រាជធានីភ្នំពេញ ៖ ក្រុមជម្រើសជាតិកម្ពុជា នឹងត្រូវធ្វើការប្រកួតបើកឆាកប្រចាំពូល A នៃការប្រកួតស៊ីហ្គេម ជាមួយក្រុមម្ចាស់ផ្ទះហ្វីលីពីន នៅពហុកីឡដ្ឋាន Rizal Memorial នាយប់ម៉ោង៧ (ម៉ោងនៅកម្ពុជា) ថ្ងៃចន្ទនេះ ហើយក្រុមមីយ៉ាន់ម៉ា ក៏ត្រូវប្រឈមជាមួយក្រុមម៉ាឡេស៊ី នៅរសៀលថ្ងៃនេះផងដែរ ។
ទោះយ៉ាងណា នៅមុនពេលការប្រកួតចាប់ផ្តើម ក្រុមកម្ពុជា ក្រុមទីម័រខាងកើត និងក្រុមមីយ៉ាន់ម៉ា បានជួបនៅរឿងរអាក់រអួល ដោយក្រុមកម្ពុជា ពួកគេបាននាំគ្នាដេករដូករណែលគួរឲ្យអាណិតនៅលើកម្រាលព្រំជិត៥ម៉ោង ដើម្បីរង់ចាំបន្ទប់ដេក នៅឯសណ្ឋាគារ ហើយទង្វើនេះ បានធ្វើឲ្យអ្នកគាំទ្រកម្ពុជាមួយចំនួន ផ្ទុះការរិះគន់ដល់ម្ចាស់ផ្ទះហ្វីលីពីន ។
ក្រោយផ្ទុះការរិះ គន់យ៉ាងខ្លាំងពីដំណើរការរៀបចំការប្រកួតកីឡាស៊ីហ្គេមដែលមានភាពរញ៉េរញ៉ៃ និងមិនច្បាស់លាស់ ដោយទុកឲ្យក្រុមកីឡាករកម្ពុជា ទីម័រ ក៏ដូចមីយ៉ាន់ម៉ា រង់ចាំជាច្រើនម៉ោងនៅព្រលានយន្តហោះ និងការនាំកីឡាករទៅសណ្ឋាគារខុសនោះ ប្រទេសហ្វីលីពីន បានចេញទោសជាសាធារណៈ កាលពីថ្ងៃទី២៤ ខែវិច្ឆិកា ឆ្នាំ២០១៩ ។
អ្នករៀបចំកម្មវិធីព្រឹត្តិការណ៍កីឡាស៊ីហ្គេម បានចេញមុខសុំទោសជាសាធារណៈនៅក្នុងសន្និសីទកាសែត ដោយនិយាយថា ក្នុងនាមប្រទេសម្ចាស់ផ្ទះពិតជាមានការសោកស្តាយរាល់កង្វះខាត និងកំហុសឆ្គងដែលបានកើតឡើងនាពេលកន្លងមក ។ យើងនឹងរៀនសូត្រពីបទពិសោធន៍នេះ និងប្តេជ្ញាធ្វើឲ្យបានល្អ។
កីឡាករបាល់ទាត់ក្រុមជម្រើសជាតិកម្ពុជា និងទីម៉រ បានហោះទៅទីក្រុងម៉ានីល ប្រទេសហ្វីលីពីន មុនបើកការប្រកួតកាលពីថ្ងៃសៅរ៍ ប៉ុន្តែបានទៅដល់គោលដៅយឺតពេល ។
