុតសម្បូរដោយវីតាមីនសេដែលដើរតួប្រឆាំងអុកស៊ីតកម្មដ៏ខ្លាំងក្លាបំផុតក្នុងការសម្លាប់រ៉ាឌីកាល់សេរី មិនតែប៉ុណ្ណោះទេ វាថែមទាំងជួយបង្កើនភាពស៊ាំរបស់អ្នក ធ្វើការកាន់តែខ្លាំង និងការពារពីជំងឺឆ្លងផ្សេងៗបានយ៉ាងមានប្រសិទ្ធភាពទៀតផង។
៣. សម្រួលដល់ប្រព័ន្ធរំលាយអាហារ ៖ ជាតិសរសៃដែលមានក្នុងផ្លែល្មុតត្រូវបានគេរកឃើញថា វាអាចជួយដល់ប្រព័ន្ធរំលាយអាហាររបស់អ្នកបានយ៉ាងល្អបំផុត។ សម្រាប់អ្នកដែលមានអាការៈទល់លាមក ផ្លែល្មុតគឺជាជម្រើសដ៏ល្អបំផុត។ មិនតែប៉ុណ្ណោះវាថែមទាំងការពារការឆ្លងរោគនៅក្នុងប្រព័ន្ធរំលាយអាហារបានយ៉ាងមានប្រសិទ្ធភាពទៀតផង។
៤. ការពារជម្ងឺមហារីក ៖ ដោយសារតែផ្លែល្មុតសម្បូរទៅដោយវីតាមីនអា និងសេ ដែលជាសារធាតុប្រឆាំងអុកស៊ីតកម្មជួយការពារកោសិការបស់អ្នក មិនឱ្យរងការខូចខាតដោយសាររ៉ាឌីកាល់សេរី។ ព្រោះតែរ៉ាឌីកាល់សេរី បានធ្វើការយ៉ាងសកម្មក្នុងការបំផ្លាញកោសិការបស់អ្នក ហើយអាចធ្វើឱ្យកើតជម្ងឺមហារីកបានទៀតផង។
៥. ជួយដល់ឆ្អឹង ៖ ក្រៅពីការការពារនឹងជម្ងឺមហារីក និងសម្រួលដល់ប្រព័ន្ធរំលាយអាហារហើយនោះ ផ្លែល្មុតក៏អាចធ្វើឱ្យឆ្អឹងរបស់អ្នករឹងម៉ាំបានទៀតផង។ ដោយសារតែផ្លែល្មុតសម្បូរទៅដោយជាតិកាល់ស្យូម វាក៏អាចកាត់បន្ថយនៃការរលាកសន្លាក់ឆ្អឹងបានផងដែរ។
៦. ការពារមិនឱ្យចាស់ជាងវ័យ ៖ ការចាស់ជាងវ័យគឺជាបញ្ហាដែលមនុស្សភាគច្រើនតែងតែជួបប្រទះពីព្រោះតែរ៉ាឌីកាល់សេរីបានបង្កើតអរម៉ូនម្យ៉ាងដែលធ្វើឱ្យអ្នកមានភាពចាស់ជាងវ័យ។ មិនត្រឹមតែប៉ុណ្ណោះ រ៉ាឌីកាល់សេរីបានបំផ្លាញកោសិកាស្បែកធ្វើឱ្យស្បែកជ្រីវជ្រួញ និងស្រអាប់ទៀតផង។ ប៉ុន្ដែនេះមិនមែនជាបញ្ហាទៀតទេ លោកអ្នកអាចកែខៃ និងការពារភាពចាស់ជាងវ័យដោយគ្រាន់តែទទួលទានផ្លែល្មុតប៉ុណ្ណោះ។
៧. ការពារជម្ងឺស្លេកស្លាំង ៖ ដោយសារធាតុចិញ្ចឹម វាក៏សម្បូរជាតិដែក ផូស្វ័រ និងអាស៊ីដហ្វលែត ដែលសារធាតុទាំងនេះហើយអាចបង្កើននូវការដុះគ្រាប់ឈាមក្រហមធ្វើឱ្យអ្នកចៀសផុតពីជម្ងឺស្លេកស្លាំងបានយ៉ាងមានប្រសិទ្ធភាព។