ជុំវិញបញ្ហានេះ លោក វ៉ាត់ ចំរើន អគ្គលេខាធិការ NOCC និងជានាយកបេសកកម្មការប្រកួតស៊ីហ្គេមនេះ បានប្រាប់កាសែតក្នុងស្រុកមួយថា «រឿងនេះ បានកើតឡើង នៅពេលក្រុមកម្ពុជាយើង ទៅដល់នៅថ្ងៃទី២៣ វិច្ឆិកា ហើយរឿងនេះ មិនមែនមានតែយើងទេ ព្រោះឃើញមានការចុះកាសែតក្នុងនោះមាន ក្រុមទីម័រខាងកើត និងក្រុមមីយ៉ាន់ម៉ា ជាដើម គឺមានបញ្ហាដូចគ្នានេះទាំងអស់ ប៉ុន្តែក្នុងសន្និសីទកាសែត ប្រទេសហ្វីលីពីន ក៏បានធ្វើការសុំទោសផងដែរ»។
លោកបានបន្ថែមថា «យើងបានតាមដាន និងបង្ខំពួកគេឲ្យមកទទួលក្រុមកម្ពុជាយើង ប៉ុន្តែនៅតែមានការយឺត ហើយការពិតកំហុសនេះ មកពីម្ចាស់ផ្ទះហ្វីលីពីន ព្រោះម្ចាស់ផ្ទះអត់បាននិយាយជាមួយម្ចាស់សណ្ឋាគារ ។ ខាងសណ្ឋាគារ មានការកំណត់របស់គេឲ្យចូល check in នៅម៉ោង២រសៀល ហើយយើងទៅដល់ម៉ោង៥ភ្លឺ និងចេញពីព្រលានយើងបានរង់ចាំអស់រយៈពេល២ម៉ោងមុនពេលដែលរថយន្តក្រុងមកទទួល អ៊ីចឹងពេលដល់សណ្ឋាគារត្រូវរង់ចាំរយៈពេល៨ទៅ៩ ម៉ោងបន្ថែមទៀត សម្រាប់សណ្ឋាគារដែលត្រូវស្នាក់នៅ ធ្វើឲ្យមានការលំបាកដល់ក្រុមយើង តែឥឡូវនេះ យើងបានសម្រួលអស់វិញហើយ» ។
ទាក់ទងទៅនឹងបញ្ហាស្នាក់នៅ គណៈគ្រប់គ្រងសណ្ឋាគារ Century Park Hotel Manila បាននិយាយថា ក្រុមជម្រើសជាតិកម្ពុជាមកដល់មុនពេលកំណត់ ខណៈភ្ញៀវស្នាក់នៅ មិនទាន់បានចាកចេញឡើយ ។ ជាទូទៅភ្ញៀវស្នាក់នៅត្រូវចាកចេញ (Check out) នៅវេលាម៉ោង១២ថ្ងៃត្រង់ ឫយឺតយ៉ាវអាចដល់ម៉ោង២រសៀល ។
ចំណែកឯក្រុមជម្រើសជាតិទីម័រវិញ ក៏ជួបបញ្ហាដែរ គឺត្រូវបានរថយន្តក្រុងនាំយកទៅខុសសណ្ឋាគារស្នាក់នៅ ក្រុមមីយ៉ាន់ម៉ា មានបញ្ហស្មុគស្មាញពេលមកដល់ព្រលាន និងពេលវេលាហ្វឹកហាត់ ។
លោក Fabiano Flora គ្រូបង្វឹកក្រុមជម្រើសជាតិទីម័រ បាននិយាយថា កីឡាករនិងអត្តពលិក គ្រប់ប្រទេសទាំងអស់ ត្រូវតែទទួលបានការគោរពស្មើភាពគ្នា។
គួររំឭកថា ការប្រកួតបាល់ទាត់ស៊ីហ្គេម២០១៩ ក្រុមជម្រើសជាតិគោព្រៃកម្ពុជា ស្ថិតនៅក្នុងពូល A ដែលមានក្រុមម្ចាស់ផ្ទះហ្វីលីពីន ម៉ាឡេស៊ី មីយ៉ាន់ម៉ា និង ទីម័រ។ ការប្រកួតនេះ មួយពូលយក២ក្រុម ឡើងទៅវគ្គពាក់កណ្តាលផ្តាច់ព្រ័ត្រ ៕
